ރައްޔިތުންގެ ނިންމުމަށް އިހުތިރާމްކޮށް، ގައުމާއެކު ކުރިއަށްދާންޖެހޭ: ނައިބު ރައީސް
9 ސެޕްޓެމްބަރު 2023 | ހޮނިހިރު 09:19މުޅި ރާއްޖޭގައި ވޯޓުލުމުގެ މަސައްކަތްތައް ކުރިއަށްދަނީ ވަރަށް އަމާންކަމާއެކު
ރައީސުލްޖުމްހޫރިއްޔާގެ ނައިބު ފައިސަލް ނަސީމް ވާހަކަދައްކަވަނީ
ދިވެހި ރައްޔިތުން ނިންމާ ނިންމުމަށް ހުރިހާ ފަރާތްތަކުން އިހުތިރާމްކުރަންޖެހޭ ކަމަށާއި، ގައުމާއެކު ކުރިއަށްދާންޖެހޭ ކަމަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
ހޮނިހިރު ދުވަހު ހެނދުނު ޖަމާލުއްދީން ސްކޫލަށް ވަޑައިގަންނަވާ ވޯޓުލެއްވުމަށްފަހު މީޑީއާތަކަށް މައުލޫމާތު ދެއްވަމުން ނައިބު ރައީސް ވިދާޅުވީ އިންތިޚާބުތަކަކީ ހުރިހާ ރައްޔިތުންނާއި ގުޅިފައި އޮންނަ ކަމެއް ކަމަށާއި، މުޅި ގައުމުގެ ކުރިއެރުމާއި، ރައްޔިތުންގެ އުންމީދާއި ކުރިމަގާއި ގުޅިފައިވާ ކަމެއް ކަމަށެވެ. އަދި ވޯޓު ލުމަކީ ފަރުދީ ޒިންމާއެއް ކަމަށް ނައިބު ރައީސް ވިދާޅުވިއެވެ.
ރިޔާސީ އިންތިޚާބު ކުރިއަށްދާ ގޮތަށް އިޝާރާތް ކުރައްވައި ނައިބު ރައީސް ވިދާޅުވީ މުޅި ރާއްޖޭގައި ވޯޓުލުމުގެ މަސައްކަތްތައް ކުރިއަށްދަނީ ވަރަށް އަމާންކަމާއި، ހަމަހިމޭންކަމާއެކު ކަމަށެވެ.
ރައްޔިތުންގެ ނިންމުން ގަބޫލުކުރަންޖެހޭކަން ފާހަގަކުރައްވައި ނައިބު ރައީސް ވިދާޅުވީ މިރޭ ނަތީޖާ އެނގިގެންދާނެ ކަމަށާއި، ދިވެހި ރައްޔިތުންގެ ނިންމުމަށް ހުރިހާ ފަރާތްތަކުން އިހުތިރާމް ކުރަންޖެހޭ ކަމަށެވެ. އަދި ވިދާޅުވީ ކޮންމެ ގޮތަކަށް ނަތީޖާ ލިބުނު ނަމަވެސް ގައުމު ނުހުއްޓޭނެ ކަމަށާއި، ކުރިމަގު ފެންނަނީ އުޖާލާކޮށް ކަމަށެވެ. މަސައްކަތް ކުރާނީ ތަރައްގީއާއެކު ކުރިއެރުމަށް ކަމަށް ނައިބު ރައީސް ވިދާޅުވިއެވެ.
