ކަރަންޓް ފުލެޓް ރޭޓަކަށް ހެއްދެވޭނީ ރައްޔިތުންނާއި ދޭތެރޭގައި އިހްލާސްތެރިކަމާ އޯގާތެރިކަމާއެކު ވިސްނަވާ ބޭފުޅަކަށް - ޝަރީފް
ފްލެޓް ރޭޓެއް ކަނޑައެޅުމާއެކީގައި 1000 ޔުނިޓް ބޭނުންކުރިޔަސް އަދި 500 ޔުނިޓް ބޭނުންކުރިއަސް 7 ބޭންޑުވެސް ކަނޑައެޅިގެންދާނީ އެއް ބޭންޑެއްގެ ގޮތުގައި
ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް
ކަރަންޓް ފުލެޓް ރޭޓަކަށް ހެއްދެވޭނީ ރައްޔިތުންނާއި ދޭތެރޭގައި އިހްލާސްތެރިކަމާއި އޯގާތެރިކަމާއެކު ވިސްނަވާ ބޭފުޅަކަށް ކަމަށް ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވީ ފުލެޓް ރޭޓަކީ މިހާތަނަށް ރާއްޖޭގެ އެއްވެސް ރައީސަކު ކަނޑަނާޅުއްވާ ވަރުގެ ރައްޔިތުންނަށް ލުއިފަސޭހަ ސިޔާސަތެއް ކަމަށެވެ. ޝަރީފް ވިދާޅުވީ ރާއްޖޭގައި މީހުން ދިރިއުޅޭ ހުރިހާ ތަނެއްގައި ދިރިއުޅުމަށް ބޭނުންކުރާ ހުރިހާ ތަނެއްގެ ކަރަންޓުގެ ޓެރިފް ރޭޓް ކަނޑައެޅުމަކީ ވަރަށް ހިތްވަރުގަދަ މުހިންމު އަދި ރައްޔިތުންނާއި ދޭތެރޭގައި އިހްލާސްތެރި އޯގާތެރިކަމާއެކު ވިސްނަވާ ބޭފުޅަކަށް މެނުވީ ކަނޑަނޭޅުއްވޭނެ ސިޔާސަތެއް ކަމަށެވެ.
ޝަރީފް ވިދާޅުވީ ފްލެޓް ރޭޓެއް ކަނޑައެޅުމާއެކީގައި 1000 ޔުނިޓް ބޭނުންކުރިޔަސް އަދި 500 ޔުނިޓް ބޭނުންކުރިއަސް 7 ބޭންޑުވެސް ކަނޑައެޅިގެންދާނީ އެއް ބޭންޑެއްގެ ގޮތުގައި ކަމަށެވެ.
ޝަރީފް ވިދާޅުވީ ވަރަށް ކުރިންސުރެވެސް ކަރަންޓް އަގުހެޔޮކުރުމުގެ ވާހަކަ ދެކެވެމުން ގޮސްފައިވާ ކަމަށާއި، އެމްޑީޕީއާއި ގުޅިފައިވާ ސިޔާސީ ޕާޓީތަކުގެ މެނިފެސްޓޯ އެކުލަވާލުމުގައި ޔުޓިލިޓީ ކުންފުނިތަކާއި ގިނަ މަޝްވަރާތަކެއް ކުރެވުނު ކަމަށެވެ.
ޝަރީފް ވިދާޅުވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް އެ ނިންމެވި ނިންމެވުން ނިންމާފައިވަނީ ކުރެވުނު މަޝްވަރާތަކުގެ އަލީގައި ކަމަށެވެ.
މީހުން ދިރިއުޅޭ ހުރިހާ ގެއެއްގައި ކަރަންޓު ކިތަންމެ ގިނައިން ބޭނުންކުރި ނަމަވެސް ކަރަންޓު ފީ ނަގާ ރޭޓު ބޮޑު ނުވާގޮތަށް ފްލެޓު ރޭޓަކުން ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަނީ ނިންމަވާފައެވެ. ރައީސް ވިދާޅުވީ މިބަދަލާއެކު އާއްމު ރައްޔިތުން ދިރިއުޅޭ ގެތަކުން ކަރަންޓު ކިތަންމެ ގިނައިން ބޭނުންކުރި ނަމަވެސް ބިލް ބޮޑުނުވާ ގޮތަށް ކަރަންޓު ރޭޓް ފްލެޓް ރޭޓަކުން ނަގާ ގޮތަށް ހަމަޖައްސަވާނެ ކަމަށެވެ.
