ފައިޙުގެ މައްޗަށް ކުރާ ދައުވާތަކަށް އިންކާރުކޮށްފި، މައްސަލަ މަދަނީ މިންގަނޑުން ކުރިއަށް ގެންދެވޭނެ
މިހާރު އޭނާ ހުރީ ޝަރީއަތް ނިމެންދެން ބަންދުކޮށްފައި
ސ. މަރަދޫފޭދޫ / ރަށްދެބައިގެ، އިބްރާހީމް ފައިހް ނިޒާމް
މާރާމާރީގެ މައްސަލައަކާއި ގުޅިގެން ފުލުހުން ހޯދަން އިއުލާނު ކުރިތާ މަސް ދުވަސް ފަހުން އަމިއްލައަށް ފުލުހުންނާއި ހަވާލުވި ސ. މަރަދޫފޭދޫ / ރަށްދެބައިގެ، އިބްރާހީމް ފައިހް ނިޒާމްގެ މައްޗަށް ކުރާ ދައުވާގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
14 ޖަނަވަރީ 2023 ދުވަހު ކެފޭ ޑި ޕަބްލިކްގައި ހިންގި މާރާމާރީގެ މައްސަލައިގައި 21 މާރިޗު 2023 ދުވަހު އިބްރާހީމް ފައިޙް ނިޒާމު ހައްޔަރުކޮށް، އޭނާގެ މައްޗަށް ދައުވާކުރުމަށް 19 އެޕްރީލް 2023 ގައި ކްރިމިނަލް ކޯޓަށް ވަނީ ހުށަހަޅާފައެވެ.
މި މައްސަލައިގައި އެންމެ ފަހުން ބޭއްވި އަޑުއެހުމުގައި ވަނީ ދައުވާ ހުށައަޅާފައެވެ. ވުމާއެކު، ބުދަ ދުވަހު ގާޒީ ވަނީ ދައުވާއަށް ޖަވާބުދާރީވުމަށް ދަންނަވާފައެވެ.
އޭނާގެ މައްޗަށް އުފުލާފައިވަނީ ޤާނޫނު ތަންފީޒުކުރާ މުވައްޒަފެއްގެ މަަސައްކަތަށް ގަސްތުގައި ހުރަސް އެޅުމުގެ ކުށުގެ ދައުވާއާއި، ގައިގާ އަތްލުމުގެ ކުށުގެ ދައުވާގެ އިތުރުން، ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމުގެ ކުށުގެ ދައުވާއެވެ.
ދައުވާއަށް ޖަވާބުދާރީވަމުން އޭނާގެ ވަކީލު ވިދާޅުވީ، އޭނާގެ މައްޗަށް ހުށައެޅިފައިވާ ހުރިހާ ދައުވާއަކަށްވެސް އިންކާރު ކުރާ ކަމަށެވެ.
މީހަކާ މާރާމާރީ ހިންގުމުގެ އިތުރުން، އެތަނުގައި ތިބި ފުލުހެއްގެ ގައިގައި ޖެހިކަމުގެ ތުހުމަތުވެސް އޭނާގެ މައްޗަށް ކުރެވިފައިވެއެވެ.
ފައިހް އަމިއްލައަށް ފުލުހުންނާ ޙަވާލުވީ ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން އޭނާ ހޯދާތާ މަހަކަށްވުރެ ގިނަ ދުވަސް ވެފައިވަނިކޮށެވެ. މިހާރު އޭނާ ހުރީ ޝަރީއަތް ނިމެންދެން ބަންދުކޮށްފައެވެ.
ގާޒީ ވަނީ މިއީ މަދަނީ މިންގަނޑުން ކުރިއަށް ގެންދެވޭނެ ދައުވާތަކެއްކަމަށް ނިންމަވައި، ޝަރީއަތުގެ ކުރީގެ ހުށައެޅުމާއި، ހެކި ހުށައެޅުމަށް ފުރުސަތު ދެއްވާފައެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ.
