ރައީސްގެ އަމަލުފުޅުން ފެނިވަޑައިގަންނަވަނީ ޑިމޮކްރަސީގެ ނިޒާމު ހަލާކުކޮށްލާ ކުރިއަށް ވަޑައިގަންނަވަން ބޭނުންފުޅުނުވާކަން - މަހްލޫފް

ރައީސް އިބްރާހިމް މުހައްމަދު ޞާލިހުގެ އަމަލުފުޅުން ފެނިވަޑައިގަންނަވަނީ ޑިމޮކްރަސީގެ ނިޒާމު ހަލާކުކޮށްލާ ކުރިއަށް ވަޑައިގަންނަވަން ބޭނުންފުޅުނުވާކަން ކަމަށް ޔޫތް މިނިސްޓަރ އަހުމަދު މަހްލޫފް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ފުޅުދައްކަވަމުން މަހްލޫފް ވިދާޅުވީ އިންތިހާބުގެ ދެވަނަ ބުރަށްފަހު ރައީސް އަމަލުކުރައްވަމުން ގެންދަވަނީ ޑިމޮކްރަޓިކްކޮށް ކަމަށާއި، ވެރިކަން ބަދަލުވުމުގެ މަރުހަލާގެ ކަންކަމަށް އެއްބާރުލުން ދެއްވުމަށް ވަޒީރުންގެ މަޖިލީހުގައި ވެސް އެދިވަޑައިގެންނެވި ކަމަށެވެ.

މަހްލޫފް ވިދާޅުވީ ރިޔާސީ އިންތިހާބުގެ ފުރަތަމަ ބުރުގައި ވަރަށް ބައިވަރު ގޯސްތަކެއް ހެދުނު ކަމަށާއި، ދެވަނަ ބުރަށް އެކަންކަން ވަރަށް ބޮޑަށް ރަނގަޅުކުރެވުނު ކަމަށެވެ. ނަމަވެސް އެންމެ ފުރިހަމަ ގޮތުގައި ނިމިގެންދިޔަ އިންތިހާބެއްގެ ގޮތުގައި ގަބޫލުނުކުރައްވާ ކަމަށެވެ. މަހްލޫފް ވިދާޅުވީ ދެވަނަ ބުރުގައި ކުރެވުނު ކަންކަމަށްވުރެ ފުރިހަމައަށް ކަންތައްތައް ކުރެވޭނެ ކަމަށެވެ. އަދި މިއީ ލިބުނު ފިލާވަޅެއް ކަމަށާއި، އެކަންކަމުން އިބުރަތް ހާސިލުކޮށް، އެ ފިލާވަޅުގެ އަލީގައި ކުރަންޖެހޭ ކަންކަން ރަނގަޅުކޮށް ކުރިއަށްއޮތްތަނުގައި ރަނގަޅުކުރަންޖެހޭ ކަމަށެވެ. މަހްލޫފް ވިދާޅުވީ އިންތިހާބު ނިމިގެން ދިޔައިރުގައި، ވަކި ފަރުދަކަށް އެންމެ ގިނަ ވޯޓު ހޯއްދަވައިގެން ހުންނެވި ރައީސަކީ، ރައީސް ޞާލިހް ކަމަށެވެ.

މަހްލޫފް ވިދާޅުވީ އެންމެ ހިތްގައިމު ކަމަކީ އިންތިހާބަށްފަހު ރައީސް ޞާލިހު ބަލިގަބޫލުފުޅުކުރެއްވުން ކަމަށެވެ. ފަހުގެ ތާރީހުގެ އިންތިހާބުތަކަށް ބަލާލާއިރު، 2018 ވަނަ އަހަރުގެ ރިޔާސީ އިންތިހާބުގައި އެމްޑީޕީއަށް ކާމިޔާބު ލިބުމުން، އެއިރު ޕީޕީއެމަށް އެ އިންތިހާބު ބަލައިގަންނަން ދަތިވި ކަމަށެވެ.

މަހްލޫފް ވިދާޅުވީ އެ މައްސަލަ ސުޕްރީމް ކޯޓަށް ހުށަހެޅިގެން ދިޔަ ކަމަށާއި، ރައީސް ޞާލިހް ޕްރައިމަރީގައި ވާދަކުރައްވައިގެން މޮޅުވެވަޑައިގަތުމުން ވެސް ކޯޓަށް ވަޑައިގެންނެވި ކަމަށާއި، ނަމަވެސް ރައީސް ޞާލިހް ވަރަށް ވާދަވެރި ކެމްޕޭނަކަށްފަހު ލިބިވަޑައިގެންނެވި ނާކާމިޔާބީއާއެކު ވެސް އިންތިހާބީ ރައީސް ޑރ. މުހައްމަދު މުއިއްޒަށް މަރުހަބާ ދަންނަވާ، އެމަނިކުފާނާ ބައްދަލުކުރައްވާފައިވާ ކަމަށެވެ.

މީގެ އިތުރުން ކެބިނެޓާއި ރައީސް ޞާލިހް ބައްދަލުކުރައްވާ ޓްރާންސިޝަނަލް ޕީރިއަޑްގައި ވީހާވެސް ބޮޑު އެއްބާރުލުމާއި އެހީތެރިކަން އަލަށް އިންތިހާބުވި ސަރުކާރަށް ދެއްވުމަށް ރައީސް ވިދާޅުވި ކަމަށެވެ.

ރައްޔިތުންގެ ނިންމުން ގަބޫލުކުރައްވައި، ވެރިކަން ބަދަލުވުމުގެ މަރުޙަލާގައި ޢަމަލުކުރަންޖެހޭ އުޞޫލުތައް ބަޔާންކުރާ ޤާނޫނު ކަމަށްވާ "ވެރިކަން ބަދަލުވުމުގެ މަރުޙަލާގެ ޤާނޫނު" ގައިވާ ގޮތުގެ މަތިން ކުރައްވަންޖެހޭ އެންމެހައި ކަންކަން ކޮށްދެއްވާނެ ކަމަށް ރައީސް ވަނީ ވިދާޅުވެފައެވެ. އަދި ވެރިކަން ބަދަލުވުމުގެ މަރުޙަލާގައި ކުރައްވަންޖެހޭ ކަންކަން، ވީހާވެސް އޮމާންކަމާއެކު ގެންދެވުމަށް މަސައްކަތްޕުޅު ކުރައްވާނެ ކަމަށްވެސް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަނީ ވިދާޅުވެފައެވެ.