ޔަތީމުޚާނާއަށް ވަދެގެން ދިޔައިރު އަމިއްލަ ނަންވެސް ނޭނގޭ… މިއަދު ޔުނިވަރސިޓީ ދަރިވަރެއް!
26 ސެޕްޓެމްބަރު 2023 | އަންގާރަ 17:48އެ އެންޖީއޯގެ މައިގަނޑު އަމާޒަކީ، ބަޣުދާދުގައި ގެދޮރު ގެއްލިފައިވާ ކުޑަކުދިންނާއި ޔަތީމުންނަށް ބޯހިޔާވަހިކަން ހަމަޖައްސައިދިނުން
ޔަތީމުޚާނާ
އިރާގުގައި ކާރޫބާރޫ ބޮޑު މަގެއްގައި ޖަހާފައިވާ ކިއޮސްކްތަކުގައި އެކި ކަހަލަ އެއްޗެހި ވިއްކުމުގެ މަސައްކަތުގައި އަވަދިނެތި އުޅެމުން ދިޔަ ޒުވާނުންނަށް، އެ ސަރަހައްދަކީ ފަހަރެއްގައިވެސް އައު ސަރަހައްދެއް ނޫނެވެ. އެއީ މީގެ ކުރިން އެމީހުން ދިރިއުޅެމުން ދިޔަ ޔަތީމުޚާނާއާ ޖެހިގެން އޮތް މަގެވެ. އެ ކިއޮސްކްތަކުން ނުލިބޭ އެއްޗެއް ނެތެވެ. ސޭންޑްވިޗުން ފެށިގެންގޮސް އެކި ކަހަލަ ކުރެހުންތައްވެސް ވިއްކައެވެ.
މި މަޝްރޫއަކީ "ބަޣުދާދު ގޭޓް" މަޝްރޫއުގެ ބައެކެވެ. ބަޣުދާދް ގޭޓަކީ، ބަޣުދާދު ވަށައިގެން އޮތް ސަރަހައްދުގައި ޔަތީމުވެފައިވާ ކުދިންނާއި ޔަތީމުޚާނާތަކުގައި ދިރިއުޅެފައި ތިބި ޒުވާނުން، އެމީހުންގެ އަމިއްލަ ފައިމައްޗަށް ތެދުވޭނޭ މަގު ތަނަވަސްކޮށްދިނުމުގެ ގޮތުން ހިންގާ މަޝްރޫއެކެވެ.
މަޝްރޫއު ހިންގުމުގައި އިސްކޮށް ހަރަކާތްތެރިވަނީ އިރާގީ ހޯމް ފައުންޑޭޝަން ފޮރ ކްރިއޭޓިވިޓީ ނަމަކަށް ކިޔާ ޖަމިއްޔާއަކުންނެވެ. އެ ޖަމިއްޔާގެ މެނޭޖަރ، ހިޝާމް އައްޒަހާބީ ވިދާޅުވިގޮތުގައި، މިފަދަ މަޝްރޫއެއް ހިންގުމުގެ މައިގަނޑު މަގުސަދަކީ، ޔަޠީމުޚާނާތަކުން ދަސްވެނިވުމަށްފަހު ވަޒީފާއެއްގެ އިންތިޒާރުގައި މަޑުކުރަން ނުޖެހި، އިޖުތިމާއީ އެހީގެ ޕެންޝަނަށް ބޭނުންނުޖެހޭނެ ގޮތް ހެދުމެވެ.
އިރާގީ ހޯމް ފައުންޑޭޝަން ފޮރ ކްރިއޭޓިވިޓީއަކީ 2004 ވަނަ އަހަރު އުފެއްދި އެންޖީއޯއެކެވެ. އެ އެންޖީއޯގެ މައިގަނޑު އަމާޒަކީ، ބަޣުދާދުގައި ގެދޮރު ގެއްލިފައިވާ ކުޑަކުދިންނާއި ޔަތީމުންނަށް ބޯހިޔާވަހިކަން ހަމަޖައްސައިދިނުމެވެ.
ކިއޮސްކްތަކުގައި ވިޔަފާރި ކުރުމުގެ ފުރުސަތު ލިބުމަކީ އެތައް ޒުވާނުންނެއްގެ ދިރިއުޅުމުގެ އެތައް ހުވަފެނެއްގައި ހަގީގީ ކުލަ ޖެހިގެން ދިޔަ ފަދަ ކަމެކެވެ.
ކިއޮސްކްތަކުގައި ވިޔަފާރިކުރުމުގެ ފުރުސަތު ވެގެން ދިޔައީ، ޔަޠީމުންނަށް އަމިއްލަ ފައިމައްޗަށް ތެދުވުމުގެ ނަސީބު ލިބުމުގެ އިތުރުން، އެމީހުން އުޅުނު ޔަޠީމުޚާނާތަކަށް ވެސް އެހީވާން ލިބުނު ފުރުސަތަކަށެވެ. ކިއޮސްކްތަކުން ލިބޭ އާމްދަނީގެ ބޮޑު ބައެއް ޚަރަދު ކުރަން ޖެހެނީ އެ ވިޔަފާރި ހިންގުމަށް ކަމަށް ވީނަމަވެސް، 10 ޕަސެންޓް ހަދިޔާކުރަނީ ޔަތީމު އަންހެން ކުދިންގެ ތައުލީމީ ފަންޑަށެވެ.
