ސަރުކާރުން ވަނީ ބަޖެޓް ކަނޑައެޅުމުގެ ޤާނޫނާއި ޚިލާފުވެ، ލާމަރުކަޒީ ނިޒާމުގެ ބާރުކަނޑުވާލާފަކަމަށް ދަ ޑިމޮކްރެޓްސް އިން ބުނެފިއެވެ.

2025 ވަނަ އަހަރަށް ސަރުކާރުން އެކުލަވާލި ބަޖެޓާއި ބެހޭ ގޮތުން ކަންބޮޑުވުން ފާޅުކޮށް އެ ޕާޓީން ނެރުނު ބަޔާނެއްގައި ބުނެފައި ވަނީ ޤާނޫނު އަސާސީގައި ދިވެހި ވެރިކަމުގެ އެންމެހާ ބާރުތައް ފެށިގެން އަންނާނީ އަދި ދެމި އޮންނާނީ ރައްޔިތުންގެ ކިބައިގައި ކަމަށް ކަނޑައަޅާފައިވާ ކަމަށެވެ. އަދި އެ ޤާނޫނު އަސާސީގެ 8 ވަނަ ބާބުގައި ރާއްޖެ ހިންގަންވާނީ ލާމަރުކަޒީ އުސޫލުން ކަމަށް ބަޔާންކޮށްފައިވާކަން ފާހަގަކޮށްފައިވެއެވެ. އެހެންކަމުން މި އުސޫލު ހިފެހެއްޓުމާއި ކުރިއެރުވުމަށް އަދި ޑިމޮކްރެޓިކް ހިންގުން އަށަގެންނެވުމާއި ކުރިއެރުވުމަކީ ދައުލަތުގެ ޒިންމާއެއް ކަމަށް އެ ޕާޓީން ވަނީ ބުނެފައެވެ.

އެ ޕާޓީން އިތުރަށް ބުނެފައި ވަނީ ރާއްޖޭގެ އިދާރާތައް ލާމަރުކަޒީ އުސޫލުން ހިންގުމުގެ ޤާނޫނުގަ ކައުންސިލްގެ އިހްތިސާސް ކަނޑައަޅާފައިވާ ކަމަށާއި އޭގެ ތެރޭގައި ރައްޔިތުންނަށް ފޯރުކޮށްދޭން ޖެހޭ ރަށްވެހި ޚިދުމަތްތައް ފޯރުވާ ދިނުމަށް ދައުލަތުގެ ބަޖެޓުގެ ޖުމްލަ އާމްދަނީގެ މަދުވެގެން 5% ކައުންސިލަށް ދޭން ވާނެ ކަމަށް ބަޔާންކުރާ ކަމަށެވެ. އެހެންކަމަށް ވާއިރު ކަނޑައެޅިގެން ލާމަރުކަޒީ ޤާނޫނާއި ޚިލާފަށް ކައުންސިލްތަކަށް ހައްގު ބްލޮކް ގްރާންޓްގެ ބޮޑުބައެއް އުނިކޮށްފައި ވުމަކީ ކަންބޮޑުވުމެއް ކަމަށް އެ ޕާޓީން ބުނެއެވެ. މާލީ ވަޒީރު ޤާނޫނާއި ޚިލާފުވެފައިވާ ކަމަށް އެ ޕާޓީން ވަނީ ބުނެފައެވެ.

ލާމަރުކަޒީ އުސޫލު ކުރިއެރުވުމުގެ ޒިންމާ އަކީ ވަޒީރަކަށް ނުވަތަ ވެރިއަކަށް ނުވަތަ މުއައްސަސާއަކަށް ވިޔަސް އޮތް އިޚްތިޔާރީ ކަމެއް ނޫން ކަމަށް ފާހަގަކޮށް އެ ޕާޓީން ވަނީ ސަރުކާރުގެ އެ އަމަލު ކުށްވެރިކޮށްފައެވެ. ލާމަރުކަޒީ އުސޫލު ކުރިއެރުވުމުގެ ޒިންމާ އަކީ ދުސްތޫރީ ޒިންމާއެއް ކަަމަށް އެ ޕާޓީގެ ބަޔާނުގައި ވަނީ ފާހަގަކޮށްފައެވެ. ހަމައެހެންމެ ޤާނޫނުގައި ވަކި މުއައްސަސާއަކަށް ވަކި ނިސްބަތަކުން ފައިސާ ދިނުމަށް ލާޒިމްކުރުމުން އެ ނޫން ގޮތަކަށް ދައުލަތުގެ ބަޖެޓް އެކުލަވާލުމަކީ ސަރުކާރަށްވެސް އަދި ރައްޔިތުންގެ މަޖިލީހަށް ވެސް އޮތް ބާރެއް ނޫންކަން އެ ބަޔާނުގައި ވަނީ ފާހަގަކޮށްފައެވެ. އެއީ ކަނޑައެޅިގެން ޤާނޫނާއި ޚިލާފުވުން ކަމަސާއި އެ އަމަލު ނުކުރުމަށް އިލްތިމާސްކުރާ ކަމަށް އެ ޕާޓީން ވަނީ ބުނެފައެވެ. އެ ބަޔާނުގައި ޤާނޫނީ އިމަށް ރުޖޫއަ ވުމަށް މާލީ ވަޒީރާއި ސަރުކާރަށް ދަ ޑިމޮކްރެޓްސް އިން ވަނީ ގޮވާލާފައެވެ.

އަންނަ އަހަރުގެ ބަޖެޓަކީ 56,647,600,859 (ފަންސާސް ހަ ބިލިޔަން، ހަސަތޭކަ ސާޅީސް ހަތް މިލިޔަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ. ބަޖެޓް ހުށަހަޅުއްވަމުން ފިނޭންސް މިނިސްޓަރު ޒަމީރު ވިދާޅުވީ ހަރަދުގެ ގޮތުގައި ހިނގާނީ 49.2 ބިލިޔަން ރުފިޔާއެވެ. އޭގެތެރޭގައި ހިމެނެނީ ރިކަރަންޓް ހަރަދުގެ ގޮތުގައި 35.9 ބިލިޔަން ރުފިޔާއާއި ކެޕިޓަލް ހަރަދުގެ ގޮތުގައި 13.3 ބިލިޔަން ރުފިޔާއެވެ. ބަޖެޓުގައި ދައުލަތުގެ އާމްދަނީގެ ގޮތުގައި ލަފާކޮށްފައި ވަނީ 34,955,459,058 (34 ބިލިއަން) ރުފިޔާއެވެ.

2025 ވަނަ އަހަރުގެ ބަޖެޓުގައި ކައުންސިލްތަކަށް ދިނުމަށް ޖަހާފައި 1,447,316,071 (1.4 ބިލިއަން) ރުފިޔާއެވެ. ނަމަވެސް އާމްދަނީގެ 5 އިންސައްތައަކީ 1،747،772،952 (1.7 ބިލިއަން) ރުފިޔާއެވެ.