މުއިއްޒަށް ލިބިވަޑައިގަތީ ލިބިވަޑައިގަންނަވާނެ އެންމެ ގިނަ ވޯޓު، ސަރުކާރު ބަދަލުކުރަން ބޭނުންވާ ރައްޔިތަކު ދެވަނަ ބުރުގައި ވޯޓުލާން މަޑުނުކުރާނެ - މަހްލޫފް

އިދިކޮޅު ކެންޑިޑޭޓް ޑރ. މުހައްމަދު މުއިއްޒަށް ލިބިވަޑައިގަތީ ލިބިވަޑައިގަންނަވާނެ އެންމެ ގިނަ ވޯޓު ކަމަށާއި، ސަރުކާރު ބަދަލުކުރަން ބޭނުންވާ ރައްޔިތަކު ދެވަނަ ބުރުގައި ވޯޓުލާން މަޑު ނުކުރާނެ ކަމަށް ޔޫތު މިނިސްޓަރު އަހުމަދު މަހްލޫފް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަފުޅު ދައްކަވަމުން މިނިސްޓަރު މަހްލޫފް ވިދާޅުވީ އިންތިހާބުގައި ނުކުތީ އެންމެ އުއްމީދުކުރި ނަތީޖާ ނޫން ކަމަށެވެ. އެގޮތުން ސަރވޭތަކުން ގަބޫލުކުރެވިފައި އޮތީ އިންތިހާބު އެއްބުރުން ކާމިޔާބުކުރެވޭނެ ކަމަށް ނަމަވެސް ނަތީޖާއާއެކީގައި އެކި ގޮތްގޮތަށް ބެލުމުން އެންމެ ބޮޑަށް ފާހަގަކުރެވުނީ އެއްބުރުން ކާމިޔާބުކުރެވޭނެކަން މާ ބޮޑަށް ޔަގީންކުރެވުން ކަމަށެވެ.

މިނިސްޓަރު ވިދާޅުވީ އެއްބުރުން އިންތިހާބު ކާމިޔާބުކުރެވޭނެ ކަމުގައި ޔަގީންކަން އޮތް ކަމަށާއި، ނަމަވެސް ނުކުތީ އުއްމީދުކޮށްގެން ތިބި ނަތީޖާއެއް ނޫން ކަމަށެވެ. އަދި ކުރީގެ ރިޔާސީ އިންތިހާބުތަކުގައި ކަންކަން ހިނގާފައި އޮތްގޮތަށް ބަލާއިރުގައި އެންމެ ފަހިކޮށް އޮތީ ރައީސް އިބްރާހީމް މުހައްމަދު ޞާލިހު އިންތިޚާބުވެވަޑައިގަތުން ކަމަށެވެ.

މިނިސްޓަރު ވިދާޅުވީ ޕީޕީއެމް އޮތީ އެންމެ ބޮޑަށް ސްޓްރެޗްވެފައި ކަމަށާއި، މުއިއްޒަށް ލިބިވަޑައިގެންނެވި ވޯޓަކީ ރައީސް ސާލިހު ނޫންގޮތެއް ހޯދުމަށް ކުރި ކެމްޕޭންގެ މެކްސިމަމް ވޯޓުކަމަށެވެ. އަދި މި ސަރުކާރު ބަދަކުރަން ބޭނުންވާ ރައްޔިތަކު ދެވަނަ ބުރުގައި ވޯޓުލާން މަޑުކޮށްގެން ނުހުންނާނެ ކަމަށް ވެސް ވިދާޅުވިއެވެ.

މިނިސްޓަރު ވިދާޅުވީ ކުރިން އޮތް 2 ރިޔާސީ އިންތިހާބެއްގައި 25 އިންސައްތައިގައި އޮތް ކެންޑިޑޭޓުން ރިޔާސީ އިންތިހާބު ކާމިޔާބުކުރުމަކީ މި ފަހަރުގެ ރިޔާސީ އިންތިހާބުގައި ދެވަނަ ބުރަކަށް ދާއިރު، އޮތް ޕްރެޝަރު ކުޑަ، ނަމަވެސް ފުރުސަތު ބޮޑު ކަމެއް ކަމަށެވެ.