އިޓާލިއަން ލީގުގެ ފަހު މެޗުގައި ކަލަގިއާރީއާ ދެކޮޅަށް ކުޅުނު މެޗުން މޮޅުވެ ނަޕޯލީ އިން އިޓާލިއަން ލީގުގެ ޗެމްޕިއަންކަން ހޯދައިފި އެވެ.

ހުކުރު ދުވަހުގެ ރޭ ލީގުގެ ފަހު މެޗަށް ނިކުތްއިރު، ނަޕޯލީ އަދި އިންޓަރ މިލާނަށް ވެސް ލީގު ކާމިޔާބު ކުރުމުގެ ފުރުސަތު އޮތެވެ.

ފަހު މެޗުން މޮޅުވެ ލީގު ކާމިޔާބު ކުރުމުގެ ފުރުސަތު ނަޕޯލީ އަށް އޮތްއިރު، އިންޓަރ މިލާނަށް އެ ފުރުސަތު އޮތީ ނަޕޯލީ މޮޅު ނުވެއްޖެ ނަމަ އެވެ.

ކަލަގިއާރީއާ ދެކޮޅަށް ކުޅުނު މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، ނަޕޯލީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ސްކޮޓް މެކްޓޮމިނޭ އެވެ.

އޭގެ ފަހުން މެޗުގެ ދެ ވަނަ ހާފު ފަށައިގެން ހަ ވަނަ މިނެޓުގައި ނަޕޯލީ އިން ވަނީ ދެ ވަނަ ލަނޑެއް ވެސް ޖަހައި މެޗުގެ ލީޑު ފުޅާ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ރޮމެލޫ ލުކާކޫ އެވެ.

މޮޅާއެކު ނަޕޯލީ އިން ލީގު ޗެމްޕިއަންކަން ހޯދީ ކުޅުނު 38 މެޗުން 82 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް އިންޓަރ މިލާނަށް ލިބެނީ 81 ޕޮއިންޓެވެ.

މިއީ ނަޕޯލީ އިން އިޓާލިއަން ލީގު ކާމިޔާބު ކުރި ހަތަރު ވަނަ ފަހަރެވެ. މީގެ ކުރިން އެ ޓީމު ވަނީ 1986/1987, 1989/1990 އަދި 2022/2023 ގައި ވެސް އިޓާލިއަން ލީގު ކާމިޔާބު ކޮށްފަ އެވެ.

ނަޕޯލީގެ މި ކާމިޔާބާ އެކު އެ ޓީމުގެ ކޯޗު އެންޓޯނިއޯ ކޮންޓޭ ވެގެން ގޮސްފައި ވަނީ ތިން ކުލަބަކާ އެކު އިޓާލިއަން ލީގު ކާމިޔާބު ކުރި ފުރަތަމަ ކޯޗަށެވެ. މީގެ ކުރިން އޭނާ ވަނީ ޔުވެންޓަސް އަދި އިންޓަރ މިލާނާ އެކު ވެސް އިޓާލިއަން ލީގު ކާމިޔާބު ކޮށްފަ އެވެ.