މިދިޔަ 5 އަހަރު ތެރޭގައި އިންޑިއާ ސިފައިން ރާއްޖެއަށް އަރާ ރާއްޖެ ހިފައިފިތޯ ސުވާލުއުފައްދަވާ، އިންޑިއާ ސިފައިން ރާއްޖެގައި އެބަތިބި ކަމަށް ބުނެ ރައްޔިތުންގެ ހިތުގައި ބިރުވެރިކަން އުފައްދަން މަސައްކަތް ކުރާ މީހުންނަށް ރައީސް އޮފީހުގެ ތަރުޖަމާނު މިއުވާން މުހައްމަދު ފާޑު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން މިއުވާން ވިދާޅުވީ ތިނަދޫއިން ހާލުބޮޑު ތުއްތު ކުއްޖަކު މާލެ ގެންނަން ޑޯނިއަރ މަތިންދާބޯޓު އޮޕަރޭޝަނެއް ފެށުމުން ރައްޔިތުންގެ ހިތުގައި ބިރުވެރިކަން އުފައްދަން ބަޔަކު ކެނޑިނޭޅި މަަސައްކަތް ކުރި ކަމަށެވެ. ނަމަވެސް އެ ވާހަކަތައް ފެތުރި މީހުންނަށްވެސް އެ އޮޕަރޭޝަނަކީ ކޮބައިކަން އެނގޭނެ ކަމަށާއި، ބޭނުންވަނީ ރައްޔިތުންގެ ހިތުގައި ބިރުވެރިކަން އުފައްދަން ކަމަށް މިއުވާން ވިދާޅުވިއެވެ.

މިއުވާން ވިދާޅުވީ ދައުރު ފެށުނިއްސުރެ ދެންމެ ދެންމެ ރާއްޖެއަށް ބަޔަކު އަރާ ރާއްޖެ ހިފާފާނެފަދަގޮތަކަށް ސޯޝަލް މީޑިއާގައި ޕޯސްޓްތައް ޖަހަމުންދިޔަ ކަމަށެވެ. މިއުވާން ވިދާޅުވީ ރައީސް އިބްރާހިމް މުހައްމަދު ޞާލިހުގެ ވެރިކަމުގެ ފުރަތަމަ ދައުރުގެ ނިމުމަކާ ހަމައަށް އާދެވިއްޖެ ކަމަށެވެ. އަދި 5 އަހަރު ވެގެންދިޔަ އިރު ރާއްޖޭގެ މިނިވަންކަމަށް ބުރޫއެރިތޯ ސުވާލު އުފެއްދެވިއެވެ.

މިއުވާން ވިދާޅުވީ ދޮގު ވާހަކަތަކެއް ދައްކައިގެން ރައްޔިތުންގެ ހިތްތަކުގައި ބިރުވެރިކަން އުފައްދާ އޮޅުވާލުމަށް އެފަދަ ވާހަކަތައް ދެކެވޭ ކަމަށެވެ.

އޭނާ ވިދާޅުވީ ރާއްޖޭގައި ބޭރުގެ ސިފައިން ހަރަކާތްތެރި ނުވާ ކަމަށާއި، ހެލިކޮޕްޓަރާއި ޑޯނިއަރ އޮޕަރޭޓްކުރަން ޓެކްނިކަލް މީހުން ތިބޭކަމަށެވެ. އަދި އެމީހުންގެ ފަރާތުން ލިބެނީ ޓެކްނިކަލް އެހީތައް ކަމަށާއި، އިންޑިއާއިން ހަދިޔާކޮށްފައިވާ އުޅަނދުތަކުގެ އެހީތެރިކަން ލިބުނު ފަރާތްތަކާއި ދިވެހިރައްޔިތުންގެ ތެރެއިން ގިނަ ބަޔަކަށް މިކަމުގެ ހަގީގަތް އެނގިވަޑައިގަންނަވާނެ ކަމަށެވެ.