އިޖްތިމާއީ ޒިންމާގެ ދަށުން 2019 ވަނަ އަހަރުން ފެށިގެން މިއަދާހަމައަށް ހިލޭސާބަހަށް ހއ.އިހަވަންދޫގައި 1.05 މިލިޔަން ރުފިޔާގެ އެކިއެކި މަސައްކަތްތައް ކުރިއަށް ގެންގޮސްފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނެފިއެވެ.
7 ސެޕްޓެމްބަރު 2023 ވަނަ ދުވަހު އިހަވަންދޫ ކައުންސިލުން އެމްޓީސީސީ ބަދުނާމު ވާގޮތަށް އަދި ހަގީގަތް އޮޅޭފަދަ ގޮތަށް ޝާއިއުކޮށްފައިވާ ޚަބަރާއި ގުޅޭ ގޮތުން އެމްޓީސީސީން ބުނީ "ރައްޔިތުންގެ ކުންފުނި" މި ސްލޯގަންގެ ދަށުން މި ކުންފުނިން އަބަދުވެސް މަސައްކަތްކޮށްފައިވާނީ މުޖްތަމައުއަށް ޚިދުމަތްކުރުމުގެ ރޫހުގައިކަމަށެވެ. ނަމަވެސް ހިތާމަޔަކީ ރައްޔިތުންނަށް އޮޅޭ ފަދަ ގޮތަކަށް އަދި މި ކުންފުނި ބަދުނާމުކުރުމުގެ ނިޔަތުގައި ބައެއް ފަރާތްތަކުން ހަގީގަތާއި ޚިލާފު ޚަބަރު ފަތުރަމުންދާ ކަމަށެވެ.
އެގޮތުން ހއ. އިހަވަންދޫ ކައުންސިލުން 7 ސެޕްޓެމްބަރ 2023 ވަނަ ދުވަހު ޝާއިއުކޮށްފައިވާ "ދެންނެވުން" ނަންބަރު 2023/4 އަކީ ކަނޑައެޅިގެން ހަގީގަތް ރައްޔިތުންނަށް އޮޅޭފަދަ ގޮތަކަށް ޝާއިއުކޮށްފައިވާ ލިއުމެއްކަން ފާހަގަކޮށް އެމްޓީސީސީން ބުނީ އެކަން ކުށްވެރިކުރާ ކަމަށާއި، އެއީ ރައްޔިތުންގެ ހިތުގައި އެ ކުންފުނިން ކުރިއަށްގެންދާ އުމްރާނީ ތަރައްގީގެ މަޝްރޫއުތަކާއ،ި ކުންފުނިން ކޮށްދެމުން އަންނަ އިޖްތިމާއީ ހަރަކާތްތަކާއި ކުންފުންޏަށް އުފެދިފައިވާ އިތުބާރާއ،ި ލޯބި ފަނޑު ކޮށްލުމަށް ގަސްތުގައި ކޮށްފައިވާ ނާތަހުޒީބީ އަމަލެއް ކަމަށެވެ.
އެމްޓީސީސީން ބުނީ އިޖްތިމާއީ ޒިންމާގެ ދަށުން ކޮށްދެވޭ މަސައްކަތްތަކަކީ އެ ކުންފުނިން ކުރިޔަށްގެންދާ އަސާސީ މަޝްރޫއުތަކަށް ބުރުލެއް ނާރާގޮތަށް ކޮށްދެވޭ މަސައްކަތަކަށްވާއިރު މިފަދަ އިޖްތިމާއީ ޒިންމާގެ ދަށުން ކޮށްދެވޭ މަސައްކަތްތައް ނިންމުމަށް ސީދާ ވަކި ތާރީހެއްވެސް ކަނޑައެޅިފައި ނުވާނެ ކަމަށެވެ.
އިހަވަންދޫ ކައުންސިލުން ޝާއިއުކޮށްފައިވާ ލިޔުމުގައި ބަޔާންކޮށްފައިވާ މަސައްކަތަކީ އެމްޓީސީސީގެ އިޖްތިމާއީ ޒިންމާގެ ދަށުން ކޮށްދިނުމަށް ކުންފުންޏާއި ކައުންސިލާ ދެމެދު ވާހަކަ ދެކެވިފައިވާ މަސައްކަތެއް ކަމަށެވެ. މި މަސައްކަތަކީ ރައްޔިތުންނަށް ނުހަނު ބޭނުންތެރި މަސައްކަތަކަށްވުމާއެކު މި މަސައްކަތް އަވަހަށް ފެށުމަށް ވެލިއެޅުމަށް ބޭނުންވާ ގޯތިތަކުގެ ލިސްޓެއް ހިއްސާކުރުމަށް އިހަވަންދޫ ކައުންސިލާއެކު ބޭއްވުނު ބައްދަލުވުމުގައި އެދިފައިވާ ކަމަށް އެމްޓީސީސީން ބުންޏެވެ.
އެމްޓީސީސީން ބުނީ މިގޮތަށް ލިސްޓަކަށް އެދިފައިވާ މައިގަނޑު ސަބަބަކީ ކައުންސިލުން ދޫކޮށްފައިވާ ހުރިހާ ގޯތިތަކަށް ވެލިއެޅުމަށް އެދިފައިވީ ނަމަވެސް މީގެން ބައެއް ބިންތަކަށް އެ ގޯތިތަކުގެ ވެރިފަރާތުން ވެލިއަޅަން ބޭނުންނުވުން ކަމަށެވެ. ނަމަވެސް މިއަދާހަމައަށް އެފަދަ ލިސްޓެއް އެމްޓީސީސީއަށް ލިބިފައި ނުވާކަމަށް ބުނެފައިވެއެވެ.
އެމްޓީސީސީން ބުނީ 2019 އިން ފެށިގެން އަދާހަމައަށް ޖުމުލަ 1.05 މިލިޔަން ރުފިޔާގެ އެކިއެކި ހަރަކާތްތަށް އިޖްތިމާއީ ޒިންމާގެ ދަށުން ހިލޭސާބަހަށް އިހަވަންދޫގައި ކުރިޔަށް ގެންގޮސްފައިވާ ކަމަށެވެ.
އެހެންކަމުން އިހަވަންދޫ ކައުންސިލުން ނެރެފައިވާ ބަޔާނަކީ ރައްޔިތުން ތެރޭގައި އެ ކުންފުންޏާއި ދޭތެރޭ ނަފްރަތު އުފެދޭގޮތަށް ވަރަށް ޒިންމާދާރުކަން ކުޑަކޮށް ކޮށްފައިވާ ވަރަށްވެސް ނާތަހުޒީބު އަމަލެއް ކަމަށް އެމްޓީސީސީން ބުނެފައިވެއެވެ. މިފަދަ ކަންކަން މަދު ފަރާތްތަކުން ކުރަމުން ގެންދިޔަ ނަމަވެސް ގިނަ ފަރާތްތަކުން އިޖްތިމާއީ ޒިންމާގެ ދަށުން ކޮށްދެމުންގެންދާ ހަރަކާތްތަށް ވަރަށް ޝުކުރުވެރިކަމާއެކު ބަލައިގަންނަ ކަމަށް އެމްޓީސީސީން ބުނެއެވެ.
މީގެ އިތުރުން އެމްޓީސީސީން ވަނީ ބަދުނާމުވާގޮތަށް އަދި އާންމު ރައްޔިތުންގެ މެދުގައި ކުންފުންޏަށް އޮތް އިތުބާރު ގެއްލޭފަދަ ގޮތަށް، މިފަދަ ހަގީގަތާއި ޚިލާފު ދޮގު ޚަބަރު ނުފެތުރުމަށް އިހަވަންދޫ ކައުންސިލަށް އިލްތިމާސްކޮށްފައެވެ.
