އެމެރިކާގައި މިހާރު ކުރިއަށްދާ ފީފާ ކުލަބު ވާރލްޑް ކަޕްގެ ގުރޫޕް ޖީގައި ވައިދާޑް ކަސަބްލަންކާއާ ދެކޮޅަށް ކުޅުނު މެޗުން ވެސް މޮޅުވެ، ޔުވެންޓަސް އިން ދެ ވަނަ މޮޅު ވެސް ހޯދައިފި އެވެ.

މުބާރާތުގައި ޔުވެންޓަސްގެ ފުރަތަމަ މެޗުގައި އެ ޓީމުން ވަނީ އަލް އަައިން އަތުން ވެސް މޮޅުވެފަ އެވެ. ކަސަބްލަންކާގެ ފުރަތަމަ މެޗުގައި އެ ޓީމު ވަނީ މެންޗެސްޓަރ ސިޓީ އަތުން ބަލިވެފަ އެވެ.

އާދީއްތަ ދުވަހުގެ ރޭ ކަސަބްލަންކާއާ ދެކޮޅަށް ކުޅުނު މެޗު ޔުވެންޓަސް އިން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ޔުވެންޓަސް އިން ދެ ލަނޑު ޖެހިއިރު، ކަސަބްލަންކާ އިން ވަނީ އެއް ލަނޑު ޖަހައިފަ އެވެ. މެޗުގައި ޔުވެންޓަސްގެ އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން ހަ ވަނަ މިނެޓުގައި ޔުވެންޓަސް އަށް ލީޑު ލިބުނީ ކަސަބްލަންކާގެ ޑިފެންޑަރު ބަޓޮލީ އަތުން ބައި ކޮޅަށް ވަތް ލަނޑުންނެވެ. އޭގެ ފަހުން މެޗުގެ 16 ވަނަ މިނެޓުގައި ކެނާން ޔިލްޑިޒް ވަނީ ޔުވެންޓަސްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އަންޑްރިއާ ކަމްބިއާސޯ އެވެ.

މެޗުގައި ކަސަބްލަންކާގެ ހަަމައެކަނި ލަނޑު އެ ޓީމުން ޖެހީ ފުރަތަމަ ހާފުގެ 25 ވަނަ މިނެޓުގަ އެވެ. އެ ލަނޑު ޖެހީ ތެމްބިންކޮސީ ލޯކް އެވެ. އޭނާ އެ ލަނޑު ޖެހީ ނޯޑިން އަމްރަބަތު ތަނަވަސްކޮށްދިން ފުރުސަތެއްގަ އެވެ.

މެޗުގެ ދެ ވަނަ ހާފުގައި ޔުވެންޓަސްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ ޔިލްޑިޒް އެވެ. އޭނާ އެ ލަނޑު ޖެހީ ރަންޑަލް ކޯލޯ މުއާނީ ތަނަވަސްކޮށްދިން ފުރުސަތެއްގަ އެވެ.

މެޗުގައި ޔުވެންޓަސްގެ ހަތަރު ވަނަ ލަނޑު ޖެހީ ޑޫސަން ވްލަހޮވިޗް އެވެ. އެއީ ޔުވެންޓަސް އަށް ލިބުނު ޕެނަލްޓީ އެއް ކާމިޔާބު ކޮށްގެން އޭނާ ޖެހި ލަނޑެކެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މޮޅާއެކު ޔުވެންޓަސް އެއް ވަނައިގައި އޮތީ މިހާތަނަށް އެ ޓީމު ކުޅެފައިވާ ދެ މެޗުން ވެސް މޮޅުވެ ހަ ޕޮއިންޓާ އެކު އެވެ. ގުރޫޕް ސްޓޭޖުގެ ފަހު މެޗުގައި ޔުވެންޓަސް ނިކުންނާނީ މެންޗެސްޓަރ ސިޓީއާ ދެކޮޅަށެވެ.