ނިއުކާސަލް އަތުން ޕީއެސްޖީ އަށް ލަދުވެތި ބައްޔެއް

ޔުއެފާ ޗެމްޕިއަންސް ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން ލަދުވެތި ގޮތަކަށް ޕެރިސް ސެއިންޓް ޖާމަން (ޕީއެސްޖީ) ބަލިވެއްޖެ އެވެ.

ގްރޫޕް ސްޓޭޖުގައި ކުޅުނު ފުރަތަމަ މެޗުން ޕީއެސްޖީ ވަނީ މޮޅުވެފަ އެވެ. ނިއުކާސަލްގެ ފުރަތަމަ މެޗު ނިމުނީ އެއްވަރުވެގެންނެވެ. ބުދަ ދުވަހުގެ ރޭ މި ދެ ޓީމު ނިއުކާސަލްގެ ދަނޑުގައި ކުޅުނު މެޗު، ނިއުކާސަލް އިން ކާމިޔާބު ކުރީ 4-1 އިންނެވެ.

މެޗުގެ ފުރަތަމަ ހާފުގައި ނިއުކާސަލް އިން ވަނީ ދެ ލަނޑު ޖަހައި ލީޑު ނަގައިފަ އެވެ. މެޗު ފަށައިގެން 17 ވަނަ މިނެޓުގައި ނިއުކާސަލް އަށް ލީޑު ނަގައިދިނީ މިހުއެލް އަލްމިރޮން އެވެ. އޭނާ އެ ލަނޑު ޖެހީ އެލެކްސެންޑާ އިސާކް ތަނަވަސްކޮށްދިން ފުރުސަަތެއްގަ އެވެ. ނިއުކާސަލްގެ ދެ ވަނަ ލަނޑު ޑިފެންޑަރު ޑެން ބާން ޖެހީ 39 ވަނަ މިނެޓުގަ އެވެ. އޭނާ ލަނޑު ޖެހުމަށް ފުރުސަތު ތަނަވަސްކޮށްދިނީ ބްރޫނޯ ގިމާރޭސް އެވެ. ދެ ވަނަ ހާފަށް ނިކުމެ، ފަސް ވަނަ މިނެޓުގައި ނިއުކާސަލް އިން ތިން ވަނަ ލަނޑެއް ޖަހައި، މުޅި މެޗުގެ ކޮންޓްރޯލް ނެގި އެވެ. އެ ޓީމުގެ ތިން ވަނަ ލަނޑު ޖަހައިދިނީ ސީން ލޯންގްސްޓާފް އެވެ. އޭނާ އެ ލަނޑު ޖެހީ ކިއަރެން ޓްރިޕާ ތަނަވަސްކޮށްދިން ފުރުސަތެއްގަ އެވެ. ނިއުކާސަލް ތިން ލަނޑު ޖެހިތާ، ހަ މިނެޓު ފަހުން ޕީއެސްޖީގެ ހަމައެކަނި ލަނޑު ޖަހައިދިނީ ޑިފެންޑަރު ލޫކަސް ހެނާންޑޭޒް އެވެ. އޭނާ އެ ލަނޑު ޖެހީ ވަރެން ޒެއިރް އެމެރީ ތަނަވަސްކޮށްދިން ފުރުސަތެއްގަ އެވެ. ނިއުކާސަލްގެ ހަތަރު ވަނަ ލަނޑު ޑިފެންޑަރު ފަބިއަން ޝާ ޖެހީ މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގެ ތެރޭގަ އެވެ.

މޮޅާއެކު ނިއުކާސަލް ވަނީ ގްރޫޕްގެ އެއް ވަނަ އަށް ޖެހިލައިފަ އެވެ. އެއީ މިހާތަނަށް ކުޅުނު ދެ މެޗުން ހަތަރު ޕޮއިންޓު ހޯދައިގެންނެވެ. ދެ ވަނައިގައި އޮތީ ދެ މެޗުން ތިން ޕޮއިންޓާއެކު ޕީއެސްޖީ އެވެ. މި ގްރޫޕްގައި ބޮރޫޝިއާ ޑޯޓްމަންޑު އަދި އޭސީ މިލާން ބައްދަލު ކުރި މެޗު ނިމުނީ އެއްވެސް ޓީމަކަށް ލަނޑެއް ކާމިޔާބު ނުކުރެވި އެވެ. ދެ މެޗުން ދެ ޕޮއިންޓު ހޯދައިގެން މިލާން ތިން ވަނައިގައި އޮތް އިރު، ފުލުގައި އޮތް ޑޯޓްމަންޑަށް ލިބެނީ އެންމެ ޕޮއިންޓެކެވެ.