ފީއަލީ ބިން ހިއްކުމުގެ އަމަލީ މަސައްކަތް ފަށައިފި
10 ސެޕްޓެމްބަރު 2023 | އާދީއްތަ 13:31މި އެއްބަސްވުމުގެ ދަށުން ފީއަލިން 13.8 ހެކްޓަރުގެ ބިން ހިއްކާނެ
ބިން ހިއްކުމުގެ އަމަލީ މަސައްކަތް ފެށިގެން ކުރިއަށްދަނީ
ފ.ފީއަލީ ބިން ހިއްކުމުގެ އަމަލީ މަސައްކަތް ފަށާފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނެފިއެވެ.
އެކުންފުނީގެ ސީއީއޯ އާދަމް އާޒިމް ވިދާޅުވީ ފީއަލީ ބިން ހިއްކުމުގެ އަމަލީ މަސައްކަތް ފެށިގެން ކުރިއަށްދާ ކަމަށާއި، މިދިޔަ ހުކުރު ދުވަހުގެ ރޭ މަސައްކަތް ފަށާފައިވާ ކަމަށެވެ. މި މަސައްކަތް ބާރު ސްޕީޑްގައި ކުރިއަށްދާ ކަމަށް އެމްޓީސީސީން ބުނެއެވެ.
ބިން ހިއްކުމުގެ މަޝްރޫއު ޕްލޭނިން މިނިސްޓްރީން އެމްޓީސީސީއާ ހަވާލުކޮށްފައިވަނީ 12 ޑިސެންބަރު 2021 ގައެވެ. މި އެއްބަސްވުމުގެ ދަށުން ފީއަލީން 13.8 ހެކްޓަރުގެ ބިން ހިއްކާނެ އެވެ. އަދި އެ ސަރަހައްދުގެ ރިވެޓްމަންޓު ޖެހުމާއި ގްރޮއިން ޖެހުމުގެ މަސައްކަތް ވެސް އެމްޓީސީސީން ކުރާނެ އެވެ.
މި މަޝްރޫއު އެމްޓީސީސީއާ ހަވާލުކޮށްފައިވަނީ 450 ދުވަހުގެ ތެރޭގައި ނިންމާ ގޮތަށް 66.85 މިިލިއަން ރުފިޔާ އަށެވެ.
އަތޮޅުތެރޭގެ ބައެއް ރަށްތަކަށް ދިމާވެފައިވާ ބިމުގެ ދަތިކަމަށް ހައްލު ގެނެސްދިނުމުގެ ގޮތުން ސަރުކާރުންދަނީ ގިނަ ރަށްތަކެއް ހިއްކަމުންނެވެ. ހިއްކާ ސަރަހައްދުތަކުން ގޯތި ދިނުމާއި، ވިޔާފާރީގެ ބޭނުންތަކަށް ބިންތައް ދޫކުރެވޭނެ ކަމަށް ސަރުކާރުން ބުނެއެވެ. އަދި ބޯހިޔާވަހިކަމަށް ދިމާވެފައިވާ ދަތިކަމަށް ވެސް ވަރަށް ބޮޑު ހައްލެއް ލިބޭނެ ކަމަށް ސަރުކާރުން ބުނެއެވެ.
