އެމްބާޕޭ އަށް ބެލެންޑޯ އެވޯޑު ލިބުން ޙައްޤު: ނާސިރު އެލް ހެއްލާފީ

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ފްރާންސްގެ ޒުވާން ފޯވާޑް ކީލިއަން އެމްބާޕޭ އަށް ބެލެންޑޯ އެވޯޑު ލިބުން ޙައްޤު ކަމަށް އެ ކުލަބުގެ ރައީސް ނާސިރު އެލް ހެއްލާފީ ވިދާޅުވެއްޖެ އެވެ.

ނާސިރު އެލް ހެއްލާފީ މިހެން ވިދާޅުވީ، ޕީއެސްޖީގައި އެމްބާޕޭގެ ކުރިމަގާ ގުޅޭ ގޮތުން ވާހަކަ ދައްކަވަމުންނެވެ. އޭނާ ވިދާޅުވީ، ދުނިޔޭގައި ހުރި އެންމެ މޮޅު ކުޅުންތެރިޔާ ހުރީ ޕީއެސްޖީގައި ކަމަށެވެ. އަދި އެއީ އެމްބާޕޭ ކަމަށް ވެސް އޭނާ ވިދާޅުވި އެވެ. އިތުރަށް އޭނާ ވިދާޅުވީ، އެމްބާޕޭއާ ދެމެދު އޮންނަ ގުޅުން އެއްވެސް އިރަކު ގޯސް ނުވާ ކަމަށެވެ. އޭގެ އިތުރުން އެމްބާޕޭ އާއެކު ކޮންމެ ވަގުތެއްގައި ވެސް މަޝްވަރާ ކުރެވޭ ކަމަށާއި، އެމްބާޕޭ އަކީ ހުރިހާ ގޮތަކަށް ވިސްނާ ކުޅުންތެރިޔެއް ކަމަށް ވެސް އޭނާ ވިދާޅުވި އެވެ. ޕީއެސްޖީގެ އެއްބަސްވުން އައު ކުރުމަށް އެމްބާޕޭ ދެކޮޅު ހެދުމާ ގުޅޭ ގޮތުން ނާސިރު އެލް ހެއްލާފީ ވިދާޅުވީ، ޕީއެސްޖީގައި އެމްބާޕޭ ހުންނާނީ އަބަދު ވެސް ހިތްހަމަ ޖެހިގެން ކަމަށެވެ. އެހެންކަމުން އެމްބާޕޭ ކުލަބު ދޫކޮށް ދާން ޖެހޭ ސަބަބެއް އޮތް ކަމަށް ޤަބޫލު ނުކުރައްވާ ކަމަށް ވެސް ވިދާޅުވި އެވެ.

މީގެ އިތުރުން ނާސިރު އެލް ހެއްލާފީ ވިދާޅުވީ، ފްރާންސް ފުޓުބޯޅަ އިން ދުނިޔޭގެ އެންމެ މޮޅު ކުޅުންތެރިޔާ އަށް ދެމުން އަންނަ ބެލެންޑޯ އެވޯޑު ވެސް އެމްބާޕޭ އަށް ޙައްޤު ކަަމަށެވެ. އެމްބާޕޭ އަކީ އެ އެވޯޑު ލިބޭނެ ފެންވަރުގެ ކުޅުންތެރިޔެއް ކަމަށާއި، ނުލިބޭންވީ ސަބަބެއް ނެތް ކަމަށް އޭނާ ވިދާޅުވި އެވެ. ނާސިރު އެލް ހެއްލާފީ މިހެން ވިދާޅުވެފައިވާއިރު، މިއަހަރުގެ ބެލެންޑޯ އެވޯޑަށް ވާދަކުރާ ކުޅުންތެރިންގެ ނަންތައް ވަނީ ހާމަކޮށްފަ އެވެ. އޭގެ ތެރޭގައި އެމްބާޕޭ ހިމެނެ އެވެ. މިއަހަރުގެ އެވޯޑަށް ވާދަކުރުން އެންމެ ގާތީ އާޖެންޓީނާގެ ކެޕްޓަން ލިއޮނަލް މެސީ، ނޯވޭގެ އާލިން ހާލަންޑް އަދި އެމްބާޕޭ ކަމަށް މީޑިއާ ތަކުން ބުނެ އެވެ.

ޕީއެސްޖީ އާއެކު އެމްބާޕޭ ހަދާފައިވާ އެއްބަސްވުމުގެ މުއްދަތު އަންނަ އަހަރުގެ ޖޫން މަހުގެ ނިޔަލަށް ހަމަވާނެ އެވެ. އެހެންކަމުން ޕީއެސްޖީން ބޭނުންވަނީ އޭނާގެ އެއްބަސްވުން އައު ކުރުމަށެވެ. ނަމަވެސް އެމްބާޕޭ ވަނީ އެކަމާ ދެކޮޅު ހަދައި، އެއްބަސްވުން އައު ކުރަން ބޭނުންނުވާކަން ކުލަބަށް އަންގައިފަ އެވެ. އެއާއެކު ޕީއެސްޖީއާ އެމްބާޕޭއާ ދެމެދު ބޮޑު މައްސަލަ ގަނޑެއް ވެސް ޖެހުނެވެ. ޕީއެސްޖީގެ ފުރަތަމަ ޓީމުން ވެސް އެމްބާޕޭ ވަނީ ބާކީކޮށްފަ އެވެ. ނަމަވެސް އޭގެ ފަހުން ނާސިރު އެލް ހެއްލާފީ އާއި އެމްބާޕޭއާ ދެމެދު ކުރިއަށް ގެންދިޔަ މަޝްވަރާތަކަށްފަހު މައްސަލަ ވަނީ ކޮންމެ ވެސް ވަރަކަށް ފިނިވެފަ އެވެ.