ފިތުނައިގެ ވާހަކަ ދައްކާ، ފިތުން ފެތުރުން ނޫން އެއްވެސް ކަމެއް އިދިކޮޅުން ނުކުރޭ: ޝާހިދު
ދެވަނަ ހެލިކޮޕްޓަރު ރާއްޖެއަށް ގެނެސްފައިވަނީ، ކުރީގެ ރައީސް އަބްދުﷲ ޔާމީން ވެރިކަމުގައި
ފޮރިން މިނިސްޓަރު އަބްދުﷲ ޝާހިދު
ފިތުނައިގެ ވާހަކަ ދައްކާ، ފިތުން ފެތުރުން ނޫން އެއްވެސް ކަމެއް އިދިކޮޅުން ނުކުރާ ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.
ބުދަ ދުވަހުގެ ރޭ އުފާވެރި އަމާން ރާއްޖެ، ތިނަދޫ ޖަލްސާގައި ވާހަކަފުޅުދައްކަވަމުން ޝާހިދު ވަނީ އިންޑިއާ ސިފައިންނާއި ބެހޭގޮތުން އިދިކޮޅުން ދައްކަމުން ދެންދާ ވާހަކަތަކަށް ރައްދު ދެއްވާފައެވެ.
އެގޮތުން، ޝާހިދު ވިދާޅުވީ، އިންޑިއާ އިން ރާއްޖެއަށް ގެނައި ހެލިކޮޕްޓަރުތަކުގެ ތެރެއިން ފުރަތަމަ ހެލިކޮޕްޓަރު ރާއްޖެއަށް ގެނެސްފައިވަނީ 2011 ވަނަ އަހަރުގައި ކަމަށެވެ. އަދި އޭރު ވެރިކަމުގައި ހުންނެވީ ރައީސް ނަޝީދުކަމަށެވެ.
އަދި ދެވަނަ ހެލިކޮޕްޓަރު ރާއްޖެއަށް ގެނެސްފައިވަނީ، ކުރީގެ ރައީސް އަބްދުﷲ ޔާމީން ވެރިކަމުގައި 2016 ވަނަ އަހަރުކަމަށް ޝާހިދު ވިދާޅުވިއެވެ.
މީގެއިތުރުން ޝާހިދު ވިދާޅުވީ، އެ ސަރުކާރުތަކުން ހިންގާފައިވާ މުޢާމަލާތްތަކަކީ ބައިނަލްއަޤްވާމީ އުސޫލުތަކާއި، ދިވެހިރާއްޖޭގެ ގާނޫނުތަކާއި އެއްގޮތަށް ހިނގާފައިވާ މުޢާމަލާތްތަކެއްކަމަށެވެ. އަދި މިހާރުވެސް ކުއްލި ހާލަތްތަކުގައި އެ ހެލިކޮޕްޓަރުތަކުގައި ރައްޔިތުން އުފުލާ ކަމަށް ޝާހިދު ފާހަގަކުރެއްވިއެވެ.
އޭގެއިތުރުން ޝާހިދު ވިދާޅުވީ، އުތުރު ތިލަފަޅުގައި އިންޑިއާގެ މަރުކަޒެއް ހަދާކަމަށް ބުނެ އިދިކޮޅުން ފަތުރަމުން ގެންދަނީ ދޮގު ވާހަކަތަކެއް ކަމަށެވެ. ޝާހިދު ވިދާޅުވީ، އުތުރު ތިލަފަޅުގެ މަސައްކަތަކީ 2015 ވަނަ އަހަރު ކުރީގެ ރައީސް އަބްދުﷲ ޔާމީންގެ ވެރިކަމުގައި، ދިވެހި ރާއްޖޭގެ ސަފީރާއި އިންޑިއާގެ ޚާރިޖީ ވަޒީރާއެކު ބަދަލުކުރައްވާ، އެއްބަސްވުންތަކަކުން ފެށުނު މަސައްކަތެއްކަމަށެވެ. އަދި އެ އެއްބަސްވުންތަކުގެ ތެރެއިން އެއް އެއްބަސްވުމަކީ، 'ޑިފެންސް އެކްޝަން ޕްލޭން' އެއްބަސްވުންކަމަށް ޝާހިދު ވިދާޅުވިއެވެ. އަދި އެ އެއްބަސްވުމުގައި، އުތުރު ތިލަފަޅުގައި ދިވެހި ސިފައިންނާއި ކޯސްޓް ގާޑަށް ބޭނުންވާ ބަނދަރެއް ހެދުމަށް އޮތްކަމަށާއި، މި ސަރުކާރުން މިހާރު އުތުރު ތިލަފަޅުގައި އަޅަމުން ގެންދަނީ ދިވެހިރާއްޖޭގެ ސިފައިންނާއި ކޯސްޓްގާޑަށް ބޭނުންވާ ބަނދަރެއްކަމަށް ވެސް ޝާހިދު ވިދާޅުވިއެވެ.
އައްޑޫގައި އަޅަމުންގެންދިޔައީ އިންޑިއާގެ އަސްކަރީ ބޭސްއެއް ކަމަށް އިދިކޮޅުން ވާހަަަކަތައް ފެތުރި ނަމަވެސް ޝާހިދު ވަނީ އެ ވާހަކަތައް ވެސް ދޮގުކުރައްވާފައެވެ.
މީގެއިތުރުން ޝާހިދު ވަނީ، ދިވެހި ސަރުކާރުން ރާއްޖޭގެ ކަނޑުގެ ބައެއް ވިއްކާލީކަމަށްބުނެ އިދިކޮޅުން ދައްކަމުންގެންދާ ވާހަކަތަަކަށް ވެސް ރައްދު ދެއްވާފައެވެ.
ޝާހިދު އިތުރަށް ވިދާޅުވީ، އިދިކޮޅުން މަސައްކަތްކުރަނީ، ރައްޔިތުންގެ މެދުގައި ފިތުނައާއި ނަފްރަތާއި ރުޅިވެރިކަމާއި ބިރުވެރިކަމާއި އަނިޔާވެރިކަމާއި ރައްޔިތުންގެ މެދުގައި ހަމަނުޖެހުން އުފައްދަންކަމަށެވެ.
