ފީފާ އެވޯޑުގައި ވެސް މެސީ އާއި ހާލަންޑުގެ ވާދަވެރިކަން
ފީފާ އިން ހޮވާ އަހަރުގެ އެންމެ މޮޅު ފިރިހެން ކުޅުންތެރިޔާގެ އެވޯޑަށް 12 ކުޅުންތެރިން ވާދަކުރޭ
ފީފާ ބެސްޓް އެވޯޑާއެކު މެސީ
ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ހޮވާ އަހަރުގެ މޮޅު ކުޅުންތެރިޔާގެ އެވޯޑަށް ވާދަކުރާ ކުޅުންތެރިންގެ ނަން ހާމަކޮށްފި އެވެ.
ފީފާ އިން ހޮވާ އަހަރުގެ އެންމެ މޮޅު ފިރިހެން ކުޅުންތެރިޔާގެ އެވޯޑަށް ވާދަކުރާ 12 ކުޅުންތެރިންނަކީ، އާޖެންޓީނާގެ ކެޕްޓަން ލިއޮނަލް މެސީ، ނޯވޭގެ އާލިން ހާލަންޑް، އާޖެންޓީނާގެ ހޫލިއަން އަލްވާރޭޒް، ފްރާންސްގެ ކީލިއަން އެމްބާޕޭ، ބެލްޖިއަމްގެ ކެވިން ޑި ބްރެނާ، ކްރޮއޭޝިއާގެ މާސެލޯ ބްރޮޒޮވިޗް، ޖޯޖިއާގެ ކްވިޗާ ކްވަރަޝްކޭލިއާ، ޖަރުމަނުގެ އިލްކާއީ ގުންޑޮގާން، ނައިޖީރިއާގެ ވިކްޓާ އޮސިމްހެން، ސްޕެއިންގެ ރޮޑްރީ، އިންގްލެންޑުގެ ޑިކްލަން ރައިސް އަދި ޕޯޗުގަލްގެ ބެނާޑޯ ސިލްވާ އެވެ.
މީގެ ތެރެއިން މި އެވޯޑުގެ ވާދަވެރިކަން އެންމެ ބޮޑުވާނީ އާޖެންޓީނާގެ މެސީ އަދި ނޯވޭގެ ހާލަންޑާ ދެމެދު ކަމަށް މީޑިއާތަކުން ބުނެ އެވެ. މެސީ ވަނީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް އާޖެންޓީނާ އާއެކު ކާމިޔާބު ކޮށްފަ އެވެ. އެ މުބާރާތުގައި އޭނާގެ ފަރާތުން މޮޅު ކުޅުމެއް ފެނުނުއިރު، މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ވެސް އޭނާ އެވެ. މީގެ އިތުރުން ކުރީގެ ކުލަބު، ޕެރިސް ސެއިންޓް ޖާމަން (ޕީއެސްޖީ) އާއެކު މެސީ ވަނީ ފްރާންސް ލީގު ކާމިޔާބުކޮށްފަ އެވެ.
މީގެ އިތުރުން ހާލަންޑު ވަނީ ސިޓީ އާއެކު ތިން ތައްޓެއް ކާމިޔާބުކޮށްފަ އެވެ. އެއީ އިނގިރޭސި ޕްރިމިއާ ލީގު، ޔުއެފާ ޗެމްޕިއަންސް ލީގު އަދި އެފްއޭ ކަޕް އެވެ. ހާލަންޑު ވަނީ ޕްރިމިއާ ލީގުގެ އެންމެ މޮޅު ކުޅުންތެރިޔާގެ މަގާމު އަދި ޔުއެފާ އިން ހޮވާ އެންމެ މޮޅު ކުޅުންތެރިޔާގެ މަގާމު ވެސް ހޯދައިފަ އެވެ. ސިޓީގައި އޭނާ ވަނީ އާދަޔާ ޚިލާފު މޮޅު ކުޅުމެއް ދައްކައިފަ އެވެ.
ފީފާ އެވޯޑުގެ އިތުރުން ފްރާންސް ފުޓުބޯޅައިން ދުނިޔޭގެ މޮޅު ކުޅުންތެރިޔާ އަށް ދެމުން އަންނަ ބެލެންޑޯ އެވޯޑަށް ވެސް މި ދެ ކުޅުންތެރިން ވާދަކުރެ އެވެ.
