ރިޔާސީ އިންތިޚާބުގެ ދެވަނަ ބުރުގައި ކުރި ހޯއްދެވީ ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒެވެ. އެއާއެކު ސެޕްޓެންބަރު މަހުގެ 30 ވީ ހޮނިހިރު ދުވަހުގެ ރޭ އަދި އާދިއްތަ ދުވަސްވެސް ނިމިގެންދިޔައީ ޕީޕީއެމް/ޕީއެންސީގެ ސަޕޯޓަރުންނަށް އުފާފާޅުކުރުމުގެ އެކި ހަރަކާތްތަކާއެކުއެވެ. މި ހަރަކާތްތަކަށް އިތުރު ފޯރިއާއިޖޯޝު ގެނުވީ، ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން ގެކޮޅަށް ބަދަލުކުރުމުންނެވެ.

އާދިއްތަ ދުވަހުގެ މެންދުރުގެ ވަގުތެއްގައި ޔާމީން ގެކޮޅަށް ބަދަލުކުރަން ނިންމުމުން، ގިނަ އަދަދެއްގެ ބަޔަކު ވަނީ ހ. ދޫވެހި ސަރަހައްދަށް އެއްވެފައެވެ. އެ ސަރަހައްދުން ފަށައިގެން އަލިމަސް ކާނިވަލާ ހަމައަށް އަދި ލޮނުޒިޔާރަތް ޕާކުގެ ސެނަހިޔަ ހޮސްޕިޓަލާ ހަމައަށް މީހުން ސަފުހަދައިގެން ތިއްބެވެ. އަދި ޔާމީނާ ސަލާމްކުރަން ގިނަ ބަޔަކު އެއްފަހަރާ މަސައްކަތްކުރުމުގެ ސަބަބުން އެ ސަރަހައްދު އޮތީ ވަރަށް ބޮޑަށް ތޮއްޖެހިފައެވެ. ވާނީވެސް އެހެންތާއެވެ. ގިނަ ދުވަސްތަކަށްފަހު ޔާމީން ގެއަށް ބަދަލުކުރަން ނިންމުމުން ޔާމީންދެކެ ލޯބިވާ ރައްޔިތުން އެމަނިކުފާނު ހަމަލޮލުން ބަލާލައި، ސަލާމްކޮށްލަން ބޭނުންވާނެއެވެ.

އިންތިޚާބުގެ ކާމިޔާބީއަށްފަހު ޕީޕީއެމް/ޕީއެންސީ އެއްވި އެންމެ ފުރަތަމަ އަދި އެންމެ ބޮޑު އެއްވުމަށް މި އެއްވުންވާނެއެވެ. އެހެންކަމުން ގިނަ އަދަދެއްގެ މީޑިއާތަކުންވެސް މި ހަރަކާތް ކަވަރުކުރުމަށް މެންދުރުފަހު 3:00ހާއިރު އެސަރަހައްދަށް ދިޔައެވެ. އޭރު އެސަރަހައްދު އޮތީ ވަރަށް އަމާންކޮށެވެ. ދެފަޅީގައި މީހުންތައް ސަފުތައް ހަދައިގެން ތިއްބެއެވެ. ވީޑިއޯ ކުރުމަށާއި، ފޮޓޯ ނެގުމަށްވެސް ފުރުސަތު ލިބުނެވެ. ހަވީރު 4:00ހާއިރު އެސަރަހައްދަށް އިންތިޚާބީ ރައީސް މުއިއްޒު ވަޑައިގަތެވެ. އެމަނިކުފާނު ވަޑައިގަތުމުން ނޫސްވެރިން އެސަރަހައްދަށް ގޮސް، އެކަމާ ގުޅޭގޮތުން ސުވާލު ދެންނެވުމުން ނޫސްވެރިންނަށް ވަގުތު ދެއްވައި، ނޫސްވެރިންގެ ސުވާލުތަކަށްވެސް ޖަވާބު ދެއްވިއެވެ. އެމަނިކުފާނުގެ އިންޓަވިއު ރަނގަޅަށް ނުނިމެނީސް، ބޮޑު ސްޕީކަރުން ޔާމީން ވަޑައިގަންނަވާކަން އިއުލާންކުރުމަށްފަހު ނޫސްވެރިން ފަހަތަށް ޖެއްސުމަށް ގޮވާލިއެވެ. އެއާއެކު މުއިއްޒުވެސް އިންޓަވިއު ނިންމަވާލެއްވިއެވެ.

އެސަރަހައްދުން އެއްއަރިއަށް ނޫސްވެރިން ޖެހުމުންވެސް ފުލުހުން އައިސް އެންގީ ބެރިކޭޑުގެ ފަހަތަށް ދިއުމަށެވެ. އާއްމުންގެ ތެރެއަށެވެ. ފެނުނު މަންޒަރުތަކުން ބައެއް މީޑިއާތަކަށް ވަރަށް ފުރިހަމައަށް ކަވަރު ކުރުމަށް ފުލުހުން ފުރުސަތު ދިނެވެ. ފުލުހުންގެ ހިމާޔަތުގެ ދަށުން މަންޒަރުތައް ނެގުމަށް ފުރުސަތު ދިން ބައެއް މީޑިއާތަކަކީ ޕީޕީއެމް/ޕީއެންސީ ޕްރޮމޯޓްކުރާ ބައެއް މީޑީއާތަކެވެ.

ގިނަ މީޑީއާތައް ބެރިކޭޓް ފަހަތަށް ޖައްސައި، ފުލުހުންގެ ސަފު އަތުރާލިއެވެ. ފަހަތުގައި ތިބި އާއްމުންގެ މީހުން ނޫސްވެރިންނާއި، ފޮޓޯ ގްރާފަރުންނާއި، ކެމެރާމަނުން ކޮއްޕައި ފިއްތަނީއެވެ. ކުރިމަތީގައި ހުރީ ބެރިކޭޑް ބަހައްޓާފައެވެ. އޭގެ ފަހަތުގައި ފުލުސް މީހާ ހުރީ އަދިވެސް ފަހަތަށް ޖެހުމަށް އަމުރު ހިންގުމުގައެވެ. ނަމަވެސް ހުރިތަނުން އެހެން ދިމާއަކަށް ބޯ އަނބުރާލަން ވެސް ޖާގައެއް ނެތެވެ. މިފަދަ ހާލަތެއްގައިވެސް ކެމެރާމަނުންނާއި، ނޫސްވެރިން އަދި ފޮޓޯގްރާފަރުން މަސައްކަތް ކުރަމުން ދިޔައީ ބެލުންތެރިންނާ ހަމައަށް އެ މައުލޫމާތުތަކާއި މަންޒަރުތައް ގެނެސްދިނުމަށެވެ. ފޮޓޯތަކާއި ވީޑިއޯތައް ނެގުމަށެވެ.

މި ހަރަކާތުގައި އެންމެ މުހިންމު މަންޒަރަކީ ޔާމީން ވަޑައިގަންނަވާ މަންޒަރެވެ. ނަމަވެސް މިމަންޒަރު ރީތިކޮށް ކަވަރުކޮށްލުމުގެ ފުރުސަތު ގިނަ މީޑިއާތަކަށް ނުލިބުމަކީ ވަރަށް ދެރަކަމެކެވެ. މީގެ އިތުރުން އެސަރަހައްދުގައި ތިބި ބައެއް އާއްމުން ވަނީ ބައެއް މީޑީއާތަކަށް ފުރައްސާރަކޮށް މަލާމާތްވެސް ކޮށްފައެވެ. މީޑިއާތަކުގައި މަސައްކަތްކުރާ ނޫސްވެރިން ސިޔާސީ މީހުންގެ ގޮތުގައި ލޭބަލްކޮށް، ހަޑިހުތުރު ބަސްތައް ގޮވުމުން އެމީހުންގެ އަޚުލާގީ ފެންވަރު ހާމަވެއެއްނުންތޯއެވެ. މި ހުރިހާ ދުވަހު އެމީހުންގެ އަޑުވެސް އާއްމު ރައްޔިތުންނާ ހަމައަށް ގެނެސްދިނުމުގައި ބުރަ މަސައްކަތްތައް ކުރީ މީޑިއާއިންކަން ހަނދާން ނެތްކަހަލައެވެ.

އިންތިޚާބުގެ ކުރިން މި މީހުން އެއްވެ ބޭއްވި މުޒާހަރާތަކުގައި ގޮވަމުން ދިޔައީ ޑިމޮކްރަސީގެ ރީތި މިސާލު ދެއްކުމަށެވެ. ދީނާއި ގައުމު އިސްކޮށް، މީޑިއާތަކަށް ފުރުސަތު ދިނުމަށެވެ. ނަމަވެސް އިންތިޚާބުގެ މޮޅާއެކު ބޭއްވި ފުރަތަމަ ހަރަކާތުންވެސް ފެނިގެންދިޔައީ މީޑިއާތަކާމެދު ބޭއްވި ހަރުކަށިކަމާއި ތަފާތު ކުރުންތަކެވެ. ފުލުހުންގެ ރުންކުރުކަމާއި އެމީހުންގެ ބާރެވެ. ނަމަވެސް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރުގައި ނޫސްވެރިންނަށް ވަނީ ފުރިހަމަ މިނިވަންކަން ދީފައެވެ. ބާއްވާ ބޮޑެތި ހަރަކާތްތައް ކަވަރުކުރުމަށް ފުލުހުންގެ ހިމާޔަތާއެކު ހުރިހާ ނޫސްވެރިންނަށް އެފުރުސަތު ލިބެއެވެ. މި ހަރަކާތުން އެކަނިވެސް ތަފާތު މި ވަނީ ފެނިގެން ގޮސްފައެވެ. އަދި އިންތިޚާބީ ރައީސް ހުވައެއް ނުކުރައްވައެވެ. މިހާ އަވަހަށް ބޮޑާކަމާއި ކިބުރުވެރިކަން ދެއްކުމުން، ކުރިއަށް އޮތް ދުވަސްތަކުގައި ކަންކަން ހިނގާނެ ގޮތް ރައްޔިތުން ހިތަށް ތަސައްވުރު ކުރާށެވެ!