އިތުރު ވަގުތުގައި ރެއާލް މޮޅުކޮށްދިނީ ބެލިންގހަމް

ލަނޑެއް ނުޖެހި އެއްވަރުވާން ދިޔަ މެޗުގެ އިތުރު ވަގުތުގައި ބެލިންގހަމް ލަނޑު ޖަހާ ރެއާލް މެޑްރިޑް މޮޅުކޮށްދީފިއެވެ.

މި ސީޒަންގެ ޗެމްޕިއަންސް ލީގުގައި ރެއާލް މެޑްރިޑް ކުޅުނު ފުރަތަމަ މެޗުގައި ޔޫނިއަން ބާލިންއާ ވާދަކޮށް ލަނޑެއް ނުޖެހި އެއްވަރުވާން ދަނިކޮށް, ބެލިންގހަމް ލަނޑު ޖެހީ މެޗުގެ އިތުރު ވަގުތުގެވެސް ހަތަރު ވަނަ މިނެޓުގައެވެ. މިއީ ޑޯޓްމަންޑް ދޫކޮށް މިސީޒަންގައި ރެއާލްއާ ގުޅުނު އިނގިރޭސި މިޑްފީލްޑަރު ރެއާލްއަށް ޖަހައިދިން ހަވަނަ ގޯލެވެ. މިހާތަނަށް އޭނާ ރެއާލްއަށް ކުޅުނީވެސް ހަ މެޗެވެ. ރެއާލްގެ ލަނޑަށްފަހު ޗެމްޕިއަންސް ލީގުގައި ޔޫނިއަން ބާލިންގެ ފުރަތަމަ މެޗުގައި ނަތީޖާ ބަދަލުކުރާނެ ފުރުޞަތެއް އެޓީމަށް ނުލިބުނެވެ.

މެޗުގައި ކޯޗު އެނެޗެލޮޓީ ބެލިންގހަމް އަށް ދިނީ ނަމްބަރު ދިހައެއްގެ ރޯލެވެ. މި ސީޒަންގެ މިހާތަނަށް ޖޫޑް ބެލިންގހަމްގެ ފަރާތުން ފެންނަނީ އުފެއްދުންތެރި މޮޅު ކުޅުމެކެވެ. ޔޫނިއަން ބާލިންގ އަތުން ރެއާލް މޮޅުކޮށްދިން މެޗަކީ މިސީޒަންގައި ފަހު ދިހަ މިނެޓްގެ ތެރޭގައި ރެއާލް މޮޅުކޮށްދޭން އޭނާ ލަނޑު ޖެހި ތިންވަނަ މެޗެވެ.

ރެއާލް މެޑްރިޑް ހިމެނޭ ގްރޫޕް ސީގެ އެއްވަނާގައި އޮތީ ނަޕޯލީއެވެ. ރެއާލްއާއި ނަޕޯލީވެސް ވަނީ ކުޅުނު ފުރަތަމަ މެޗު ކާމިޔާބުކޮށްފައެވެ. ނަޕޯލީއަށް ކުރިލިބެނީ ޖެހި ގޯލުންނެވެ.