އއ. ބޮޑުފޮޅުދޫ ބިން ހިއްކުމުގެ މަސައްކަތް ނިންމާލައިފިއެވެ.

ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން މިމަޝްރޫއުގެ އަމަލީ މަސައްކަތް ފަށާފައިވަނީ އޯގަސްޓް މަހުގެ 25 ވަނަ ދުވަހެވެ. ބޮޑުފޮޅުދޫ ބިން ހިއްކުމުގެ މަސައްކަތް މިމަހުގެ 6 ވަނަ ދުވަހު ނިމިފާއިރު، ދެން ކުރިއަށްދާނީ ގޮނޑުދޮށް ހިމާޔަތްކުރުމުގެ މަސައްކަތް ކަމަށް އެމްޓީސީސީން ބުނެއެވެ.

އެމްޓީސީސީގެ ސީއީއޯ އާދަމް އާޒިމް ވިދާޅުވީ ބޮޑުފޮޅަދޫ ބިން ހިއްކާ ނިމިފައިވާ ކަމަށާއި، ބުރާސްފަތި ދުވަހު މ.ދިއގަރުގެ ބިން ހިއްކުމުގެ ނުނިމިއޮތްބައި ހިއްކަން ފަށާފައިވާ ކަމަށެވެ.

ބޮޑުފޮޅުދޫ ބިން ހިއްކުމުގެ މިމަޝްރޫއުގެ ދަށުން 12 ހެކްޓަރުގެ ބިން ވަނީ ހިއްކާފައެވެ. އަދި ހިއްކި ސަރަހައްދުން 180 މީޓަރުގެ ސަރަހައްދެއް ހިމާޔަތްކުރާނެއެވެ. އަދި 117 މީޓަރުގެ ސަރަހައްދެއްގައި ބޮޑުހިލަ ޖެހުމާއި 161 މީޓަރުގެ ސަރަހައްދެއްގައި ބްރޭކް ވޯޓަރ ގާއިމުކުރާނެއެވެ.

މިމަޝްރޫއު އެމްޓީސީސީ އާ ހަވާލުކޮށްފައިވަނީ 74 މިލިއަން ރުފިޔާއަށެވެ.

ބޮޑުފޮޅުދޫގެ ބިން ހިއްކާ ނިންމާލާފައިވާއިރު، އއ. އުކުޅަހުގެ ބިން ހިއްކުމުގެ އަމަލީ މަސައްކަތް ވެސް ބާރު ސްޕީޑްގައި އެމްޓީސީސީން ވަނީ ނިންމާލާފައެވެ.

އަތޮޅުތެރޭގެ ބައެއް ރަށްތަކަށް ދިމާވެފައިވާ ބިމުގެ ދަތިތަކަމަށް ހައްލު ގެނެސްދިނުމުގެ ގޮތުން ސަރުކާރުންދަނީ ގިނަ ރަށްތަކެއް ހިއްކަމުންނެވެ. ހިއްކާ ސަރަހައްދުތަކުން ގޯތި ދިނުމާއި، ވިޔާފާރީގެ ބޭނުންތަކަށް ބިންތައް ދޫކުރެވޭނެ ކަމަށް ސަރުކާރުން ބުނެއެވެ. އަދި ބޯހިޔާވަހިކަމަށް ދިމާވެފައިވާ ދަތިކަމަށް ވެސް ވަރަށް ބޮޑު ހައްލެއް ލިބޭނެ ކަމަށް ސަރުކާރުން ބުނެއެވެ. އެގޮތުން އާބާދީގައި ގާތްގަނޑަކަށް 800 މީހުން ދިރިއުޅޭ ބޮޑުފޮޅުދޫއަކީ 8.7 ހެކްޓަރުގެ ކުޑަ ރަށެކެވެ. ނަމަވެސް ބިން ހިއްކުމުގެ މަޝްރޫއާއެކު ރަށުގެ ބިމުގެ ބޮޑުމިން ދެ ގުނައަށްވުރެ ވަނީ އިތުރުވެފައެވެ.