މާލީ ތަނަވަސްކަން ނެތް ތުއްތު ކުދިންނަށް ޢިލްމު އުނގަންނައިދިނުމަށް ވަޒީފާވެސް ދޫކޮށްލި ހައިތަމްއަކީ ނަމޫނާއެއް!

ޕްރީ ސްކޫލް ޓީޗަރުންނަކީ އެތައް އަހަރަކަށް ދެމިގެންދާ ތަޢުލީމީ ޙަޔާތުގައި ބައްދަލުވާ، އެންމެ އޯގާތެރި އަދި ހިތްވަރު ގަދަ މުދައްރިސުން ކަމާ މެދު ދެބަސްވާނެ މީހަކު މަދުވާނެއެވެ. ތަޢުލީމީ ޙަޔާތުގެ ފުރަތަމަ މަރުޙަލާގައި ދަރިވަރުންގެ ފިޔަވަޅު ތިލަ ސާބިތުކޮށްދިނުމަށް ގަދަ އަޅާ މަސައްކަތް ކުރަމުން ދާ ޕްރީ ސްކޫލް ޓީޗަރުންނަކީ ދެން ތިބި އެހެން އެދުރުންނަށްވެސް ލާމަސީލު މިސާލެކެވެ. އެފަދަ އެކަކީ ފަލަސްޠީނުގެ ޕްރީ ސްކޫލް ޓީޗަރެއް ކަމަށް ވާ ޚައިތަމް އަބޫ އަވާދުއެވެ.

ސަރުކާރުގެ އިތުރުން އަމިއްލަ ފަރާތްތަކުން ހިންގަމުން ދިޔަ ނަރސަރީ ކުލާސްތަކުގައި ކިޔަވައިދިނުމުގެ މަސައްކަތުގައި އޭނާ އަދާ ކުރަމުން ދިޔަ ވަޒީފާ ދޫކޮށް، އަމިއްލަ ގޭގައި އޮންލައިންކޮށް ކިންޑަރގަރޓަން ފިލާވަޅުތައް އުނގަންނައިދިނުމުގެ މަޝްރޫޢު ފެށީ މާތް މަޤްޞަދެއްގައެވެ. ޚައިތަމްގެ އަމާޒަކަށް ވީ، އިންތިހާއަށް އަގު ބޮޑު ޕްރީ ސްކޫލު ފީ ދެއްކުމުގެ މާލީ ތަނަވަސްކަން ނެތް ޢާއިލާތަކުގެ ކުދިންނަށް ޚިދުމަތް ކޮށްދިނުމެވެ. މާލީ ގޮތުން ނިކަމެތި ކަމާ ކުރިމަތިލާން ޖެހިފައި ވާ ކުދިންނަކީ ތަޢުލީމުގެ ނަޞީބުން މަހްރޫމު ވެފައި ވާ ބަޔަކަށް ވެގެން ނުދާނެކަން ކަށަވަރު ކުރުމަށެވެ.

ޚައިތަމްއަކީ ޕްރީ ސްކޫލު ޓީޗިންގްގެ ދާއިރާގައި 13 އަހަރު މަސައްކަތް ކޮށްފައި ވާ ތަޖުރިބާ ކާރު ޓީޗަރެކެވެ. މިއަދު އޮންލައިން ޕްލެޓްފޯމުގައި އޭނާ ހިންގާ ކުލާސްތަކުގައި، ޣައްޒާގެ އެކި ހިސާބުތަކުން 300 އެއްހާ ދަރިވަރުން ދަނީ ބައިވެރި ވަމުންނެވެ. ޚައިތަމްގެ ކުލާސްތަކުގައި ދަރިވަރުން ބައިވެރި ވަމުން ދަނީ، އެ ދަރިވަރުންގެ މައިންބަފައިންގެ މޯބައިލް ފޯނުތައް ބޭނުން ކޮށްގެންނެވެ. ޚައިތަމްގެ ކުލާސްތަކުގައި ބައިވެރިވާ ފަލަސްޠީނުގެ ބައެއް ދަރިވަރުންނަކީ ޢުރުދުން، ކުވައިތު، މިޞްރު އަދި ބެލްޖިއަމް ފަދަ ޤައުމުތަކުގައި ދިރިއުޅޭ ކުދިންނެވެ.

މުޅި ޣައްޒާއަށް ބެލި ކަމުގައި ވީ ނަމަވެސް، އެއްވެސް ވަރެއްގެ ފީ އަކާ ނުލާ ކިޔަވައިދޭ އެއްވެސް ޕްރީ ސްކޫލެއް ނެތެވެ. ޣައްޒާގައި އެވަރޭޖުކޮށް ޕްރީ ސްކޫލު ފީއެއްގެ ގޮތުގައި މަހެއްގެ މައްޗަށް 200 ޝެކްލްސް ނުވަތަ ގާތްގަނޑަކަށް 52.6 ޑޮލަރު ދައްކަން ޖެހެއެވެ. ޚައިތަމްގެ ކުލާސްތަކުގައި ބައިވެރިވާ ދަރިވަރުންގެ މަހު ފީ އަކީ އެންމެ 10 ޝެކްލްސް ނުވަތަ ގާތްގަނޑަކަށް 2.6 ޑޮލަރެވެ.

ހައިތަމްގެ ކުލާސްތަކުގައި ކިޔަވާ ދަރިވަރުންގެ ބެލެނިވެރިންގެ ފަރާތުންވެސް އޭނާއަށް ލިބެނީ ތަޢުރީފުގެ ބަސްތަކެވެ.

އދގެ ތަފާސް ހިސާބުތަކުން ދައްކާ ގޮތުން މުޅި ދުނިޔޭގެ ނިސްބަތުންވެސް ވަޒީފާ ނެތް މީހުންގެ ޢަދަދު އެންމެ ގިނަ މަންޒިލްތަކުގެ ތެރޭގައި ޣައްޒާ ހިމެނެއެވެ. ޣައްޒާގެ އާބާދީގެ 46.6 ޕަސެންޓް މީހުންނަކީ ވަޒީފާއެއް ނުލިބި ތިބި މީހުންނެވެ. ޒުވާނުންގެ މެދުގައިވެސް ވަޒީފާ ނުލިބުމުގެ މައްސަލަ އިންތިހާއަށް ބޮޑެވެ. ޣައްޒާގެ އަބާދީއަށް ބަލާއިރު، 1.3 މިލިއަން މީހުންނަކީ ކާބޯތަކެތީގެ އެހީތެރިކަމަށްވެސް ބޭނުންވެފައި ތިބި މީހުންކަން ފާހަގަ ކުރަން ޖެހެއެވެ. މިފަދަ އެތައް ސަބަބަކާއި ހެދި ބައިނަލްއަޤުވާމީ ޕޯޑިއަމްތަކުގައި ޣައްޒާ ސިފަ ކުރެވިގެން ދަނީ، ދުނިޔޭގައި އޮތް އެންމެ ބޮޑު، އަނގަމަތި ހާ ޖަލުގެ ގޮތުގައެވެ.