ރައީސް ޞާލިހު ސިޔާސީ މީހުންގެ ފަހަތުން ގޮސް އެމީހުން ހައްޔަރުކޮށް ޖަލަށްލާފައިނުވާކަމަށް މާޒް ސަލީމް ވިދާޅުވި
އުމަރު ނަސީރުގެ ރަނިންގމޭޓް އަހުމަދު ސަލީމް (މާޒް ސަލީމު)
ރިޔާސީ އިންތިޚާބުގައި އަމިއްލަ ގޮތުން ވާދަކުރެއްވި އުމަރު ނަސީރުގެ ރަނިންގމޭޓް އަހުމަދު ސަލީމް (މާޒް ސަލީމު) އިންތިޚާބުގެ ދެވަނަ ބުރުގައި ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހަައްމަދު ޞާލިހަށް ތާއީދުކުރައްވަން ނިންމެވި ސަބަބުތައް ވިދާޅުވެދެއްވައިފިއެވެ.
އެމްޑީޕީން ބުރާސްފަތި ދުވަހުގެ ރޭ ސޯސަން މަގު ޖަގަހަ ކުރިމަތީގައި ކުރިޔަށްގެންދިޔަ ކަންމަތީ ޖަލްސާގައި ވާހަކަފުޅު ދައްކަވަމުން މާޒް ސަލީމު ވިދާޅުވީ އެމްޑީޕީގެ ޕޯޑިއަމްގައި ހުންނަން ޖެހިވަޑައިގެންނެވި ފުރަތަމަ ސަބަބަކީ އަނިޔާވެރިކަމާ ދެކޮޅަށް މަސައްކަތްކުރުންކަމަށެވެ. ރައީސް އަބްދުﷲ ޔާމީންގެ ސަރުކާރުގައި ސިޔާސީ ހުރިހާ ވެރިން ޖަލަށް ލީކަމަށާއި ކިރިޔާވެސް އިދިކޮޅަށް ވާހަކަ ދެއްކި މީހަކުވެސް ގެންގޮސްލީ ޖަލަށްކަމަށް މާޒް ސަލީމް ވިދާޅުވިއެވެ.
ނަމަވެސް މިފަސް އަހަރުގެ ތެރޭގައި ރައީސް ޞާލިހު ސިޔާސީ މީހުންގެ ފަހަތުން ގޮސް އެމީހުން ހައްޔަރުކޮށް ޖަލަށްލާފައިނުވާކަމަށް މާޒް ސަލީމް ވިދާޅުވިއެވެ.
ރައީސް ޞާލިހަށް ތާއީދުކުރަން ނިންމެވި ދެވަނަ ސަބަބަކީ ވެރިކަމުގެ ނިޒާމުގެ ތެރެއަށް ޑްރަގު ގޭންގުތަކުން ހޯރައަޅަމުންދާދިޔުންކަމަށް މާޒް ސަލީމް ވިދާޅުވިއެވެ. އިދިކޮޅު ޕީޕީއެމް/ޕީއެންސީ ސަރުކާރެއް އުފެދިއްޖެނަމަ ޑްރަގުގެ ގޭންގުތަކުން ވެރިކަމުގެ ނިޒާމުގެ ތެރޭގައި ފައި ހިއްޕާލާނެކަމަށާއި އެތަން ފެނިވަޑައިގަންނަވާކަމަށް މާޒް ސަލީމް ވިދާޅުވިއެވެ.
އިދިކޮޅު ކެންޑިޑޭޓާއި ރަނިންގމޭޓް ތަންތަނަށް ވަޑައިގަންނަވާއިރު ފަހަތުގައި ތިބެނީ ކޮންބައެއްތޯ މާޒް ސަލީމް ވަނީ ސުވާލުކުރައްވާފައެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހޯމް މިނިސްޓްރީގެ ޑެޕިއުޓީ މިނިސްޓަރުކަން ކުރެއްވި ސަލީމް ވަނީ ޔާމީން ސަރުކާރުގައި ގޭންގުތަކުގެ ބާރު އޮތް މިންވަރު ހާމަކުރެއްވުމުގެ ގޮތުން އެފަދަ ހާދިސާއެއްވެސް ވިދާޅުވެ ދެއްވާފައެވެ.
މާޒް ސަލީމު އިތުރަށް ވިދާޅުވީ މިސަރުކާރު ދެކެ އިދިކޮޅުން އެންމެ ބިރު ގަންނަ ކަމަކީ ޑްރަގު ހިފައިގެން ރާއްޖެ އަންނަ ބޯޓުފަހަރު އަތުލައިގަންނާތީކަމަށެވެ. ސަރުކާރުން މިސަރަހައްދުގެ ސަލާމަތީ ކަންކަން ބަލަހައްޓާ އެބޯޓުތައް ވަނަނުދީ ޑްރަގު އަތުލައިގަންނަމުންދާކަމަށް މާޒް ސަލީމު ވިދާޅުވިއެވެ. ސަލީމު ވިދާޅުވީ އިދިކޮޅު ޕާޓީ ގޭންގުތަކުން ކޮންޓްރޯލްކުރަމުންދަނީ ޑްރަގު ވިއްކައިގެން ލިބޭ ފައިސާއިން ކަމަށް މައުލޫމާތު ލިބިވަޑައިގަންނަވާފައިވާކަމަށެވެ.
