"ވެރިކަން ފެއިލްކޮށްލަން އުޅުމަށް ފަހު، އަމިއްލަ ބޭނުމަށް އެމްޑީޕީ ބޭނުން ކުރަން އަންނަން ލަދުގަންނަން ޖެހޭ " -އިބްރާހީމް ވަހީދު
1 އޮކްޓޯބަރު 2023 | އާދީއްތަ 14:00ޗެއަރޕަރސަން އެ މެސެޖު ހިއްސާކުރުމުން ގައުމީ މަޖިލީހުގެ ގިނަ ބޭފުޅުން އެކަމަށް ތާއީދު ނުކުރާކަން ފެންނަން އެބަ އޮތް ކަމަށް އޭނާ ވިދާޅުވި
އެމްޑީޕީގެ ޗެއަރޕަރސަންގެ ނައިބު އަދި ޝަކުވާ ބަލާ ކޮމިޓީގެ މުގައްރިރު އިބްރާހީމް ވަހީދު (އިބުރޭ)
ރާއްޖޭގެ ރައްޔިތުންނާއި އެމްޑީޕީ އަށް ރަނގަޅު ގޮތްތަކެއް ހޯދަމުން ދިޔަ ވެރިކަމެއް ފެއިލްކޮށްލަން މަސައްކަތް ކުރުމަށް ފަހު މިހާ އަވަހަށް އަމިއްލަ ބޭނުމަށް އެމްޑީޕީ ބޭނުން ކުރަން އަންނަން ލަދުގަންނަން ޖެހޭ ކަމަށް އެމްޑީޕީގެ ޗެއަރޕަރސަންގެ ނައިބު އަދި ޝަކުވާ ބަލާ ކޮމިޓީގެ މުގައްރިރު އިބްރާހީމް ވަހީދު (އިބުރޭ) ވިދާޅުވެއްޖެއެވެ. އޭނާމިހެން ވިދާޅުވެފައިވަނީ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަށް މުޚާތަބް ކުރައްވައެވެ.
އެމްޑީޕީ ގައުމީ މަޖިލީހުގެ %50 ތާއީދު އޮތްނަމަ، އެމްޑީޕީއާ ގުޅިވަޑައިގަތުމަށް ތައްޔާރަށް ހުންނެވި ކަމަށް، ކުރީގެ ރައީސް ނަޝީދު ވަނީ ވިދާޅުވެފައެވެ. ރައީސް ނަޝީދު އެފަދައިން ވިދާޅުވީ، އާދިއްތަ ދުވަހު އެމްޑީޕީގެ ޗެއަރޕަރސަން ފައްޔާޒް އިސްމާއީލަށް ފޮނުއްވި މެސެޖެއްގައެވެ. އެކަމާއި ގުޅޭ ގޮތުން ރާއްޖެ އެމްވީން ކުރި ސުވާލަކަށް ޖަވާބުދެއްވަމުން ވަހީދު ވިދާޅުވީ ރައީސް އިބްރާހިމް މުހައްމަދު ޞާލިހާއި ދެކޮޅަށް މަސައްކަތް ކުރުމަށް ފަހު މިހާ އަވަހަށް އަމިއްލަ ބޭނުމަކަށް އަނބުރާ އެމްޑީޕީ އަށް އަލުން ގުޅިވަޑައިގަތުމުގެ ވާހަކަ ދައްކަވަން ކޮންމެވެސް ވަރަކަށް ލަދުވެސް ގަންނަން ޖެހޭ ކަމަށެވެ. އެކަން ކުރައްވަނީ ބަރުލަމާނީ ނިޒާމަށް ވެރިކަން ބަދަލުކުރުމުގެ ބޭނުމުގައި ކަމަށް އޭނާ ވިދާޅުވިއެވެ.
ނަޝީދުގެ އެ މެސެޖާ ގުޅިގެން ޗެއަރޕަރސަންގެ ފަރާތުން އެކަން ވަނީ އެމްޑީޕީގެ ގައުމީ މަޖިލީހުގެ މެމްބަރުންނާ ހިއްސާކުރައްވާފައި ކަމަށް މައުލޫމާތު ލިބެއެވެ. ޗެއަރޕަރސަން އެ މެސެޖު ހިއްސާކުރުމުން ގައުމީ މަޖިލީހުގެ ގިނަ ބޭފުޅުން އެކަމަށް ތާއީދު ނުކުރާކަން ފެންނަން އެބަ އޮތް ކަމަށް އޭނާ ވިދާޅުވިއެވެ. އަދި އެމްޑީޕީގެ ގިނަ ބޭފުޅުން އެކަމަށް ތާއީދު ނުކުރައްވާ ކަމަށް ވެސް އޭނާ ވިދާޅުވިއެވެ. އަދި އެންމެ ބޮޑު މައްސަލަ އަކީ "އިބޫ ނޫން ގޮތެއް ހޯދަން" ކަމަށް ބުނެ އެންމެ ބޮޑަށް އެންޓި ކެމްޕެއިން ކުރެއްވި ބޭފުޅުންނަކީ ނަޝިދާއި އެމަނިކުފާނާއި އެކުގައި މަސައްކަތް ކުރާ ބޭފުޅުންނަށް ވުން ކަމަށް އޭނާ ވިދާޅުވިއެވެ.
އެހެންނަމަވެސް އިންތިޚާބު ނިމުނުތާ 24 ގަޑި އިރު ނުވަނީސް އަލުން އެމްޑީޕީ އާއި ގުޅިވަޑައިގަންނަވާ ވާހަކަ ދައްކަން މާ އަވަސް ކަމަށް ގަބޫލުކުރައްވާ ކަމަށް ވެސް އިބްރާހިމް ވަހީދު ވަނީ ވިދާޅުވެފައެވެ. އެ މައްސަކަތް ކުރަމުން ދަނީ އެމްޑީޕީ ބޭނުންކޮށްގެން ބަރުލަމާނީ ނިޒާމީ ވޯޓުގައި ކުރި ހޯދަން ބޭނުންވާތީ ކަމަށް އޭނާ ވިދާޅުވިއެވެ.
