ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގައި ނަޕޯލީއާ ދެކޮޅަށް ކުޅުނު މެޗު ރެއާލް މެޑްރިޑުން ކާމިޔާބު ކޮށްފި އެވެ.

އަންގާރަ ދުވަހުގެ ރޭ ނަޕޯލީގެ އަމިއްލަ ދަނޑުގައި ކުޅުނު މެޗު ރެއާލުން ކާމިޔާބު ކުރީ 3-2 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ނަޕޯލީންނެވެ. މެޗުގެ 19 ވަނަ މިނެޓުގައި އެ ޓީމަށް ލީޑު ނަގައިދިނީ ލެއޯ އޮސްޓިގާޑް އެވެ. ނަމަވެސް އޭގެ ފަހުން މެޗުގެ 27 ވަނަ މިނެޓުގައި ބްރެޒިލްގެ ވިނީޝިއަސް ޖޫނިއާ ވަނީ ލަނޑު ޖަހައި ރެއާލަށް ނަތީޖާ ހަމަހަމަ ކޮށްދީފަ އެވެ. އޭނާ އެ ލަނޑު ޖެހީ އިންގްލެންޑުގެ ޒުވާން ކުޅުންތެރިޔާ ޖޫޑް ބެލިންހަމް ތަނަވަސްކޮށްދިން ފުރުސަތެއްގަ އެވެ. ފުރަތަމަ ހާފު ނިމުމުގެ ކުރިން ދެ ވަނަ ލަނޑެއް ޖަހައި ރެއާލުން ފުރަތަމަ ފަހަރަށް ލީޑު ނެގި އެވެ. 34 ވަނަ މިނެޓުގައި އެ ލަނޑު ޖަހައިދިނީ ބެލިންހަމް އެވެ.

ދެ ވަނަ ހާފު ފަށައިގެން ކުރީ ކޮޅު ލިބުނު ޕެނަލްޓީއެއް ކާމިޔާބުކޮށް ނަޕޯލީން ނަތީޖާ ހަމަހަމަ ކުރި އެވެ. ޕެނަލްޓީ ކާމިޔާބުކޮށް އެ ޓީމަށް ނަތީޖާ ހަމަހަމަ ކޮށްދިނީ ޕިއޮޓްރޭ ޒިއެލިންސްކީ އެވެ. ދެ ޓީމުގެ ފަރާތުން ވެސް ވާދަވެރި ކުޅުމެެއް ފެނުނު މެޗު ރެއާލުން ކާމިޔާބު ކުރީ ނަޕޯލީގެ ގޯލް ކީޕަރު  އަލެކްސް މެރެޓް އަތުން ބައި ކޮޅަށް ވަތް ލަނޑުންނެވެ. ނަޕޯލީގެ އޭރިޔާ ބޭރުން ރެއާލްގެ ފެޑެރިކޯ ވަލްވާޑޭ ފޮނުވާލި ބާރު ހަމަލާ ގޯލަށް ވަނީ މަތީ ދަނޑީގައި ޖެހި، މެރެޓްގެ ބޮލުގައި ޖެހިފަ އެވެ.

މޮޅާއެކު ރެއާލް އޮތީ ގްރޫޕް ސީގެ އެއް ވަނައިގަ އެވެ. އެއީ މިހާތަނަށް ކުޅުނު ދެ މެޗުން ވެސް މޮޅުވެ ހަ ޕޮއިންޓު ހޯދައިގެންނެވެ. ދެ ވަނައިގައި އޮތީ ތިން ޕޮއިންޓާއެކު ނަޕޯލީ އެވެ. ތިން ވަނައިގައި އޮތް އެސްސީ ބްރާގާ އަށް ތިން ޕޮއިންޓު ލިބުނު ނަމަވެސް، ލަނޑުން ކުރި ހޯދަނީ ނަޕޯލީ އެވެ. ފުލުގައި އޮތީ ޔޫނިއަން ބާލިން އެވެ.