ސިޔާސީ މަސައްކަތްކުރަން، ހެޔޮއެދޭ ފަރާތްތަކާއި ވިޔަފާރިވެރިން އަތުން ބޮޑެތި އަދަދުތަކުން ފައިސާ ލިބުނު، އޭގެ ތަފްސީލު ދޭކަށް ނުޖެހޭ: ޔާމީނު
ޔާމީނުގެ ޑޮލަރު އެކައުންޓެއް އޮއްވައި، އެޗްއެސްބީސީގެ އެކައުންޓަކަށް 1 ޑޮލަރު ޖަމާކުރައްވައި، އެ އެކައުންޓު ރީއެކްޓިވޭޓްކުރެއްވި
ވ. އާރަށު ޚިޔާނާތުގެ އިސްތިއުނާފު މައްސަލަ
ވ. އާރަށު ޚިޔާނާތުގެ މައްސަލާގައި ކުރީގެ ރައީސް އަބްދުﷲ ޔާމީންގެ ފަރާތްޕުޅުންނާއި ޔޫސުފް ނައީމްގެ ފަރާތުން ހުށަހަޅާފައިވާ އިސްތިއުނާފުގެ އަޑުއެހުމެއް ބުދަ ދުވަހު ހައިކޯޓުގައި ކުރިއަށް ގެންގޮސްފިއެވެ.
މި އަޑުއެހުމުގައި އޮތީ، ޔާމީނުގެ ފަރާތްޕުޅުން ހުށަހަޅާފައިވާ މަނީ ލޯންޑަރިންގެ ކުށުގެ ދައުވާއާގުޅޭ އިސްތިއުނާފު ހުށައެޅުމެވެ.
ޔާމީނުގެ ފަރާތްޕުޅުން ހުށަހަޅާފައިވާ ދެ ދައުވާގައިވެސް އިސްތިއުނާފީ ނުކުތާތަކުގެ ގޮތުގައި ހިމެނިފައިވަނީ މައިގަނޑު އެއް ނުކުތާތަކެއްކަން ފަނޑިޔާރު ފާހަގަކުރެއްވިއެވެ. އެގޮތުން ޝަރީއަތުން ވަނީ ވަގުތު ސަލާމަތް ކުރުމަށްޓަކައި ތަކުރާރުނުވާނެ ގޮތަށް ނުކުތާތައް ހުށަހެޅުމަށް ވިދާޅުވެފައެވެ.
އެގޮތުގެ މަތިން ޔާމީނުގެ ފަރާތުން ވަނީ އިސްތިއުނާފީ ނުކުތާތައް ހުށަހަޅާފައެވެ.
މި އަޑުއެހުމުގައި ޔާމީނު ވިދާޅުވީ، ގާނޫނުގައި ބުނެފައި އޮންނަނީ އިންތިޚާބުތަކަށް ކުރާ ޚަރަދުގެ ތަފްސީލު ކަމާބެހޭ އިދާރާތަކަށް ހިއްސާކުރަންޖެހޭ ވާހަކަ ކަމަށާއި، ސިޔާސީ މަސައްކަތް ކުރަން ހެޔޮއެދޭ ފަރާތްތަކުން ދޭ ފައިސާ ހާމަކުރާކަށް ނުޖެހޭނެއެވެ.
އެއަށްފަހު ދެން ކުރިއަށްދިޔައީ އެ ނުކުތާތަކަށް ދައުލަތުން ރައްދު ދިނުމެވެ.
މި މައްސަލައާ ގުޅިގެން ދައުލަތުން ބުނެފައިވާ ގޮތުގައި ޔާމީނުގެ ޑޮލަރު އެކައުންޓެއް އޮއްވައި، އެޗްއެސްބީސީގެ އެކައުންޓަކަށް 1 ޑޮލަރު ޖަމާކުރައްވައި، އެ އެކައުންޓު ރީއެކްޓިވޭޓް ކުރެއްވުމަށްފަހު އެއަށް 1 މިލިއަން ޑޮލަރު ޖަމާކުރައްވާފައިވެއެވެ.
އެ ފައިސާއަކީ ޑޮލަރު މާރުކުރުމުގެ ގޮތުން ޔޫސުފް ނައީމް އަތުން ބައްލަވައިގަތް ފައިސާކަމަށް ވިދާޅުވާއިރު، 1 މިލިއަން ޑޮލަރަށްވާ 15 މިލިއަން ރުފިޔާއަކީ ވުޖޫދުގައިވާ ފައިސާކަން އެނގޭނެ މާލީ އެއްވެސް ހެތްކެއް ފެންނަން ނެތްކަމަށް ދައުލަތުގެ ވަކީލު ވިދާޅުވިއެވެ.
އެއީ މާލީ ބަޔާންތަކާއި އެނޫންވެސް ރެކޯޑުތަކުން ފެންނަންހުރި ފައިސާތަކެއް ނޫންކަމަށް ދައުލަތުގެ ވަކީލު ވިދާޅުވިއެވެ.
މަނީ ލޯންޑަރިންގއާއި ރިޝްވަތު ގަބޫލުކުރުމުގެ ކުށުގެ ދައުވާ ސާބިތުވެ، ޔާމީނަށް 11 އަހަރުގެ ޖަލު ހުކުމެއް ވަނީ އިއްވާފައެވެ. އަދި 5 މިލިއަން ޑޮލަރުން ވަނީ ޖޫރިމަނާވެސް ކޮށްފައެވެ. ނަމަވެސް ޔާމީނުގެ ފަރާތްޕުޅުން ހުށަހެޅި، ހުކުމް ތަންފީޒުކުރުން ފަސްކުރުމުގެ މައްސަލަ ބަލައި ހައިކޯޓުން ވަނީ، ޖޫރިމަނާއާގުޅޭ ބައިގެ ހުކުމް ތަންފީޒުކުރުން ފަސްކުރުމަށާއި، ޖަލު އަދަބު ތަންފީޒުކުރުން ފަސް ކުރެވެން ނެތް ކަމަށް ނިންމާފައެވެ.
