ނިޒާމީ ވޯޓު ފަދަ، ޚިޔާލު ހޯދުމުގެ ވޯޓު ނެގުމުގައި ރައީސުލްޖުމްުހޫރިއްޔާގެ ދައުރެއް ނޯންނާނެކަމަށް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ އަންގާރަ ދުވަހު ވިދާޅުވެފައެވެ.

ރައީސް ނަޝީދު އެގޮތަށް ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ރިޔާސަތުގައި އިންނަވައިގެން ވާހަކަފުޅުދައްކަވަމުންނެވެ. ރާއްޖޭގެ ގާނޫނު އަސާސީގެ 70 ވަނަ މާއްދާގެ ދަށުން މަޖިލީހަށް ލިބިގެންވާ ގާނޫނު ހެދުމުގެ ބާރުގެ ތެރެއިން، ކަމެއް ނިންމުމުގައި ރައްޔިތުންގެ ޚިޔާލު ހޯދުން މުހިންމު ކަމަށް މަޖިލީހަށް ފެންނަ ކަންތައްތަކުގައި ރައްޔިތުން ދެކޭ ގޮތް ބެލުމުގެ ގޮތުން ޚިޔާލު ހޯދުމުގެ ވޯޓު ނެގުމުގެ ވޯޓު ނެގުމުގެ ބާރު މަޖިލީހަށް ލިބިދީފައިވާ ކަމަށެވެ. ޤާނޫނު އަސާސީގެ 70 ވަނަ މާއްދާގެ (ށ)ގައި ވަރަށް ސާފުކޮށް އެކަން އެގެން އޮތް ކަމަށް ނަޝީދު ވަނީ ވިދާޅުވެފައެވެ. ރައްޔިތުންގެ ޚިޔާލު ހޯދަން މަޖިލީހުން ގަރާރެއް ފާސްކޮށްފިނަމަ އެ ގަރާރުގައި ވާގޮތަށް ވޯޓު ނެގުމުގެ ކަންކަން އިލެކްޝަންސް ކޮމިޝަނުން ކުރިއަށް ގެންދަންޖެހޭ ކަމަށެވެ. އެކަމުގައި އެއްވެސް ހާލެއްގައި ރައީސްގެ ދައުރެއް ނެތް ކަަމަށް އެމަނިކުފާނު ވިދާޅުވިއެވެ.

ނަޝީދު ވަނީ، ރައީސަށް އެ ބާރު ލިބެނީ 115 ވަނަ މާއްދާގެ ދަށުންކަމަށްވެސް ވިދާޅުވެފައެވެ. ނަޝީދު އެ ވިދާޅުވި 115 ވަނަ މާއްދާގެ (ޏ)ގައި ރައީސަށް ލިބިދޭ ބާރުތަކާއި މަސްއޫލިއްޔަތުތަކުގެ ތެރެއިން ގައުމީ މުހިންމު މައްސަލަތަކުގައި ރައްޔިތުންނަށް ފެންނަ ގޮތް ބެލުމަށް ރައްޔިތުންގެ ޚިޔާލު ހޯދުމުގެ އާއްމު ވޯޓު ނެގުމުގެ ބާރު ވަނީ ލިބިދީފައެވެ. ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ފުރޮޅާލަން ނިޒާމީ ވޯޓެއް ނަގަން ހުށަހަޅާފައިވާ ގަރާރުގެ ބަހުސް ފެށީ އަންގާރަ ދުވަހުއެވެ. ރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާ ގުޅޭ ގޮތުން ރައްޔިތުން ދެކޭ ގޮތް ބެލުމަށް ރައްޔިތުންގެ ޚިޔާލު ހޯދުމުގެ އާންމު ވޯޓެއް ނެގުމަށް ހުށަހެޅި ގަރާރު ބަލައިގަނެ މުޅި މަޖިލީހުގެ ކޮމިޓީއަށް ފޮނުވުމަށް ވަނީ ފާސްކޮށްފައެވެ.

ނިޒާމީ ވޯޓު ނެގުމުގައި ރައީސްގެ ދައުރެއް ނެތް ކަމަށް ނުވަތަ އެ ފުރުސަތު ނެތް ކަމަށް ބުނުމުގެ ފުރުސަތެއް ނެތެވެ. ގާނޫނު އަސާސީގައި އެ ބާރު ރައީސަށް އެއަށްވުރެ ސާފުކޮށް ވަނީ ލިބިދީފައެވެ. އަދި މި ހުރިހާ ދުވަހުވެސް ނަޝީދާއި ނަޝީދަށް ތާއީދުކުރާ މެމްބަރުން ވެސް ވަކާލާތުކުރެއްވީ ރައީސް މެދުވެރިކޮށް އެކަން ކުރެއްވުމަށެވެ. އެހެންނަމަވެސް މިހާރު މަޖިލީހަށް ލިބިދޭ ބާރުގެ ތެރެއިން އެ މަސައްކަތް ކުރިއަށް ގެންދެވޭނެ ކަަމަށް ވިދާޅުވާން ފަށާފައި ވަނީ، މި ދައުރުގެ ތެރޭގައި އެކަން ނުކުރެވޭނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވި ފަހުންނެވެ.