ޕީޕީއެމްގެ ސަރުކާރުގައި ލާމަރުކަޒީ ނިޒާމު އެއްކޮށް ހަލާކުކޮށްލާނެ: އިމްރާން
ލާމަރުކަޒީ ނިޒާމު، ލާމަރުކަޒީ ގާނޫނު އެފުށް މިފުށަށް ޖަހާ ސިޓީތައް އުވަލާ އެޓޯލް މިނިސްޓްރީ އެއްގެ ދަށަށް ގެންދާނެކަމަށް އިމްރާން ވިދާޅުވި
ހޯމް މިނިސްޓަރު އަދި އަދާލަތު ޕާޓީގެ ރައީސް އައްޝެއިޚް އިމްރާން އަބްދުﷲ
ޕީޕީއެމްގެ ސަރުކާރެއް އުފެދިއްޖެނަމަ ދައުލަތުގެ މުޅި ނިޒާމު ހަރާބުކޮށްލާނެކަމަށާއި ލާމަރުކަޒީ ނިޒާމު ހަލާކުކޮށްލާނެކަމަށް ހޯމް މިނިސްޓަރު އަދި އަދާލަތު ޕާޓީގެ ރައީސް އައްޝެއިޚް އިމްރާން އަބްދުﷲ ވިދާޅުވެއްޖެއެވެ.
ތިނަދޫގައި ބޭއްވި ޖަލްސާގައި ވާހަކަދައްކަވަމުން އިމްރާން ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަކީ ނިޒާމީ ހަމަތަކުގެ މަތިން މަސައްކަތްކުރައްވާ ބޭފުޅެއްކަމަށެވެ. އަދި ދައުލަތް މިއަދު ހިނގަމުންދަނީ ރައްޔިތުންނަށް ގަބޫލުކުރެވޭ ކިޔަވައިގެން ތިބި ގާބިލު މީހުންނަށްވެސް ގަބޫލުކުރެވޭ ނިޒާމަކާއި ހަމަތަކެއްގެ މަތިންކަމަށެވެ.
އިމްރާން ވިދާޅުވީ އަތޮޅުތައް ހިންގުމަށްޓަކައި ވަކި ތަރުތީބަކުން ވަކި ނިޒާމަކުން ގާނޫނު އިސްލާހުކޮށް ބަދަލު ގެނެސް މިއަދު ތިނަދޫ ސިޓީއަކަށް ހެދުމުން ފަހަތުން އައިސް އިދިކޮޅު ކެންޑިޑޭޓް ވިދާޅުވަނީ އެއަށްވުރެ ބޮޑު ސިޓީއަކަށް ތިނަދޫ ހައްދަވާނެކަމަށެވެ.
އިމްރާން ވިދާޅުވީ ފުރަތަމަ ބުރުގައި ނުކުތް ނަތީޖާއަކީ މާބޮޑަށް އޯވަރ ކޮންފިޑެންސް ވެގެން ނުކުތް ނަތީޖާއެއްކަމަށެވެ. އެކި ރަށްރަށަށް މިސަރުކާރުން ކޮށްދީފައިވާ ކަންކަމާއެކު އެފަދަ ނަތީޖާއެއް ނުކުމެދާނެކަމަށް އެއްވެސް މީހަކަށް ހީކުރެވިފައިނުވާކަމަށެވެ. އެނަތީޖާއެކު ގިނަ ކަންކަން ބަދަލުކޮށްފައިވާކަމަށް ވެސް އިމްރާން ވިދާޅުވިއެވެ.
އިމްރާން ވަނީ ވޯޓުލުމާއި ހަމައަށް މިއޮތް ވަގުތުކޮޅުގެ ތެރޭގައި ކޮންމެ މީހަކަށްވެސް ކުރެވުނު މަސައްކަތެއް ކޮށްގެން އިތުރު ވޯޓު ހޯދުމަށް އެދިވަޑައިގަންނަވާފައެވެ.
