އިންޓަނޭޝަނަލް ޑްރައިވިންގ ލައިސަންސް ހޯދަން ފުރިހަމަ ކުރަން ޖެހޭ ތަމްރީން ޕްރޮގްރާމުގައި ބައިވެރިވާން ޓްރާންސްޕޯޓް މިނިސްޓްރީން ހުޅުވާލައިފިއެވެ.

އެ މިނިސްޓްރީން އަންގާރަ ދުވަހު ބުނެފައިވާ ގޮތުގައި މި ފުރުސަތަކީ އެއްގަމު އުޅަނދު ދުއްވުމަށް މި މިނިސްޓްރީން ދޫކުރާ ލައިސަންސްތައް ބައިނަލްއަޤްވާމީ ގޮތުން ކަނޑައަޅާ މިންގަނޑުތަކަށް ފެއްތުމަށްޓަކައި ކުރެވެމުންދާ މަސައްކަތްތަކުގެ ތެރެއިން ހުޅުވާލާ ފުރުސަތެކެވެ. އެގޮތުން މި ތަމްރީން ޕްރޮގްރާމުގައި ބައިވެރިވާން ބޭނުންވާ ފަރާތްތަކަށް މިހާރު ޓްރާންސްޕޯޓް މިނިސްޓްރީގެ ސިމްސް ޕޯޓަލްhttps://sims.transport.gov.mvމެދުވެރިކޮށް ބައިވެރިވެވޭނެ ކަމަށް ބުންޏެވެ.

މި ތަމްރީން ޕްރޮގްރާމުގައި ބައިވެރިވެވޭނީ އޭ-ޒޯނުގެ ދާއިމީ ލައިސަންސް ލިބިފައިވާ ފަރާތްތަކަށް ކަމަށް ޓްރާންސްޕޯޓް މިނިސްޓްރީން ބުނެއެވެ.

އެ މިނިސްޓްރީން ބުނިގޮތުގައި އިންޓަނޭޝަނަލް ޑްރައިވިންގ ލައިސަންސް ދޫކުރާނީ މިނިސްޓްރީން އެކަށައަޅާ ތަމްރީން ޕްރޮގްރާމެއް ފުރިހަމަކުރާ ފަރާތްތަކުގެ ތެރެއިން ޝަރުތު ފުރިހަމަވާކަމަށް ކަނޑައަޅާ ފަރާތްތަކަށެވެ.

"އިންޓަރނޭޝަނަލް ޑްރައިވިންގ ލައިސަންސް" އަކީ "ވިއެނާ ކޮންވެންޝަން އޮން ރޯޑް ޓްރެފިކް 1968" ގައި ބައިވެރިވެފައިވާ ގައުމުތަކުގައި ގަބޫލުކުރާ ލައިސަންސެކެވެ.