އިޓާލިއަން ލީގުގައި ލާޒިއޯއާ ދެކޮޅަށް ކުޅުނު މެޗުން މޮޅުވެ، ޔުވެންޓަސް އިން ލީގު ތާވަލްގެ ދެ ވަނަ އަށް ޖެހިލައިފި އެވެ.
ހޮނިހިރު ދުވަހުގެ ރޭ ޔުވެންޓަސްގެ އަމިއްލަ ދަނޑު، އަލިއާންޒް ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާފުގައި ޔުވެންޓަސް އިން ދެ ލަނޑުގެ ލީޑެއް ނެގި އެވެ. ދެ ވަނަ ހާފުގައި ލާޒިއޯ އިން ލަނޑެއް ޖަހައި ފަރަގު ކުޑަކުރި ނަމަވެސް، ޔުވެންޓަސް އިން ތިން ވަނަ ލަނޑެއް ޖެހި އެވެ.
މެޗު ފަށައިގެން 10 ވަނަ މިނެޓުގައި ޔުވެންޓަސް އަށް ލީޑު ނަގައިދިނީ ޑޫސަން ވްލަހޮވިޗް އެވެ. އޭނާ އެ ލަނޑު ޖެހީ މެނުއަލް ލޮކަޓެލީ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން 26 ވަނަ މިނެޓުގައި ޔުވެންޓަސްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ފެޑެރިކޯ ޗިއެސާ އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ އެޑްރިއެން ރާބިއޮޓް އެވެ. ދެ ވަނަ ހާފުގެ ކުރީ ކޮޅު ލާޒިއޯގެ ހަމައެކަނި ލަނޑު ޖަހައިދިނީ ލުއިސް އަލްބާޓޯ އެވެ. އެއީ ޑައިޗީ ކަމަޑާ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން މެޗުގެ 67 ވަނަ މިނެޓުގައި ޔުވެންޓަސްގެ ތިން ވަނަ ލަނޑު ޖެހީ ވްލަހޮވިޗް އެވެ.
މޮޅާއެކު ޔުވެންޓަސް ދެ ވަނަ އަށް ޖެހިލީ މިހާތަނަށް ކުޅުނު ހަތަރު މެޗުން 10 ޕޮއިންޓު ހޯދައިގެންނެވެ. ހަތަރު މެޗުން ތިން ޕޮއިންޓާއެކު ލާޒިއޯ އޮތީ 15 ވަނައިގަ އެވެ.
