ރައީސް ޞާލިހު އިހުތިޔާރުކުރެއްވި ސަބަބު އަބުޅޯ ކިޔާދެއްވީ ކުރީގައި ލިބިވަޑައިގެންނެވި އަނިޔާތަކުގެ ހަނދާން އައުކުރައްވަމުން
އޭނާ ވިދާޅުވީ އާއިލާ އާ ވަކިން 8 މަސް ދުވަހު ރާއްޖެއިން ބޭރުގައި ހޭދަކުރެއްވިކަމަށާއި އެއީ ހިތްދަތި ދުވަސްތަކެއްކަމަށް
ތިނަދޫ ދެކުނު ދާއިރާ ކުރިން ތަމްސީލުކުރެއްވި މެންބަރު އަބްދުﷲ އަހްމަދު (އަބުޅޯ)
ރައްޔިތުންގެ މަޖިލީހުގައި ތިނަދޫ ދެކުނު ދާއިރާ ކުރިން ތަމްސީލުކުރެއްވި މެންބަރު އަބްދުﷲ އަހްމަދު (އަބުޅޯ) އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދުކުރައްވަން ނިންމެވި ސަބަބުތައް ކުރީގެ ރައީސް އަބްދުﷲ ޔާމީންގެ ސަރުކާރުގައި ލިބިވަޑައިގެންނެވި އަނިޔާތައް ހަނދާން އައު ކުރައްވަމުން ވިދާޅުވެ ދެއްވައިފިއެވެ.
ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ އެޑްވައިޒަރުކަމުގައި ހުންނެވި އަބްދުﷲ އަހުމަދު ވަނީ ރައީސް ޞާލިހަށް ތާއީދުކުރައްވާކަން މީގެކުރިން ހާމަކުރައްވާފައެވެ. ތިނަދޫގައި ބުދަ ދުވަހުގެ ރޭ ކުރިޔަށްދިޔަ ޖަލްސާގައި ވާހަކަފުޅު ފައްޓަވަމުން އޭނާ ވިދާޅުވެދެއްވީ ރައީސް ޞާލިހަށް ތާއީދުކުރައްވަން ނިންމެވި ސަބަބުތަކެވެ.
އަބްދުﷲ ވިދާޅުވީ 2018ގެ ކުރިން އަޑުއިވިގެންދިޔައީ އަނިޔާވެރިކަމުގެ ވާހަކަ ކަމަށެވެ. އެކަން ތަޖުރިބާކުރެއްވި އެއް ބޭފުޅެއްގެ ހައިސިއްޔަތުން ވާހަކަދައްކަވަމުން އެއަނިޔާތައް ހަނދާން އައު ކުރައްވާ އޭނާ ވިދާޅުވީ އާއިލާ އާ ވަކިން 8 މަސް ދުވަހު ރާއްޖެއިން ބޭރުގައި ހޭދަކުރެއްވިކަމަށާއި އެއީ ހިތްދަތިދުވަސްތަކެއްކަމަށެވެ.
މިއަދުވެސް އެހިތްދަތިކަން އާއިލާއިން ތަހައްމަލުކުރަމުންދާކަމަށް އަބްދުﷲ ވިދާޅުވިއެވެ.
އަބްދުﷲ ވިދާޅުވީ އެދުވަސްތައް އަލުން އިއާދަވާން ނޭދޭނަމަ ރައީސް ޞާލިހަށް ދެވަނަ ބުރުގައި ވޯޓުދޭންޖެހޭކަމަށެވެ. ދެވަނަ ދައުރަކަށް ރައީސް ޞާލިހު ކުރިމަތިލައްވައިގެން ހުންނެވީ އުފާވެރި އަމާން ރާއްޖެއެއް ގެނެސް ޖަޒީރާ ތަރައްގީއެއް ގެނެސްދެއްވުމަށްކަމަށެވެ.
