މާކޯ ވެރާޓީ، އަލް އަރަބީ އަށް ސޮއިކޮށްފި

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އައި އިޓަލީގެ މިޑްފީލްޑަރު މާކޯ ވެރާޓީ، ޤަތަރު ސްޓާސް ލީގުގެ އަލް އަރަބީ އަށް ސޮއިކޮށްފި އެވެ.

އުމުރުން 30 އަހަރުގެ ކުޅުންތެރިޔާ އަލް އަރަބީ އާއެކު ސޮއިކޮށްފައި ވަނީ ތިން އަހަރު ދުވަހުގެ އެއްބަސްވުމެއްގަ އެވެ. އެހެންކަމުން، 2026 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބަށް ކުޅޭނެ އެވެ. ވެރާޓީ ހޯދުމަށް އަލް އަރަބީން ވަނީ 45 މިލިއަން ޔޫރޯގެ އަދަދެއް ޕީއެސްޖީ އަށް ދައްކައިފަ އެވެ. އަލް އަރަބީގެ ކުޅުންތެރިޔެއްގެ ގޮތުގައި މިހާރު ވެރާޓީ ދައްކާލާފައިވާއިރު، އެ ކުލަބުގައި އޭނާ ބޭނުންކުރާނީ 7 ނަންބަރު ޖާޒީ އެވެ.

ޕީއެސްޖީގެ އެއްބަސްވުން މިދިޔަ އަހަރުގެ ޑިސެމްބަރު މަހުގެ ތެރޭގައި ވެރާޓީ އައު ކުރި އެވެ. ހަތަރު އަހަރު ދުވަހަށް އައު ކުރި އެ އެއްބަސްވުމުގެ މުއްދަތު ހަމަވާން އޮތީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގައި ބާކީ ތިން އަހަރު އޮއްވާ، ޕީއެސްޖީން ވެރާޓީ ދޫކޮށްލަން އެއްބަސްވީ ކުޅުންތެރިޔާ އެގޮތް ބޭނުންވެގެންނެވެ. އޭގެ ކުރިން އަލް އަރަބީ އާއި ޕީއެސްޖީއާ ދެމެދު ވަނީ ދިގު މަޝްވަރާތަކެއް ކުރިއަށް ގެންގޮސްފަ އެވެ.

ވެރާޓީ ޕީއެސްޖީ އަށް ބަދަލުވީ 2012 ވަނަ އަހަރު އެވެ. އޭގެ ފަހުން އެ ކުލަބުގައި ހޭދަކުރި 11 ސީޒަންގެ ތެރޭގައި ވެރާޓީ ވަނީ ޕީއެސްޖީ އަށް 416 މެޗު ކުޅެދީ، 11 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ 30 ތައްޓެއް ކާމިޔާބުކޮށްފަ އެވެ. އޭނާ ވަނީ ޕީއެސްޖީ އާއެކު އެންމެ ގިނައިން ފްރާންސް ލީގު ކާމިޔާބު ކުރި ކުޅުންތެރިޔާ އެވެ. ވެރާޓީ އަންނަނީ 2012 ވަނަ އަހަރުން ފެށިގެން އިޓަލީ ޤައުމީ ޓީމަށް ވެސް ކުޅެމުންނެވެ. މިހާތަަނަށް ޤައުމީ ޓީމަށް ކުޅެދިން 55 މެޗުގައި އޭނާ ވަނީ ތިން ލަނޑު ޖަހައިފަ އެވެ. އިޓަލީ އާއެކު ވެރާޓީ ވަނީ 2020 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބުކޮށްފަ އެވެ.