ފަހަތުން އަރައި އެތުލެޓިކޯ އިން ކާޑިޒް ބަލިކޮށްފި

ސްޕެނިޝް ލީގުގައި ކާޑިޒްއާ ދެކޮޅަށް ކުޅުނު މެޗު، ފަހަތުން އަރައި އެތުލެޓިކޯ މެޑްރިޑުން ކާމިޔާބު ކޮށްފި އެވެ.

އެތުލެޓިކޯގެ އަމިއްލަ ދަނޑުގައި ކުޅުނު މެޗުގައި ފުރަތަމަ ދެ ލަނޑު ޖަހައި ކުރި ހޯދީ ކާޑިޒް އިންނެވެ. މެޗު ފަށައިގެން 12 ވަނަ މިނެޓުގައި ކާޑިޒް އަށް ލީޑު ނަގައިދިނީ ލޫކަސް ޕައިރެސް އެވެ. އޭނާ އެ ލަނޑު ޖެހީ ކްރިސް ރާމޯސް ތަނަވަސްކޮށްދިން ފުރުސަތެއްގަ އެވެ. އޭގެ ފަހުން މެޗުގެ 27 ވަނަ މިނެޓުގައި އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ރޮޖާ މާޓީ އެވެ. ނަމަވެސް ފުރަތަމަ ހާފު ނިމުމުގެ ކުރިން އެތުލެޓިކޯ އިން ވަނީ ލަނޑެއް ޖަހައި ފަރަގު ކުޑަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ އެންހެލް ކޮރެއާ އެވެ. ދެ ވަނަ ހާފު ފަށައިގެން ފުރަތަމަ މިނެޓުގައި ނަހުއެލް މޮލީނާ ވަނީ ލަނޑު ޖަހައި އެތުލެޓިކޯ އަށް ނަތީޖާ ހަމަހަމަ ކޮށްދީފަ އެވެ. އޭގެ ފަހުން 66 ވަނަ މިނެޓުގައި އެ ޓީމު މޮޅުކޮށްދިން ލަނޑު ޖަހައިދިނީ ކޮރެއާ އެވެ. އޭނާ އެ ލަނޑު ޖެހީ ސައުލް ނިހުއޭޒް ތަނަވަސްކޮށްދިން ފުރުސަތެއްގަ އެވެ.

މޮޅާއެކު އެތުލެޓިކޯ އޮތީ ލީގު ތާވަލްގެ ހަތަރު ވަނައިގަ އެވެ. އެއީ މިހާތަނަށް ކުޅުނު ހަތް މެޗުން 16 ޕޮއިންޓު ހޯދައިގެންނެވެ. ހަތް މެޗުގެ ތެރެއިން އެ ޓީމު ވަނީ ފަސް މެޗުން މޮޅުވެ، އެއް މެޗުން ބަލިވެފަ އެވެ. އަނެއް މެޗުން ވަނީ އެއްވަރުވެފަ އެވެ.