ރިސޯޓުތައް ފިޔަވައި އެހެން ހުރިހާ ތަނަކަށް ވޯޓް ފޮށިތައް ފޮނުވައިފި
7 ސެޕްޓެމްބަރު 2023 | ބުރާސްފަތި 11:06ރިސޯޓުތަކަށް މާދަމާ ހެނދުނު ވޯޓް ފޮށިތައް އީސީން ފޮނުވާނެ
އިލެކްޝަންސް ކޮމިޝަންގެ ނައިބުރައީސް އިސްމާއީލް ހަބީބު
ރިސޯޓުތައް ފިޔަވައި އެހެން ހުރިހާ ތަނަކަށް ވޯޓް ފޮށިތައް ފޮނުވާފައިވާކަމަށް، އިލެކްޝަންސް ކޮމިޝަންގެ ނައިބުރައީސް އިސްމާއީލް ހަބީބު ވިދާޅުވެއްޖެއެވެ.
ރިޔާސީ އިންތިޚާބަށް އެ ކޮމިޝަނުން ވެފައިވާ ތައްޔާރީތަކާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ހަބީބު ވިދާޅުވީ، ހުރިހާ ރަށްތަކަށާއި ރާއްޖެއިން ބޭރަށް ވޯޓް ފޮށިތައް ފޮނުވާފައިވާއިރު، ރިސޯޓުތަކަށް މާދަމާ ހެނދުނު ވޯޓް ފޮށިތައް ފޮނުވާނެ ކަމަށެވެ.
ކޮންމެ 10 ވޯޓު ފޮއްޓަކަށް ކޯޑިނޭޓަރެއް ހުންނާނެކަން ފާހަގަކުރައްވައި ހަބީބު ވިދާޅުވީ، ކޯޑިނޭޓަރުން ގޮސް ހުރިހާ ކަންތައްތައް ފުރިހަމަތޯއާއި، ތަކެއްޗާއި ލިޔެކިޔުންތައްވެސް ހަމަތޯ ބަލާނެ ކަމަށެވެ.
ހަބީބު އިތުރަށް ވިދާޅުވީ ގިނަ އިންޓަރނޭޝަނަލް އޮބްޒަރވަރުން މިހާރު ރާއްޖެ އައިސްފައިވާއިރު، މާދަމާވެސް އިންޓަރނޭޝަނަލް އޮބްޒަރވަރުން އަންނާނެ ކަމަށެވެ. އަދި އެ ހުރިހާ ބޭފުޅުންނަށް ބްރީފިންގއެއް އޮންނާނެ ކަމަށެވެ.
ހޮނިހިރު ދުވަހު ބާއްވާ ރިޔާސީ އިންތިޚާބަށް 285،219 ވޯޓު ކަރުދާސް ޗާޕުކޮށްފައިވާކަމަށް އީސީން ވަނީ ބުނެފައެވެ. ކޮމިޝަނުން ކުރި އިއުލާނެއްގައި ވަނީ، އިންތިޚާބުގައި ވޯޓު ނެގުމަށްޓަކައި ވޯޓު ކަރުދާސްތައް ތައްޔާރު ކޮށްފައިވާ ކަމަށާއި އެ ކަރުދާސްތައް ޗާޕުކޮށްފައިވަނީ ނޮވެލްޓީން ކަމަށެވެ.
މި ފަހަރުގެ އިންތިޚާބު އޮބްޒަރވްކުރަން 165 އޮބްޒަރވަރުން ބައިވެރިވާއިރު، އޭގެތެރޭގައި ބޭރުގެ 22 މީޑިއާ ހިމެނެއެވެ. މި އަހަރުގެ ރިޔާސީ އިންތިޚާބުގައި 8 ކެންޑިޑޭޓުން ބައިވެރިވާއިރު، 282،395 މީހުންނަށް ވޯޓުލުމުގެ ހައްގު ލިބެއެވެ.
ސެޕްޓެންބަރު މަހުގެ 09 ވަނަ ދުވަހު ބާއްވާ ރިޔާސީ އިންތިޚާބުގައި މުޅި ޖުމްލަ 574 ވޯޓު ފޮށި ބަހައްޓާނެއެވެ. އެއީ މާލޭ ސަރަހައްދުގައި 176 ވޯޓު ފޮށި، މާލެ ފިޔަވައި ސިޓީތަކާއި އަތޮޅުތަކުގައި 384 ވޯޓު ފޮށި، ސިނާއީ މަސައްކަތްކުރާ ތަންތަނާއި ޖަލުތަކުގައި 6 ވޯޓު ފޮށި އަދި ރާއްޖެއިން ބޭރުގައި 8 ވޯޓު ފޮއްޓެވެ.
