ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގެ ދެ ވަނަ މެޗުގައި ޕޯޓޯ ބަލިކޮށް ބާސެލޯނާ އިން އެ ޓީމުގެ ފޯމު ދަމަހައްޓައިފި އެވެ.
ބުދަ ދުވަހުގެ ރޭ ޕޯޓޯގެ ދަނޑުގައި މި ދެ ޓީމު ބައްދަލުކުރިއިރު، ދެ ޓީމުން ވެސް ވަނީ ކުޅުނު ފުރަތަމަ މެޗުން މޮޅުވެފަ އެވެ. ނަމަވެސް ބާސެލޯނާ އިން ވަނީ 1-0 އިން ޕޯޓޯގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި ދެ ޓީމަށް ވެސް ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބިފަ އެވެ. ފުރަތަމަ ހާފުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގެ ތެރޭގައި ބާސެލޯނާ އިން ވަނީ ލަނޑު ޖަހައި ލީޑު ނަގައިފަ އެވެ. މި ސީޒަންގައި މެންޗެސްޓަރ ސިޓީ ދޫކޮށް ބާސެލޯނާ އަށް ބަދަލުވި އިލްކާއީ ގުންޑޮގާން ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ފެރާން ޓޮރޭސް އެވެ.
ދެ ވަނަ ހާފުގައި ޕޯޓޯ އަށް ވަނީ ނަތީޖާ ހަމަހަމަ ކުރުމަށް ވެސް ފުރުސަތު ލިބިފަ އެވެ. އެ ޓީމުގެ ޕެޕޭ އަދި މެހްދީ ތެރަމީ އަށް ވަނީ ލަނޑު ޖަހާނެ ފުރުސަތު ލިބި ބޭކާރުވެފަ އެވެ. އަނެއްކޮޅުން ބާސެލޯނާ އަށް ވަނީ ލީޑު ފުޅާ ކުރުމަށް ފުރުސަތު ލިބިފަ އެވެ. އެ ޓީމަށް ކުޅެމުން އަންނަ ޕޮލެންޑުގެ ކެޕްޓަން ރޮބާޓް ލެވަންޑޯސްކީ އަދި ލޯނު އެއްބަސްވުމެއްގެ ދަށުން ކުޅެމުން އަންނަ ޔާއޯ ކަންސޭލޯ އަށް ވަނީ ލަނޑު ޖަހާނެ ފުރުސަތު ލިބިފަ އެވެ.
މޮޅާއެކު މިހާތަނަށް ކުޅުނު ދެ މެޗުން ހަ ޕޮއިންޓު ހޯދައިގެން ބާސެލޯނާ އޮތީ އެއް ވަނައިގަ އެވެ. ދެ ވަނައިގައި އޮތީ ދެ މެޗުން ތިން ޕޮއިންޓާއެކު ޕޯޓޯ އެވެ. ތިން ވަނައިގައި އޮތް ޝަޚްތަރް ޑޮނެސްކަށް ވެސް ލިބެނީ ތިން ޕޮއިންޓެވެ. އެހެން ނަމަވެސް ލަނޑުގެ ގޮތުން ކުރި ހޯދަނީ ޕޯޓޯ އެވެ. ޕޮއިންޓެއް ނުލިބި މި ގްރޫޕްގެ ފުލުގައި އޮތީ ރޯޔަލް އެންޓްވާޕް އެވެ.
