އިންތިޚާބީ ކޮރަޕްޝަނުގެ 32 މައްސަލަ، ސިޔާސީ ޕާޓީތަކުން 3 މައްސަލަ ހުށަހަޅާފައިވޭ: އޭސީސީ
އިލެކްޝަންސް ކޮމިޝަނުގެ އިޚްތިސާސްތެރޭގައި ނުހިމެނޭ 4 މައްސަލައެއް މިހާތަނަށް އެ ކޮމިޝަނުން އޭސީސީއަށް ފޮނުވާފައިވޭ
ރިޔާސީ އިންތިޚާބު 2023
ރިޔާސީ އިންތިޚާބާއި ގުޅިގެން އިންތިޚާބީ ކޮރަޕްޝަނުގެ މައްސަލަތަކުގެ ގޮތުގައި ހޯމަ ދުވަހާ ހަމައަށް ޖުމްލަ 32 މައްސަލަ/ޝަކުވާ ހުށަހަޅާފައިވާކަމަށް އެންޓި ކޮރަޕްޝަން ކޮމިޝަން (އޭސީސީ)ން ބުނެފިއެވެ.
އެ ކޮމިޝަނުން ބުނީ، ރިޔާސީ އިންތިޚާބާ ގުޅިގެން މިހާތަނަށް ސީދާ ސިޔާސީ ޕާޓީތަކުން އޭސީސީއަށް ހުށަހަޅާފައިވަނީ 3 މައްސަލަ ކަމަށެވެ. ރިޔާސީ އިންތިޚާބާ ގުޅިގެން ގައުމީ ކޮމްޕްލެއިންސް ބިއުރޯއަށް ހުށަހަޅާފައިވާ، އިލެކްޝަންސް ކޮމިޝަނުގެ އިޚްތިސާސްތެރޭގައި ނުހިމެނޭ 4 މައްސަލައެއް މިހާތަނަށް އިލެކްޝަންސް ކޮމިޝަނުން އޭސީސީއަށް ފޮނުވާފައިވެއެވެ. އެނޫން އެއްވެސް މައްސަލައެއް ނުވަތަ ޝަކުވާއެއް، އިންތިޚާބީ ރިޝްވަތާ ގުޅޭގޮތުން އަދި އިންތިޚާބާ ގުޅިގެން ދައުލަތުގެ ވަސީލަތްތައް ބޭނުންކުރުމާ ގުޅޭގޮތުން، ނުވަތަ އެހެން ފަރާތަކުން އީސީއަށް ހުށަހަޅާފައިވާ ހުށަހެޅުމަކާ ގުޅިގެން ނަމަވެސް އިލެކްޝަންސް ކޮމިޝަނުން އެ ކޮމިޝަނަށް ފޮނުވާފައި ނުވާކަމަށް އޭސީސީން ބުނެއެވެ.
އޭސީސީން މީގެކުރިން ބުނެފައިވަނީ ހުށަހަޅާފައިވާ މައްސަލަތަކުގެ ތެރެއިން 7 މައްސަލައެއް ތަހުގީގުކުރަންޖެހޭ ކަމަށް ފެންނާތީ އެ މައްސަލަތަކުގެ ތަހުގީގު މިހާރުވަނީ ފަށާފައި ކަމަށެވެ.
އޭގެތެރޭގައި ދައުލަތުގެ މުދަލާއި ވަސީލަތްތައް ނަހަމަގޮތުގައި ބޭނުންކުރުމާއި، ރިޝްވަތާ ގުޅުންހުރި މައްސަލަ ހިމެނޭކަމަށް އޭސީސީން މައުލޫމާތު ދެއެވެ. މީގެ އިތުރުން ކޮމިޝަނަށް ހުށަހެޅި އަދި ބަލަމުންގެންދާ މައްސަލަތަކުގެ ތެރޭގައި؛ ހުޅުމާލެއިން ގޯތި ދޫކުރި ގޮތާއި ގުރުއަތުލުން ކުރިއަށްގެންދިޔަ ގޮތާގުޅޭ މައްސަލައެއްވެސް ކޮމިޝަނުން ދަނީ ބަލަމުންނެވެ.
އަދި މި މައްސަލަތަކާ ގުޅިގެން އަޅަންޖެހޭ ފިޔަވަޅުތައް ކޮމިޝަނުން އަޅަމުންދާކަމަށާއި، ބައެއް ފިޔަވަޅުތައް އެޅޭނީ ބައެއް ކަންކަން ދެނެގަނެ ކަށަވަރުކުރެވިގެން ކަމުގައިވާތީ، ކަމާގުޅޭ އިތުރު މައުލޫމާތު ހޯދުމުގެ މަސައްކަތް މިހާރު ކުރަމުންދާކަމަށްވެސް ކޮމިޝަނުން ވަނީ މީގެކުރިން ބުނެފައެވެ.
