ހޮނިހިރު ދުވަހު ހެނދުނު މާލެ ސަރަހައްދުން ކަރަންޓު ކެނޑުނީ ޓެކްނިކަލް މައްސަލައަކުން، ހުޅުމާލޭގެ އިންޖީނުގެ ނިވިގެންކަން ހާމަވެއްޖެއެވެ.

ހޮނިހިރު ދުވަހު މާލެ އާއި ހުޅުމާލެއިން ކަރަންޓު ގޮސްފައި ވަނީ ހެނދުނު 09:30 ހާއިރެވެ.

ސްޓެލްކޯ ކަރަންޓުގެ ވިއުގަ އަޕްގްރޭޑް ކުރުމުގެ މަސައްކަތަށް ކުރުމަށް ހަމަޖެހިފައިވާތީ 10:00 އިން 10:30 އާއި ދެމެދު ގެ ވަގުތެއްގައި ކަރަންޓު ކެނޑިދާނެ ކަމަށް ވަނީ އިއުލާން ކޮށްފައެވެ. އެހެން ނަމަވެސް ގާތްގަނޑަކަށް 9:30 ހާއިރު ކަރަންޓް ކެނޑުމުން އެންމެ ފުރަތަމަ ގިނަ އާއްމުންނަށް ގަބޫލު ކުރެވުނީ މާލެއިން، ކަރަންޓު ކަނޑަން ކަނޑައެޅި ގަޑިއަށް ވުރެ އަވަހަށް ކަރަންޓް ކެނޑުނީ ކަމަށެވެ. ނަމަވެސް ކަރަންޓް ކެނޑުނީ މާލެ އާއި ހުޅުމާލޭގެ ސަރަހައްދުތަކުން އެއް ފަހަރާއެވެ.

އިތުބާރު ހުރި ފަރާތަކުން ރާއްޖެއެމްވީ އަށް މައުލޫމާތުމުން ހާމަކުރި ގޮތުގައި ހުޅުމާލެ އިން މިހާރު މާލޭގެ ބޮޑު ބަޔަކަށް ކަރަންޓުގެ ޚިދުމަތް ފޯރުކޮށްދެއެވެ. އެހެންކަމުން ހުޅުމާލޭގެ އިންޖީނުގެ ނިވުމުން، މުޅި މާލެ ސަރަހައްދުން ކަރަންޓް ކެނޑުމަށް މެދުފަހިވީކަމަށް ވަނީ މައުލޫމާތު ލިބިފައެވެ.

ސްޓެލްކޯ އިން ބުނެފައި ވަނީ ކަރަންޓުގެ ހިދުމަތް މެދުކެނޑެން ދިމާވި މައްސަލަ ހައްލުކޮށް، ހިދުމަތް މެދުކެނޑުނު މާލެއާއި ހުޅުމާލޭގެ ހުރިހާ ސަރަހައްދަކަށް މިހާރު ވަނީ އަލުން ކަރަންޓު ދެވިފައި ކަމަށެވެ. އަދި ހިދުމަތް ނުލިބޭ އެއްވެސް ކަސްޓަމަރެއްވާނަމަ، ސްޓެލްކޯގެ ހޮޓްލައިން 104 އަށް ގުޅުއްވުމަށް އެދިފައިވެއެވެ.

" ކަރަންޓުގެ ހިދުމަތް މެދުކެނޑެން ދިމާވި މައްސަލަ ހައްލުކޮށް، ހިދުމަތް މެދުކެނޑުނު މާލެއާއި ހުޅުމާލޭގެ ހުރިހާ ސަރަހައްދަކަށް މިހާރު ވަނީ އަލުން ކަރަންޓު ދެވިފައި. ހިދުމަތް ނުލިބޭ އެއްވެސް ކަސްޓަމަރެއް ވާނަމަ، ސްޓެލްކޯގެ ހޮޓްލައިން 104 އަށް ގުޅުއްވުން އެދެން. ދިމާވި ދަތިތަކަށް ހުރިހާ ކަސްޓަމަރުންގެ ކިބައިން މަޢާފަށް އެދެން." ސްޓެލްކޯ އިން ވަނީ މިފަދައިން ބުނެފައެވެ.

މާލެ އާއި ހުޅުމާލެ އަށް ކަރަންޓު ލިބިފައި ވަނީ 2 ގަޑި އިރަށް ވުރެ ގިނަ އިރު ފަހުންނެވެ. މި އާއި އެކު މީގެ ކުރިން ހޮނިހިރު ދުވަހު ހަވީރު މާލޭގެ ބައެއް ސަރަހައްދުތަކުން ކަރަންޓް ކެނޑުމަށް ސްޓެލްކޯ އިން އަންގާފައިވާ އެންގުން ވެސް ވަނީ ބަދަލުކޮށްފައެވެ.

މީގެ ކުރިން މާލޭގެ ކަރަންޓު ކެނޑުމުގެ މައްސްލަ ބޮޑުވެ އެކަން ހައްލު ކުރުމަށް މަސައްކަތް ކުރާ ކަމަށާއި އެކަން ތަކުރާރު ވިޔަ ނުދިނުމަށް ކުރަންޖެހޭ ހުރިހާ ކަމެއް ސަރުކޤރުން ކުރާނެ ކަމަށް ރައީސް ޑރ. މުޙައްމަދު މުޢިއްޒު ވަނީ ވިދާޅުވެފަ އެވެ. 1 ޖޫން 2025 ގައި މުޅި މާލެ، ހުޅުމާލެ އަދި ހުޅުލޭ ހިމެނޭހެން ކަރަންޓު ގޮސްފައިވާ މައްސަލަ ސީރިޔަސް މައްސަލައެއްގއ ގޮތުގައި ބެލުމަށް ކަމާއިބެހޭ ފަރާތްތަކަށް އަންގަވާފައިވާނެ ކަމަށް ރައީސް އޭރު ވިދާޅުވި އެވެ.

އެހެން ނަމަވެސް ހޮނިހިރު ދުވަހު އަނެއްކާވެސް މާލެއާއި ހުޅުމާލޭގެ ބޮޑު ބަޔަކުން ކަރަންޓު ދިއުމުން ރައީސް މުޢިއްޒާ ސަރުކާރަށް އާންމުންގެ ފާޑުކިއުން ވަނީ އަމާޒު ވެފައެވެ.

އެގޮތުން ކުރިން ދިމާވި މައްސަލަ ހައްލު ކުރާނެ ކަމަށް ވިދާޅުވިތާ އެންމެ 2 މަސް ފަހުން އަނެއްކާވެސް މާލެއާއި ހުޅުމާލޭގެ ބޮޑު ސަރަހައްދަކުން ކަރަންޓު ދިއުމަކީ ސަރުކާރުގެ ފައިލިއާރ އެއްކަމަށް ފާޑު ކިޔާ ފަރާތްތަކުން ދަނީ ބުނަމުންނެވެ.