ހުމާމް މެރުން މަޑުޖައްސައިލުމަށް އދ އިން ސަރުކާރަށް އަންގައިފި
20 ޖުލައި 2017 | ބުރާސްފަތި 16:43ހުމާމްގެ ޙުކުމުގެ މައްސަލަ އދގެ އިންސާނީ ޙައްޤުތަކާއި ބެހޭ ކޮމިޓީން ދަނީ ބަލަމުން
ހުމާމްގެ މަރުގެ ޙުކުމަށް ޝަރުޢީ ހުރިހާ މަރުހަލާއަކުން ވަނީ ތާޢީދުކޮށްފަ
ރައްޔިތުންގެ މަޖިލީހުގެ މެންބަރުކަމުގައި ހުއްޓައި އަނިޔާވެރިގޮތަކަށް މަރާލާފައިވާ ޑރ. އަފްރާޝީމް އަލީގެ މަރުގެ މައްސަލައިގައި މަރަން ޙުކުމް ކޮށްފައިވާ، ހ. ލޮބީ، ޙުސައިން ހުމާމް އަޙުމަދުގެ ޙުކުމް ތަންފީޒުކުރުން މަޑުޖައްސައިލުމަށް އދގެ އިންސާނީ ޙައްޤުތަކާއި ބެހޭ ކޮމިޓީން ދިވެހި ސަރުކާރަށް އަންގައިފިއެވެ.
އދ ގެ ހިއުމަން ރައިޓްސް ޓްރީޓީޒް ބްރާންޗްގެ ވެރިޔާ، އިބްރާހިމް ސަލާމާ ސޮއިކުރައްވައި، ހުމާމްގެ ފަރާތުން އޭނާގެ މައްސަލަ އދގެ ހިއުމަން ރައިޓްސް ކޮމިޝަނަރަށް ހުށަހެޅުއްވި، އދ ގެ ސްޕެޝަލް ރެޕަޓުއަރ، ޑރ. އަޙުމަދު ޝަޙީދަށް ފޮނުއްވި ސިޓީއެއްގައި ވިދާޅުވީ، އދ ގެ ހިއުމަން ރައިޓްސް ކޮމިޓީގެ ރޫލްސް އޮފް ޕްރޮސީޖަރގެ 92 ވަނަ މާއްދާ އާއި ހަވާލާދީ، ހުމާމްގެ ޙުކުމް ތަންފީޒުކުރުން މަޑުޖައްސައިލުމަށް ދިވެހި ސަރުކާރަށް ހަނދާންކޮށްދީފައިވާ ކަމަށެވެ.
އެގޮތުން އދ އިން އަންގާފައިވަނީ އދ ގެ ހިއުމަން ރައިޓްސް ކޮމިޓީއިން ހުމާމްގެ މައްސަލަ ބަލައި ނިމެންދެން އޭނާގެ ޙުކުމް ތަންފީޒުކުރުން މަޑުޖައްސައިލުމަށެވެ.
އދ ގެ އިންސާނީ ޙައްޤުތަކާއި ބެހޭ ކޮމިޓީއަށް އެ މައްސަލަ ހުށަހަޅާފައިވަނީ، އޮޕްޝަނަލް ޕްރޮޓޮކޯލް ޓު ދި ކޮވެނަންޓް އޮން ސިވިލް އެންޑް ޕޮލިޓިކަލް ރައިޓްސްގެ ދަށުންނެވެ.
ޑރ. އަފްރާޝީމްގެ މަރުގެ މައްސަލައިގައި ހުމާމްގެ މައްޗަށް ދައުވާ އުފުލާފައިވަނީ 10 ޖަނަވަރީ 2013 ގައެވެ. މި މައްސަލައިގެ ޝަރީއަތުގައި 2013، ޖަނަވަރީ 20 ވަނަ ދައުވާއަށް އިންކާރު ކުރުމަށްފަހު، 2013، މެއި 22 ވަނަ ދުވަހު ޑރ. އަފްރާޝީމް އަވަހާރަކޮށްލި ކަމަށް ހުމާމް އިޢުތިރާފްވިއެވެ. އަދި އޭގެ ފަހުން، އަނެއްކާވެސް އޭނާ ވަނީ ދައުވާއަށް އިންކާރުކޮށްފައެވެ. މި މައްސަލަ ހުމާމްގެ މައްޗަށް ސާބިތުވާ ކަމަށް ނިންމައި ހުމާމް މެރުމަށް ކްރިމިނަލް ކޯޓުން ޙުކުމް ކުރީ 2014، ޖަނަވަރީ 16 ވަނަ ދުވަހުއެވެ. ކްރިމިނަލް ކޯޓުގެ މި ޙުކުމަށް ހައިކޯޓުން ތާޢީދު ކުރީ 2015، ސެޕްޓެމްބަރ 7 ވަނަ ދުވަހުއެވެ. އަދި ހައިކޯޓުން ތާޢީދު ކުރި ޙުކުމަށް ސުޕްރީމް ކޯޓުން ތާޢީދުކޮށްފައިވަނީ، 2016، ޖޫން 24 ވަނަ ދުވަހުއެވެ.
