ފްރާންސް އިން އަޔަލެންޑް ބަލިކޮށްފި

ޔޫރޯ ކޮލިފައިންގައި އަޔަލެންޑާ ދެކޮޅަށް ކުޅުނު މެޗުން ފްރާންސް މޮޅުވެއްޖެ އެވެ.

ބުރާސްފަތި ދުވަހުގެ ރޭ ކުޅުނު މެޗު ފްރާންސް ކާމިޔާބު ކުރީ 2-0 އިންނެވެ. މެޗު ފަށައިގެން ފްރާންސް އިން ވަނީ އަޔަލެންޑުގެ ގޯލަށް އަމާޒުކޮށް، ނުރައްކާ ކުރުމަށް މަސައްކަތް ކޮށްފަ އެވެ. ފްރާންސް އިން މެޗުގައި ލަނޑު ޖަހައި، ލީޑު ނެގީ 19 ވަނަ މިނެޓުގަ އެވެ. ކީލިއަން އެމްބާޕޭ ތަނަވަސްކޮށްދިން ފުރުސަތެއްގައި ފްރާންސް އަށް ލީޑު ނަގައިދިނީ އައުރެލިން ޗުއަމިނީ އެވެ. ފްރާންސްގެ ދެ ވަނަ ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ތިން ވަނަ މިނެޓުގައި އެ ޓީމުގެ ދެ ވަނަ ލަނޑު ޖެހީ މާކަސް ތުރަމް އެވެ. އޭގެ ފަހުން ފްރާންސްގެ އެމްބާޕޭ އަދި އެންޓޮއިން ގްރީޒްމަން އަށް ވެސް ވަނީ ލަނޑު ޖަހާނެ ފުރުސަތު ލިބި ބޭކާރުވެފަ އެވެ.

މޮޅާއެކު ފްރާންސް އޮތީ ގްރޫޕް ބީގެ އެއް ވަނައިގައި އެވެ. އެއީ މިހާތަަނަށް ކުޅުނު ފަސް މެޗުން ވެސް މޮޅުވެ، 15 ޕޮއިންޓާއެކު އެވެ. ފްރާންސް އަތުން ބަލިވި އަޔަލެންޑް އޮތީ ތިން ޕޮއިންޓާއެކު ހަތަރު ވަނައިގަ އެވެ.