ހާފް ޓައިމުގައި ރަނގަޅަށް ރާވާލައިފިން، ބަދަލުތަކެއް ގެނެސް ބުންވަރު ހުރި މީހުން ނެރެ މެޗް ކާމިޔާބުކުރާނަން: ރައީސް
ދެވަނަ ބުރު ކުޅޭނެ ގޮތް އިންތިޒާމު ކޮށްލައިފިކަމަށާއި ބައެއް މަގާމުތަކަށް ކުޅޭ މީހުން ބަދަލުވެސް ކޮށްފިންކަމަށް ރައީސް ވިދާޅުވި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ނިކުމެ މިތިބީ މެޗަކަށް ކަމަށާއި މިމެޗުގެ ފުރަތަމަ ހާފު ނިމުނުނަމަވެސް އެއީ މުޅި މެޗް ނިމުން ނޫންކަމަށް ރައީސުލްޖުމްހޫރިއްޔާ އަދި އެމްޑީޕީގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ސޯސަން ޖަގަހައިގައި ކުރިޔަށްގެންދިޔަ ބައްދަލުވުމުގައި ސަޕޯޓަރުންނާ ބައްދަލުކުރައްވާ ވާހަކަދައްކަވަމުން ރައީސްގެ ވާހަކަފުޅު ފެއްޓެވީ އެމްޑީޕީ އުފެއްދުމުގައި އިސްކޮށް އުޅުނު ފަރާތްތައް އެތަނުން ފެނިގެންދިޔުމަކީ ލިބިވަޑައިގަންނަވާ އުފާފުޅެއްކަމަށް ވިދާޅުވެއެވެ. އެއާއެކު އެމްޑީޕީގެ ރޫހާއި ޖޯޝާއި އަޒުމު އެތައް ގުނައަކަށް އިތުރުވެގެންގޮސްފިކަމަށް ރައީސް ވިދާޅުވިއެވެ.
އެހެން އެކަން ވެގެންދިޔައީ ފުރަތަމަ ބުރުގައި ނިކުތް ނަތީޖާ އާއެކު އަނެއްކާވެސް މާޒީގައި ފެނިގެންދިޔަ އަނިޔާވެރިކަމަށް ދާން ބޭނުންނުވާތީކަމަށް ރައީސް ވިދާޅުވިއެވެ.
ސަޕޯޓަރުންނަށް ހިތްވަރު ދެއްވަމުން ރައީސް ވިދާޅުވީ މެޗްގެ ފުރަތަމަ ހާފް ނިމިއްޖެކަމަށާއި ބައެއް ފަހަރު ފުރަތަމަ ހާފުގައި ތިން ލަނޑު އެއް ލަނޑުން، ހަތަރު ލަނޑު އެއް ލަނޑުން ބަލިވެ, އަނެއް ބަޔަކު މޮޅުވާކަމަށެވެ. އެގޮތުން މިހާރު އެމްޑީޕީގެ ކޯލިޝަން މިއޮތީ ތިނެއް އެކެއްގެ ތަފާތެއްގައި ކަމަށް ރައީސް ވިދާޅުވިއެވެ.
ނަމަވެސް ދެވަނަ ހާފުގައި ނިކުމެ މޮޅުވާނެކަމަށާއި ހާފް ޓައިމުގައި ޗޭންޖިންގ ރޫމަށް ވަދެ ކަންކަން ރާވާލާފައިވާކަމަށް ރައީސް ވިދާޅުވިއެވެ.
ރައީސް ވިދާޅުވީ ސެޕްޓެމްބަރ މަހުގެ 9 ވަނަ ދުވަހު އޮތް ފުރަތަމަ ބުރުގައި ގޯސްތަކެއް ހެދިފައިވާކަމަށެވެ. ވޯޓުލުމުގައި ފަރުވާކުޑަކުރެވިފައިވާކަމަށާއި ފުރަތަމަ ހާފް ގެއްލިގެންދިޔައީ އެކަމުގެ ސަބަބުންކަމަށެވެ. އެހެންކަމުން ފުރަތަމަ ކުރަންވީ ކަމަކީ ރީރަޖިސްޓްރޭޝަނަށް ހުޅުވާލާފައިވާ ފުރުސަތުގައި އެކަން ރަނގަޅަށް ކުރުންކަމަށް ރައީސް ވިދަޅުވިއެވެ.
އެއަށްފަހު މީހުން ކައިރިއަށް ޑޯޓުޑޯއަށް ޓީމުތައް ހަދައިގެން ނިކުންނަންޖެހޭކަމަށް ރައީސް ވިދާޅުވިއެވެ.
ރައީސް ވަނީ އިދިކޮޅު ކެންޑިޑޭޓް މިހާރުވަމުންދާ ވައުދުތަކަށް ފާޑުވިދާޅުވެފައެވެ. އެގޮތުން ގައުމު ބަނގުރޫޓްވެފައިވާކަމަށް ބުނެ މިހާރު ވައުދުވަމުންދަނީ ބައެއް މުއައްސަސާތަކުގެ މުސާރަ ދެގުނަ ކޮށް ކުލި ކުޑަކުރުމުގެ ވާހަކަ ކަމަށް ރައީސް ވިދާޅުވިއެވެ.
އެއީ އެއްވެސް ޕްލޭނެއް ރޭވުމެއްނެތި ވަމުންދާ ވައުދުތަކެއްކަމަށާއި މަގްސަދަކީ ރައްޔިތުންނަށް އޮޅުވާލައިގެން އަނެއްކާވެސް އިންތިޚާބު ކާމިޔާބުކޮށް ރާއްޖޭގައި ބިރުވެރިކަމާއި ނާމާންކަން ފެތުރުންކަމަށް ރައީސް ވިދާޅުވިއެވެ.
