އިއުލާންކުރަނީ މެނިފެސްޓޯގައި ހުރިކަންކަން، ތަފްސީލުކޮށްދެނީ އޮޅުވާލާތީ: ރައީސް

ރިޔާސީ އިންތިޚާބުގެ ކެމްޕެއިން ތެރެއިން ވެވަޑައިގަންނަވާ ވައުދުފުޅުތަކަކީ އެމްޑީޕީން ކުރިޔަށް އޮތް ފަސް އަހަރަށް އެކުލަވާލާފައިވާ މެނިފެސްޓޯގައި ލިޔެފައިވާ ކަންކަންކަމަށާއި އަލުން އެވާހަކަތައް ތަފްސީލުކޮށްދެއްވަނީ ބަޔަކު އޮޅުވާލާ ދޮގު ހަދާތީކަމަށް އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ފުރަތަމަ ބުރުގެ ކެމްޕެއިނާއި ޚިލާފަށް ރައީސް ގެންދަވަނީ މާލޭގައި ހުންނަވައިގެން ޖަލްސާތަކުގައި ކުރިޔަށް އޮތް ފަސް އަހަރަށް އެމްޑީޕީ އާއި ގުޅިފައިވާ ސިޔާސީ ޕާޓީތަކުން އެކުލަވާލާފައިވާ މެނިފެސްޓޯގައި ހުރި ކަންކަން ހާމަކުރައްވަމުންނެވެ. އެގޮތުން އުމުރުން ދުވަސްވީ މީހުންނަށް ދޭ އިނާޔަތް ބޮޑުކުރުމާއި މަސް ގަންނަ އަގު ބޮޑުކުރުމަށް ސަރުކާރުން ނިންމެވިކަން ވަނީ ހާމަކުރައްވާފައެވެ.

Advertisement

މިިކަންކަމާއި ގުޅޭގޮތުން އަންގާރަ ދުވަހުގެ ރޭ ކުރިޔަށްދިޔަ ކަންމަތީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ އެ ވާހަކަފުޅުތަކަކީ މެނިފެސްޓޯގައި ހުރި ކަންކަންކަމަށާއި އެވާހަކަތައް ތަފްސީލުކޮށްދެއްވަން ޖެހިވަޑައިގަންނަވަނީ ބަޔަކު އޮޅުވާލާތީކަމަށެވެ.

ރައީސް މިހެން ވިދާޅުވެފައި މިވަނީ، ރިޔާސީ އިންތިހާބަށް ނުފޫޒު ފޯރުވަން ސަރުކާރުން މަސައްކަތް ކުރަމުންދާ ކަމަށް ބުނެ ހުށަހަޅާފައިވާ ބައެއް މައްސަލަތައް ބަލަމުންދާ ކަމަށް އެންޓި ކޮރަޕްޝަން ކޮމިޝަނުން ބުނެފައިވަނިކޮށެވެ.

މީގެއިތުރުން ރައީސް ވިދާޅުވީ ފުރަތަމަ ބުރަށްފަހު އެކި ދާއިރާތަކުގައި މަސައްކަތްކުރާ މީހުންނާ ބައްދަލުކުރައްވާ އެމީހުންގެ ހުރި ކަންބޮޑުވުންތައް އަޑުއައްސަވާފައިވާކަމަށެވެ. އަދި އެކަންކަމަށް ހައްލު ގެނައުމަށް މަސައްކަތްކުރައްވަމުން ގެންދަވާކަމަށް ރައީސް ވިދާޅުވިއެވެ.

އެގޮތުން އެއަރޕޯޓްގައި މަސައްކަތްކުރާ މުވައްޒަފުންނާ ބައްދަލުކުރެއްވިކަމަށާއި އެއަރޕޯޓްގައި މަސައްކަތްކުރާ ހުރިހާ މުވައްޒަފުންގެވެސް ކަންބޮޑުވުމަކީ ޑޮލަރުން މުސާރަ ނުދިނުންކަމަށާއި އެހެންކަމުން އެކަމަށް ހައްލު ގެނައުމުގެ ގޮތުން މުސާރައިގެ 50 އިންސައްތަ ޑޮލަރުން ދޭން މިހާރު ނިންމަވާފައިވާކަމަށް ރައީސް ވިދާޅުވިއެވެ.

ރައީސް ވިދާޅުވީ ފަތުރުވެރިކަމުގެ ދާއިރާގައި އިސްކޮށް މަސައްކަތްކުރާ ފަރާތްތަކަކާވެސް ބައްދަލުކުރެއްވިކަމަށާއި އެބޭފުޅުންގެ ކަންބޮޑުވުންތައްވެސް އެއްސެވިކަމަށެވެ. އެގޮތުން އެބޭފުޅުންގެ އެދިވަޑައިގަތުމުގެ މަތިން ޓޫރިޒަމް މިނިސްޓްރީގައި ފަތުރުވެރިކަމުގެ ދާއިރާގައި މަސައްކަތްކުރާ ހުރިހާ މުވައްޒަފުން ހިމެނޭނެހެން އެޑްވައިޒަރީ ކޮމިޓީއެއް އުފައްދަވާނެކަމަށް ރައީސް ވިދާޅުވިއެވެ.

މީގެއިތުރުން ރިސޯޓްތަކުގެ މެނޭޖްމަންޓް ލެވެލްގައި ދިވެހިން ތިބޭ މިންވަރު އިތުރުކުރުމަށް ޖެނެރަލް މެނޭޖަރ ލެވެލް އާ ހަމައަށް ސްކޮލަރޝިޕްގެ ފުރުސަތުތައް ފަހިކުރައްވާނެކަމަށް ރައީސް ވިދާޅުވިއެވެ.

ރައީސް ވިދާޅުވީ އެކި ފަރާތްތަކުގެ ކަންބޮޑުވުންތައް އަޑުއައްސަވާ އެކަންކަމަށް ހައްލު ގެނައުމަށް މަސައްކަތްކުރައްވާނެކަމަށެވެ. އަދި ކުރިޔަށް އޮތް ދެވަނަ ބުރުން ފެނިވަޑައިގަންނަވަނީ އުންމީދީ މަންޒަރެއްކަމަށް ރައީސް ވިދާޅުވިއެވެ.