މަނާ ގަޑީގައި އެއްވެސް ބަޔަކު ކެމްޕޭން ނުކުރުމަށް އީސީން އިލްތިމާސްކޮށްފި
8 ސެޕްޓެމްބަރު 2023 | ހުކުރު 06:27ހުކުރު ދުވަހުގެ އިރުއޮއްސި 6:00ން އާދީއްތަ ދުވަހުގެ ހެނދުނު 6:00ށް ހަމައަށް ސިޔާސީ ޕާޓީތަކުގެ ޖަގަހަތައް ހުޅުވުމަކީ މަނާކަމެއް
އިލެކްޝަންސް ކޮމިޝަންގެ މެންބަރުން
މަނާ ގަޑީގައި އެއްވެސް ބަޔަކު ކެމްޕޭން ކުރުމުގެ އަމަލެއް ކުރިއަށް ނުގެންދިޔުމަށް އިލެކްޝަންސް ކޮމިޝަން (އީސީ) އިން އިލްތިމާސްކޮށްފިއެވެ.
ރާއްޖެއެމްވީއާ ވާހަކަފުޅުދައްކަވަމުން އީސީގެ ނާއިބުރައީސް އިސްމާއީލް ހަބީބު ވިދާޅުވީ ހުކުރު ދުވަހުގެ އިރުއޮއްސި 6:00ން އާދީއްތަ ދުވަހުގެ ހެނދުނު 6:00ށް އެފަދަ އަމަލެއް ނުހިންގުމަށް އެދިވަޑައިގަންނަވާ ކަމަށެވެ. ކެމްޕޭން ކުރުން މަނާކުރެވިފައި އޮންނަނީ ޤާނޫނީ ގޮތުން މުހިންމު ހިކުމަތަކަށްޓަކައި ކަމަށާއި ވޯޓްލުމަށްޓަކައި ތައްޔާރުވުމާއި ވޯޓްލާ ދުވަހު، އާންމުން ވިސްނަން ވަގުތު ދިނުމަކީ މުހިންމު ކަމެއް ކަމަށް ހަބީބު ވިދާޅުވިއެވެ.
މަނާ ގަޑީގައި ކެމްޕޭން ކުރުމުގެ އަމަލެއް ހިންގާނަމަ، ނުވަތަ ހިންގަން މަސައްކަތްކޮށްފިނަމަ މަސްލަހަތު ގެއްލިގެންދާނެ ކަމަށް ވެސް ހަބީބު ވިދާޅުވިއެވެ.
ހަބީބު ވިދާޅުވީ ޚާއްސަ ގޮތެއްގައި މަނާ ގަޑީގައި ވޯޓަށް ނުފޫޒު ފޯރުވުމުގެ އަމަލުތައް ހިންގާކަމުގެ ތުހުމަތުތައް އޮންނަ ކަމަށާއި އެއީ ވޯޓްލުމަށް ހުރަސް އެޅުމަށް ހިންގޭ އަމަލެއް ކަމަށެވެ. އަދި އެފަދަ ކަންތައްތައް ނުކުރުމަށް ވަނީ އެދިވަޑައިގެންފައެވެ. ވޯޓްލުމުގެ ހައްޤަކީ ޤާނޫނު އަސާސީން ކޮންމެ ރައްޔިތަކަށް ލިބިދީފައިވާ ހައްޤެއް ކަމަށް ހަބީބު ވިދާޅުވިއެވެ.
ހަބީބު އިތުރަށް ވިދާޅުވީ ހުކުރު ދުވަހުގެ އިރުއޮއްސި 6:00ން އާދީއްތަ ދުވަހުގެ ހެނދުނު 6:00ށް ހަމައަށް ސިޔާސީ ޕާޓީތަކުގެ ޖަގަހަތައް ހުޅުވުމަކީ ވެސް މަނާކަމެއް ކަމަށެވެ. އަދި ޖަގަހަތަކުގެ ތޭރޭގައި މީހުންނަށް ވެސް ހަރަކާތްތެރި ނުވެވޭނެ ކަމަށާއި ޖަގަހަތައް ހުންނަން ޖެހޭނީ ބަންދުކޮށްފައި ކަމަށް ވިދާޅުވިއެވެ. ސިޔާސީ ޕާޓީތަކަށާއި ކެންޑިޑޭޓުންނަށް ސިޓީއަކުން މިކަން އަންގަފާއިވާނެ ކަމަށް ހަބީބު ވިދާޅުވިއެވެ.
މި ރިޔާސީ އިންތިޚާބަކީ ސިޔާސީ ކޮންމެ ޕާޓީއެއްގެ ވެސް މުހިންމު ހަރަކާތެއް ކަމަށާއި އެހެންކަމުން ޕާޓީގެ އޮފީސް ހުޅުވިފައި ހުއްޓަސް އެއީ މައްސަލައެއް ނޫން ކަމަށް ވިދާޅުވިއެވެ. ވޯޓްލާ ތަން އެއްވެސް މީހެއްގެ ބަދަލު ނުވާނެ ކަމަށާއި ވޯޓްލާން ހަމަޖެހިފައި އޮތް ތަން ރަނގަޅަށް ޗެކްކުރުމަށްފަހު ވަޑައިގަތުމަށް ހަބީބު އިލްތިމާސްކުރެއްވިއެވެ.
ވޯޓްލުމަށް ބޭނުންވާ ކޮންމެވެސް އެއް ޑޮކިއުމެންޓެއް ހިފައިގެން ދިޔުމުން ވޯޓް ލެވެނޭ ކަމަށާއި އައިޑީކާޑު، ޕާސްޕޯޓް ނުވަތަ ލައިސަންސް ކާޑުގެ އޮރިޖިނަލް ހިފައިގެން ދިޔުމުން ވޯޓްލެވޭނެ ކަމަށް ވެސް ހަބީބު ވިދާޅުވިއެވެ. އައިޑީކާޑުގެ މުއްދަތު ހަމަވެފައި އޮތަސް ޕާސްޕޯޓް ނުވަތަ ލައިސަންސް ކާޑުގެ ތެރެއިން ކޮންމެވެސް އެއް ލިޔުމެއް އޮތުމުން ވޯޓްލެވޭނެ ކަމަށް ހަބީބު ވިދާޅުވިއެވެ.
ސެޕްޓެންބަރު މަހުގެ 09 ވަނަ ދުވަހު ބާއްވާ ރިޔާސީ އިންތިޚާބުގައި މުޅި ޖުމްލަ 574 ވޯޓު ފޮށި ބަހައްޓައެވެ. އެއީ މާލެ ސަރަހައްދުގައި 176 ވޯޓު ފޮށި، މާލެ ފިޔަވައި ސިޓީތަކާއި އަތޮޅުތަކުގައި 384 ވޯޓު ފޮށި، ސިނާއީ މަސައްކަތް ކުރާ ތަންތަނާއި ޖަލުތަކުގައި 6 ވޯޓު ފޮށި، ރާއްޖެއިން ބޭރުގައި 8 ވޯޓު ފޮއްޓެވެ.
ހޮނިހިރު ދުވަހު ބާއްވާ ރިޔާސީ އިންތިޚާބަށް 285،219 ވޯޓު ކަރުދާސް ޗާޕުކޮށްފައިވާކަމަށް އީސީން ވަނީ ބުނެފައެވެ. ކޮމިޝަނުން ކުރި އިއުލާނެއްގައި ވަނީ އިންތިޚާބުގައި ވޯޓު ނެގުމަށްޓަކައި ވޯޓު ކަރުދާސްތައް ތައްޔާރު ކޮށްފައިވާ ކަމަށާއި އެ ކަރުދާސްތައް ޗާޕުކޮށްފައިވަނީ ނޮވެލްޓީން ކަމަށެވެ. މި އަހަރުގެ ރިޔާސީ އިންތިޚާބުގައި 8 ކެންޑިޑޭޓުން ބައިވެރިވާއިރު، 282،395 މީހުންނަށް ވޯޓުލުމުގެ ހައްގު ލިބެއެވެ.
