ފުރަތަމަ ބުރުގައި ޝަރުތު ހަމަވެ، ގޯތި ނުލިބުނު މީހުންނަށް އުތުރު ތިލަފަޅުން ގޯތި ލިބޭނެ: ސްޓޭޓް މިނިސްޓަރު އަކްރަމް

ފުރަތަމަ ބުރުގައި ޝަރުތު ހަމަވެ، ގޯތި ނުލިބުނު މީހުންނަށް އުތުރު ތިލަފަޅުން ގޯތި ލިބޭނެ ކަމަށް ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.

އާދިއްތަ ދުވަހު ރާއްޖެޓީވީއަށް އަކްރަމް ވިދާޅުވީ "ބިންވެރިޔާ" ސްކީމުގެ ފުރަތަމަ ބުރުގައި ޝަރުތު ހަމަވިނަމަވެސް، ގޯތި ނުލިބޭ 778 މީހުންނަށް މި ބުރުގައި ގޯތި ދޭނެ ކަމަށެވެ.

އަކްރަމް ވިދާޅުވީ އުތުރު ތިލަފަޅުން 1،250 އަކަފޫޓުގެ 5،098 ގޯތި ކެނޑޭނެ ކަމަށެވެ. ނަމަވެސް، ޖޮއިންޓު ވެގެން ގިނަ ބަޔަކު ކުރިމަތިިލާނަމަ، ގޯތީގެ އަދަދު މަދުވާނެ ކަމަށާއި އެކަމަކު ގޯތި ލިބޭ މީހުންގެ އަދަދު އިތުރުވާނެ ކަމަށެވެ.

ދެވަނަ ފިޔަވަހީގެ ދަށުން ގޯތި ދޫކުރުމަށް ހަމަޖެހިފައިވަނީ، ހައުސިންގ މިނިސްޓްރީން ކުރި އިއުލާނުގައިވާ ގޮތުން، ގިރާވަރު އުތުރުފަޅުންނެވެ. އެއީ، ރައީސް އިބްރާހީމް މުހައްމަދު ސާލިހު އިއުލާނުކުރެއްވި ގޮތަށް، ކޯސްޓްގާޑުގެ ބަނދަރު ތަރައްގީކުރަމުން އަންނަ އުތުރު ތިލަފަޅެވެ. ދެވަނަ ފިޔަވަހީގެ ދަށުން ގޯއްޗަށް ހުޅުވާލިއިރު ގިރާވަރު އުތުރުފަޅުން ގޯތި ދޫކުރާކަމަށް އޮތުމުން ބައެއް މީހުންނަށް އޮޅުންތަކެއް އެރިއެވެ. އަދި އެއީ އުތުރުތިލަފަޅު ނޫންކަމަށްވެސް ހީވިއެވެ. މިކަމާ ގުޅިގެން އަކްރަމް ވިދާޅުވީ، ގޯތި ދޫކުރަނީ ގިރާވަރު އުތުރުފަޅުން ކަމަށްވާއިރު، އެތަން މަޝްހޫރުވެފައި އޮންނަނީ އުތުރުތިލަފަޅުގެ ނަމުން ކަމަށެވެ.

މި ސްކީމުގެ ދަށުން ފްލެޓް ނުވަތަ ގޯއްޗަށް ހުށަހަޅާއިރު މާލޭގައި ދިރިއުޅުނު މުއްދަތު މާނަކުރާ ގޮތް އަކްރަމް ވަނީ ކިޔައިދެއްވާފައެވެ.

"ބިންވެރިޔާ" ސްކީމުގެ ދެވަނަ ފިޔަވަހިން ބަންޑާރަ ގޯތި ދޫކުރުމާއި، "ގެދޮރުވެރިޔާ" ސްކީމުގެ ދެވަނަ ފިޔަވަހިން ފްލެޓަށް އެދި ހުށަހެޅުމަށް ހުޅުވާލާފައިވަނީ "ގެދޮރުވެރިން ޕޯޓަލް"https://gedhoruverin.gov.mvމެދުވެރިކޮށް 2023 ސެޕްޓެންބަރު 24 ވާ އާދީއްތަ ދުވަހުން ފެށިގެން 2023 އޮކްޓޫބަރު 24 ވާ އަންގާރަ ދުވަހުގެ ހަވީރު 3:00ގެ ނިޔަލަށެވެ.

ހައުސިންގ މިނިސްޓްރީން ބުނީ ދެ ސްކީމަށް ޝަރުޠު ހަމަވިނަމަވެސް ޕޯޓަލް މެދުވެރިކޮށް ފޯމު ހުށަހެޅޭނީ އެ މީހަކު ޚިޔާރުކުރާ ކޮންމެވެސް އެއް ސްކީމަކަށް ކަމަށެވެ.

ބޯހިޔާވަހިކަމުގެ މަޝްރޫއުގައި، ދެވަނަ ބުރަށް 6،000 ފްލެޓާއި 4،500އަށްވުރެ ގިނަ ގޯތި ދިނުމަށް ސަރުކާރުން ވަނީ ނިންމާފައެވެ.