ކުރިއަށް އޮތް ރިޔާސީ އިންތިޚާބުގެ ކެމްޕެއިންގެ މިއީ އެންމެ މުހިންމު ވަގުތު ކަމަށާއި ބުންވަރު އެބަހުރި ކަމަށް ރައީސުލްޖުމްހޫރިއްޔާ އަދި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ހުކުރު ދުވަހު ފ.ނިލަންދޫގައި ބޭއްވެވި އުފާވެރި އަމާން، ބަނދަރު ބައްދަލުކުރެއްވުމުގައި ވާހަކަފުޅުދައްކަވަމުން ރައީސް ވިދާޅުވީ މި ވަގުތު ކެމްޕެއިން ކުރައްވަމުން ގެންދަނީ ވަރަށް ފޯރިއާ އެކުގައި ކަމަށެވެ. އަދި ވާދަވެރިން ކެމްޕެއިން ނިންމާލާފައި ގެއަށް ވަދެފައިވާ ކަމަށް ރައީސް ވިދާޅުވިއެވެ. އެމަނިކުފާނު އިތުރަށް ވިދާޅުވީ މި އިންތިޚާބުގައި ރައީސް އިބްރާހީމް މުހައްމަދު ޞާލިހަށް ވުރެ ރަނގަޅު ގޮތެއް އޮތް ކަމަށް ރާއްޖޭގެ އެއްވެސް ރަށަކުން ބުނަމުން ނުދާ ކަމަށެވެ. އެމަނިކުފާނުގެ ބުންވަރު އެބަހުރި ކަމަށާއި މިވަގުތަކީ ކެމްޕެއިންގެ އެންމެ މުހިންމު ވަގުތު ކަމަށް ވެސް ރައީސް ސާލިޙު ވިދާޅުވިއެވެ.
މީގެ އިތުރުން މިނިވަންކަން އެންމެ ރަނގަޅަށް ދިފާއުކޮށް ގައުމިއްޔަތު ދިފާއުކުރަން ކުރި އެންމެ ބުރަ މަސައްކަތް ކުރީ މި ސަރުކާރުން ކަމަށް ރައީސް ވިދާޅުވިއެވެ. ހަމައެހެންމެ މެދުފަންތީގެ ވިޔަފާރިތަކަށް އެންމެ ބޮޑެތި ފުރުސަތުތަކެއް ހޯދައި ދިނީ މި ސަރުކާރުންކަން ފާހަގަކުރައްވާ މި ސަރުކާރުން ކޮށްދީފައިވާ މުހިންމު މަސައްކަތްތަކަށް ރައީސް ވަނީ ބައްލަވާލައްވާފައެވެ. އެގޮތުން މަސްވެރިންނަށް އެންމެ ގިނަ ފުރުސަތުތަކެއް ހޯދައިދިނީ ވެސް މި ސަރުކާރުން ކަމަށް ރައީސް ވިދާޅުވިއެވެ. ރައީސް ވަނީ މީގެ ކުރިން ނިލަންދޫ އަށް އެމްޑީޕީ އަކީ ފަރިތަ ތަނެއް ނޫން ކަމަށާއި މިހާރު ފެންނަނީ އެ ރަށް އެމްޑީޕީ އަށް ބަދަލުވެފައިވާތަން ކަމަށް ވިދާޅުވެފައެވެ. ރައީސް ވަނީ ހޮނިހިރު ދުވަހުގެ ވޯޓަކީ ޤާނޫނު އަސާސީން މަތިކޮށްފައިވާ ޒިންމާއެއް ކަމަށް ފާހަގަކުރައްވާ އެ ޒިންމާ ރަނގަޅަށް އަދާކުރުމަށް އެދިވަޑައިގަންނަވާފައެވެ. އަދި އިލްތިމާސަކީ ކެންޑިޑޭޓް ނަމްބަރު 3 އަށް ވޯޓުދެއްވުން ކަމަށް ރައީސް ވިދާޅުވިއެވެ.
މި ޖަލްސާގައި ނިލަންދޫ އަދި ދަރަނބޫދޫ އަށްޓަކައި އެމަނިކުފާނު ގެންގުޅުއްވާ ތަސައްވުރު ރައީސް ވަނީ ހުކުރު ދުވަހު ހިއްސާކޮށްދެއްވާފައެވެ.
ނިލަންދޫ އަކީ މަސައްކަތްތެރި ހީވާގި ބައެއް ދިރިއުޅޭ ތަނެއް ކަމަށް ފާހަގަކުރައްވާ ރައީސް ވިދާޅުވީ އެ ރަށުގެ ފަޅުގައި ދެ ރިސޯޓް ތަރައްޤީކުރުމުގެ ކަންކަން ކުރިއަށްދާ ކަމަށެވެ. އެއީ އެ ރަށުގައި ވަޒީފާ އާއި ވިޔަފާރީގެ ފުރުސަތުތައް ފަހިވެގެން ދާނެ ކަމެއް ކަމަށާއި، ނިލަންދޫ ފަޅުގައި ދެ ރިސޯޓް ތަރައްޤީކުރުމުގެ ގޮތުން މިހާރު ކުރިއަށް ދަނީ އީއައިއޭގެ މަސައްކަތްތައް ކަމަށް ރައީސް ވިދާޅުވިއެވެ. މީގެ އިތުރުން ރައީސް ވަނީ އެ ރަށުގެ މަގުތަކުގައި ތާރު އަޅާ ޒަމާނީ ފެންވަރަށް ތަރައްޤީކުރުމަށާއި، އެ ރަށުގެ ބޯހިޔާވަހިކަމުގެ މައްސަލަ ހައްލުކޮށްދެއްވުމަށް ރޯހައުސް އަޅާދެއްވުމަށް ވެސް ވައުދުވެވަޑައިގަންނަވާފައެވެ. ރައީސް އިތުރަށް ވިދާޅުވީ އަމާޒަކީ އެ ރަށުގެ ހޮސްޕިޓަލްގެ ޚިދުމަތް ފުޅާކޮށް ޚިދުމަތުގެ ފެންވަރު މިހާރަށް ވުރެ ރަނގަޅުކުރުން ކަމަށެވެ.
ދަރަނބޫދޫއަށް ކުރިއަށް އޮތް ދައުރުގައި ކޮށްދޭން ހުރި ކަންކަމަށް ރައީސް އަލިއަޅުވާލެއްވިއެވެ. އެގޮތުން އެ ރަށުގެ ގިރާ ސަރަހައްދު ހިމާޔަތްކުރުމާއި ފުޓްބޯޅަ ދަނޑު ތަރައްޤީކޮށްދެއްވާނެ ކަމަށާއި ކުނި މެނޭޖުކުރުމުގެ ރަނގަޅު ނިޒާމެއް ޤާއިމްކޮށްދެއްވާނެ ކަމަށް އެމަނިކުފާނު ވިދާޅުވިއެވެ.
