ޗައިނާ އާއި ރާއްޖޭގެ ގުޅުން ހީނަރުވާގޮތަށް ޚަބަރު ނުފަތުރަން އެ ޤައުމުން ގޮވާލައިފި
17 ސެޕްޓެމްބަރު 2023 | އާދީއްތަ 05:20އެއްވެސް ޤައުމެއްގެ ދާޚިލީ ކަމެއްގެ ތެރެއަށް ޗައިނާއިން ނުވަންނާނެ
ޗައިނާ އެމްބަސީ
ޗައިނާ އާއި ރާއްޖެއާ ދެމެދު އޮތް ގުޅުން ހީނަރުވާގޮތަށް ޚަބަރު ނުފެތުރުމަށް އެ ޤައުމުން ގޮވާލައިފިއެވެ.
ޗައިނާ އެމްބަސީން އާދީއްތަ ދުވަހު ނެރުނު ބަޔާނެއްގައި ބުނީ ރާއްޖޭގެ ބައެއް މީޑިއާތަކުން އެ ޤައުމަށް އަމާޒުކޮށް ދޮގު ޚަބަރުތައް ފަތުރަމުންދާކަން ފާހަގަކުރެވިފައިވާ ކަމަށެވެ. މިފަދަ ޚަބަރުތައް ފަތުރަނީ ރާއްޖެއާއި ޗައިނާއާ ދެމެދު އޮތް ގާތްގުޅުން ހީނަރުކޮށްލުމުގެ ބޭނުމުގައި ކަމަށް ވެސް ވަނީ ބުނެފައެވެ.
އެހެން ޤައުމުތަކުގެ ދާޚިލީ ކަންކަމުގެ ތެރެއަށް ނުވަނުމަކީ ޗައިނާއިން އަބަދުވެސް ގެންގުޅޭ ޕޮލިސީއެއްކަން ފާހަގަކޮށް ޗައިނާ އެމްބަސީން ބުނީ އެ ޤައުމުން ރާއްޖެއަށް ކޮށްދީފައިވާ ކަންކަމަކީ އިގްތިސާދީ ގޮތުންނާއި އިޖުތިމާއީ ގޮތުން ތަރައްގީކުރުމަށް އެހީވުން ކަމަށެވެ.
ރާއްޖެ އާއި ޗައިނާގެ ގުޅުން ހީނަރުވާގޮތަށް ދައްކާ މިފަދަ ވާހަކަތަކުގެ ސަބަބުން ޗައިނާއާމެދު ދިވެހިންގެ މެދުގައި ނަފުރަތު ނުއުފެދޭނެ ކަމަށް ގަބޫލުކުރާ ކަމަށާއި ދެ ޤައުމުގެ ގުޅުން ހީނަރު ކުރުމަށް ކުރާ މަސައްކަތް ނާކާމިޔާބު ވާނެ ކަމަށް ވެސް އެ ޤައުމުގެ އެމްބަސީން ނެރުނު ބަޔާނުގައި ވަނީ ބުނެފައެވެ.
