ކުރިއަށް އޮތްތަނުގައި އައްޑޫގެ ޓުއަރިޒަމް ތަރައްޤީ ކުރާނީ ވަކި ޑެސްޓިނޭޝަނެއްގެ ގޮތުގައި ކަމަށް އެމްޑީއޭގެ ރައީސް އަހްމަދު ސިޔާމް މުޙައްމަދު ވިދާޅުވެއްޖެއެވެ.
އައްޑޫގެ އުފާވެރި އަމާން ރާއްޖެ ކެމްޕެއިން ޖަލްސާގައި ސިޔާމް ވިދާޅުވީ އައްޑޫގެ ރިސޯޓްތައް ތަރައްޤީ ވާނެ ކަމަށާއި އިންވެސްޓްމެންޓް ނައިސްފި ނަަމަ އޭނާވެސް ރިސޯޓްތައް ހަދާދޭން ތައްޔާރަށް ހުންނެވި ކަމަށެވެ. އަދި ރައީސް ޞާލިހު އަކީ ރައްޔިތުން އެ ބޭފުޅަކު ތަޖުރިބާކޮށްފައިވާ ބައެއް ކަަމަށާއި އެހެންކަމުން ރައީސް ޞާލިހަށް ދެވަނަ ދައުރެއް ދޭން ޖެހޭ ކަަމަށް ސިޔާމް ވިދާޅުވިއެވެ. އެމަނިކުފާނަކީ ރާއްޖޭގައި ސިޔާސީ ތަޖުރިބާ ހުންނެވި އެންމެ ފުރިހަމަ ބޭފުޅާ ކަމަށް ސިޔާމް ވިދާޅުވިއެވެ. މީގެ އިތުރުން ރައީސްގެ ރަނިންމޭޓް މުހައްމަދު އަސްލަމް އަކީ ރައީސް ޞާލިހު ފިޔަވައި ސިޔާސީ ގޮތުން އެންމެ ތަޖުރިބާ ހުންނެވި ބޭފުޅާ ކަަމަށް ސިޔާމް ވިދާޅުވިއެވެ. އެހެންކަމުން އެ ދެ ބޭފުޅުންނާއެކު ޤައުމު ބޭނުންވާ ތަރައްޤީ ގެނެވޭނެކަމާމެދު ރައްޔިތުން ޝައްކު ނުކުރާނެ ކަމަށް ސިޔާމް ވިދާޅުވިއެވެ.
އައްޑޫގެ ފަތުރުވެރިކަން ރަނގަޅުވުމުން އެ ސިޓީގެ ވަޒީފާގެ ފުރުސަތުތައް ގިނަވެ މުސްތަޤްބަލް އުޖާލާ ވާނެ ކަމަށް މި ޖަލްސާގައި ވާހަކަފުޅުދައްކަވަމުން ސިޔާމް ވިދާޅުވިއެވެ. ސިޔާމް ވިދާޅުވީ އަލުން އެމްޑީޕީން ދެވަނަ ދައުރަކަށް ކޯލިޝަނުގައި ކުރިމަތިލަނީ އައްޑޫ ތަރައްޤީކުރުމުގެ މަޤްސަދުގައި ކަމަށެވެ. އަދި އައްޑޫގައި އަލަށް ހަދާ ރިސޯޓުތައް ތަރައްޤީކުރުމަށް ކުރިއަށް އޮތް ދައުރަކީ މުހިންމު ދައުރެއް ކަމަށް ސިޔާމް ވިދާޅުވިއެވެ.
އައްޑޫ އަށް އަންނަ ތަރައްްޤީ އަކީ ފެށުނީއްސުރެ އައްޑޫގެ ރައްޔިތުން ކުރަމުން އައި އުންމީދެއް ކަމަށް ސިޔާމް ވިދާޅުވިއެވެ. އަދި އައްޑޫގެ ޓުއަރިޒަމް ކުރިއެރުވުމަށް އާއްމުން ތިބީ ވަރަށް ބޮޑަށް ބޭނުންވެފައި ކަމަށް ވެސް މި ޖަލްސާގައި ވާހަކަފުޅުދައްކަވަމުން ސިޔާމް ވިދާޅުވިއެވެ.
