އޭޝިޔަން ގޭމްސް: ޤައުމީ ކްރިކެޓް ބީ ޓީމް މޮންގޯލިޔާ އަތުން މޮޅު

އޭޝިޔަން ގޭމްސްގައި ރާއްޖޭގެ ސީނިއަރ ޤައުމީ ކްރިކެޓް "ބީ' ޓީމުން މޮންގޯލިޔާ ބަލިކޮށްފިއެވެ.

ޤައުމީ ކްރިކެޓް ޓީމް އެއް ދުވަސްވަރެއްގައި ދެ މުބާރާތެއްގައި ވާދަކުރަން ޖެހުމުން އޭޝިޔަން ގޭމްސްއަށް ފޮނުވި ބީ ޓީމުން މޮންގޯލިޔާ ބަލިކުރީ ނުވަ ވިކެޓުންނެވެ. މޮންގޯލިޔާގެ ވިހި އޯވަރުގެ ތެރޭގައި ނުވަ ކުޅުންތެރިން ނުބައިވިއިރު ހެދުނީ 60 ލަނޑެވެ. ރާއްޖެއިން ވަނީ 6.4 އޯވަރުގެ ތެރޭގައި އެންމެ ކުޅުންތެރިއަކު ނުބައިވިއިރު 62 ލަނޑު ހަމަކޮށް މެޗު ކާމިޔާބުކޮށްފައެވެ. ރާއްޖޭގެ ޓީމުން އެންމެ ރަނގަޅަށް ކުޅުނު އާޒިން މުހައްމަދު ރަފީގު 16 ބޯޅައިން 24 ލަނޑު ހެދިއެވެ. ހަސަން ހާޒިގު ރަޝީދު 14 ބޯޅައިން 21 ލަނޑު ހެދިއެވެ.

ގްރޫޕް ސްޓޭޖްގައި ރާއްޖެއާއެކު ދެން އޮތީ ނޭޕާލެވެ. މުބާރާތަށް ދިއުމުގެ ކުރިންވެސް ކްރިކެޓް ބޯޑުން ބުނީ މޮންގޯލިޔާ ބަލިކުރެވޭނެކަމަށެވެ. އަދި ރަނގަޅަށް މަސައްކަތްކުރެވިއްޖެ ނަމަ ނޭޕާލްވެސް ބަލިކުރެވިދާނެ ކަމަށެވެ. އެކަމަކު ނޭޕާލްއަކީ ކްރިކެޓްގައި ރަނގަޅު ގައުމެކެވެ. ނޭޕާލުން ވަނީ 273 ލަނޑުން މޮންގޯލިޔާ ބަލިކޮށްފައެވެ.