މާދަމާ ރަށްރަށަށް ވޯޓު ފޮށިތައް ފޮނުވާލާނަން، އޮފިޝަލުން ވަނީ އިތުރުކޮށްފައި - އީސީ
26 ސެޕްޓެމްބަރު 2023 | އަންގާރަ 08:51500 އަށް ވުރެ ގިނަ މީހުން ވޯޓުލާ ވޯޓުފޮށްޓެއް ހުރި ތަނެއް ނަމަ ދެ ސެޓްއަޕް ބަހައްޓާނެ
ރިޔާސީ އިންތިޚާބު 2023ގެ ތެރެއިން
ބުދަ ދުވަހު ރަށްރަށަށް ވޯޓް ފޮށިތައް ފޮނުވާލާނެ ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވީ މިހާރު ވަމުން ދަނީ ރިޔާސީ އިންތިޚާބުގެ ދެވަނަ ބުރަށް ވާން ޖެހޭ ތައްޔާރީތަކުގެ ތެރެއިން އެންމެ ފަހުގެ ތައްޔާރީތައް ކަމަށެވެ. އަދި އިންތިޚާބު އަމާންކަމާއި އޮމާންކަމާއެކު ކުރިއަށް ގެންދިއުމަށް އިތުރު މަސައްކަތްތަކެއް ވެސް ކުރައްވާފައިވާނެ ކަަމަށް އޭނާ ވިދާޅުވިއެވެ.
އެގޮތުން އިންތިޚާބުގެ ފުރަތަމަ ބުރަށް ވުރެ ދެވަނަ ބުރުގައި އޮފިޝަލުން ގިނަ ކުރީ ވެސް އާއްމުންނަށް ފަސޭހަ ކުރުމުގެ ގޮތުން ކަމަށް ފުއާދު ވިދާޅުވިއެވެ. މީގެ އިތުރުން ވޯޓުލާ މަރުކަޒުތަކުގެ ތެރެއިން 500ށް ވުރެ ގިނަ މީހުން ވޯޓުލާ ވޯޓު ފޮށްޓެއް ހުރި ތަނެއް ނަމަ ދެ ސެޓްއަޕް ބަހައްޓާގޮތަށް ހަމަޖައްސާފައިވާ ކަމަށް ފުއާދު ވިދާޅުވިއެވެ.
ކެންޑިޑޭޓުންގެ ވޯޓަރސް ލިސްޓުގައި ސޮއިކުރުމުގެ މަސައްކަތް ވަނީ އަންގާރަ ދުވަހު ކުރިއަށް ގެންގޮސްފައެވެ. ރިޔާސީ އިންތިޚާބުގެ ދެވަނަ ބުރުގައި ވޯޓުލުމުގެ ހައްގު 282،804 މީހަކަށް ލިބިގެންވެއެވެ. އިންތިޚާބުގެ ފުރަތަމަ ބުރުގައި ވޯޓު ދިނުމުގެ ހައްގު ލިބިފައިވަނީ 282،395 މީހަކަށެވެ. އަދި ދެވަނަ ބުރުގައި ރާއްޖެއިން ބޭރުގެ 5 ގައުމެއްގައި ވޯޓު ފޮށި ބެހެއްޓުމަށް ވަނީ ނިންމާފައެވެ. ރިޔާސީ އިންތިޚާބުގެ ދެވަނަ ބުރުގެ ވޯޓުލުމަށް ހަމަޖެހިފައިވަނީ ސެޕްޓެމްބަރު މަހުގެ 30 ވާ ހޮނިހިރު ދުވަހުއެވެ.
