ޑިމޮކްރެސީގެ އުސޫލުތަކަށް ތަބާވެ ސުލްހަމަސަލަސްކަން ނެގެހެއްޓުމަށް އެޗްއާރްސީއެމުން އިލްތިމާސްކޮށްފި
30 ސެޕްޓެމްބަރު 2023 | ހޮނިހިރު 15:32އައްޑޫ މަރަދޫ ދާއިރާގެ މެންބަރު ޝަރީފާއި، ފޭދޫ ދާއިރާގެ މެންބަރު ނިހާދަށް ހަމަލާދީފައިވޭ
އެޗްއާރުސީއެމް
ޑިމޮކްރެސީގެ ރީތި އުސޫލުތަކަށް ތަބާވެ ސުލްހަމަސަލަސްކަން ނެގެހެއްޓުމަށް އިސްކަން ދިނުމަށް އެޗްއާރްސީއެމުން އިލްތިމާސްކޮށްފިއެވެ.
އެޗްއާރްސީއެމުން ބުނީ ރިޔާސީ އިންތިޚާބުގެ ވޯޓުލުން ނިމި، ވޯޓު ގުނުމުގެ މަސައްކަތް ފަށާފައިވާއިރު، ކެންޑިޑޭޓުންނާއި، ކެންޑިޑޭޓުންގެ މަންދޫބުންނާއި، އޮބްޒަރވަރުންނާއި، ސިޔާސީ ޕާޓީތަކާ، އަދި ކެންޑިޑޭޓުންނަށް ތާއީދުކުރާ އެންމެހާ ރައްޔިތުންވެސް ޑިމޮކްރެސީގެ ރީތި އުސޫލުތައް ދަމަހައްޓަން ޖެހޭ ކަމަށެވެ. އަދި ސުލްހަމަސަލަސްކަން ނެގެހެއްޓުމަށް އިސްކަން ދިނުމަށް އެޗްއާރްސީއެމުން އިލްތިމާސްކޮށްފައިވެއެވެ.
ޑިމޮކްރެސީގެ ރީތި އުސޫލުތަކަށް ތަބާވެ ސުލްހަމަސަލަސްކަން ނެގެހެއްޓުމަށް އިސްކަން ދިނުމަށް އެޗްއާރްސީއެމުން އިލްތިމާސްކޮށްފައިވާއިރު، ހޮނިހިރު ދުވަހު ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެންބަރު އިބްރާހީމް ޝަރީފާއި، ފޭދޫ ދާއިރާގެ މެންބަރު މުހައްމަދު ނިހާދަށް ބަޔަކު ހަމަލާދީ ވަނީ ޒަހަމްކޮށްލާފައެވެ. މި ދެ ހާދިސާ ހިނގި ތަނުގައި ތިބި އާންމު ރައްޔިތުންނަށްވެސް އެކިވަރުގެ ހަމަލާ ދީފައިވާކަން ފާހަގަކޮށް އެޗްއާރްސީއެމުން ވަނީ އެކަން ކުށްވެރިކޮށްފައެވެ.
ސިޔާސީ ދެބަސްވުންތަކުގައްޔާއި ފިކުރު ތަފާތުވާ ހާލަތްތަކުގައިވެސްް އެކަކު އަނެކަކަށް ޖިސްމާނީ އަނިޔާ ދިނުމާއި، އަބުރަށް އަރައިގަތުމާއި، ނަފްރަތުގެ އަމަލުތައް އިސްކުރުމަކީ ކަންބޮޑުވާ ކަމެއް ކަމަށް އެޗްއާރްސީއެމުން ބުނެއެވެ.
