އިންސާނިއްޔަތާއި ހިލާފު އަނިޔާދިނުމަކީ ކޮށްގެންވާނެކަމެއް ނޫން
ޕީޕީއެމްގެ ވެރިކަމުގައި ކުރި މުޒާހަރާގެ ތެރެއިން އުމުރުން ދުވަސްވީ މީހަކު ހައްޔަރުކުރަނީ
ޕީޕީއެމްގެ ވެރިކަމުގެ އަނިޔާވެރިކަމުގެ ވާހަކަ ދައްކަނީ، އަނެއްކާވެސް އާއިލާތަކުން އެ އަނިޔާވެރިކަން ތަހައްމަލްކުރަން އެދިވަޑައިނުގަންނަވާތީކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
"އުފާވެރި އަމާންރާއްޖެ" ކަންމަތީ ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ ޙަޤީޤަތްތައް ރައްޔިތުންނަށް ހާމަކޮށްދީ އަނޔާވެރިކަމާއި، ބިރުވެރިކަމުގެ ތެރެއަށް ދާން ބޭނުން ނުވާ ސަބަބުތައް ކިޔައިދެއްވަން ޖެހޭ ކަމަށެވެ. އަދި ޕީޕީއެމްގެ ސަރުކާރުގައި އަނިޔާ ލިބިފައިތިބި އެތައް ބައެއް ބުރާސްފަތި ދުވަހުގެ ރޭ ބޭއްވި ކަންމަތީ ޖަލްސާއިންވެސް ފެންނަން ތިބި ކަމަށް ރައީސް ވިދާޅުވިއެވެ.
ރައީސް ވިދާޅުވީ އެއްވެސް އާއިލާއެއްގެ އެއްވެސް މީހަކު ޕީޕީއެމްގެ ވެރިކަމުގެ އެ އަނިޔާވެރިކަން ތަހައްމަލުކުރާތަން ދެކޭކަށް ނޭދޭނެ ކަަމަށެވެ. ސިޔާސީ ކަންތައްތަކުގައި އުޅޭއިރުގައި ބައެއް ފަހަރު ކަންކަން ދިމާވާނެ ކަމަށާއި، އެހެންނަމަވެސް، އިންސާނިއްޔަތާއި ޚިލާފު އަނިޔާ ދިނުމަކީ ކޮށްގެންވާނެކަމެއް ނޫން ކަމަށް ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު އެދިވަޑައިގަންނަވަނީ ހުރިހާ ބޭފުޅުން ނުކުމެވަޑައިގެން ކުރީ ދުވަހަށްވުރެ ބޮޑަށް މަސައްކަތް ކުރެއްވުމަށެވެ. އަދި ރާއްޖޭގެ ތަރައްޤީއަށްޓަކައި ސުލްހައާއި އަމާންކަމަށްޓަކައި މަސައްކަތްކޮށްދެއްވުމަށާއި، އިރާދަކުރެއްވިއްޔާ ހޮނިހިރު ދުވަހު އޮންނަ އިންތިޚާބު ބޮޑުތަނުން ކާމިޔާބުކުރެއްވޭނެކަމަށް ރައީސް ވިދާޅުވިއެވެ.
