ތިމަރަފުށީ ގޮނޑުދޮށް ހިމާޔަތްކުރުމުގެ މަސައްކަތް ބަޔަކާ ހަވާލުކޮށްފި
ތިމަރަފުށީ ގޮނޑުދޮށް ހިމާޔަތް ކުރުމަށް 280 މީޓަރުގެ ބޮޑުހިލައިގެ ރިވެޓްމަންޓް ޖަހާނެ
ޕްލޭނިންގ މިނިސްޓްރީން ސާސްއީއާއެކު އެއްބަސްވުމުގައި ސޮއިކުރުން
ތ. ތިމަރަފުށީ ގޮނޑުދޮށް ހިމާޔަތްކުރުމުގެ މަސައްކަތް ބަޔަކާ ހަވާލުކޮށްފިއެވެ.
ސަރުކާރުން މި މަސައްކަތް ހަވާލުކޮށްފައިވަނީ ސާސް އީ ކޮންސްޓްރަކްޝަން ޕްރައިވެޓް ލިމިޓެޑާއެވެ. މި އެއްބަސްވުމުގައި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ އެ މިނިސްޓްރީގެ ޑިރެކްޓަރ ޖެނެރަލް ފާތިމަތު ޝާނާ ފާރޫގެވެ. އަދި ސާސް އީ ކޮންސްޓްރަކްޝަންގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަބްދުﷲ ސަވާދެވެ.
މި މަޝްރޫއުގެ ދަށުން ތިމަރަފުށީގެ ގޮނޑުދޮށް ހިމާޔަތްކުރުމަށް 280 މީޓަރުގެ ބޮޑުހިލައިގެ ރިވެޓްމަންޓް ޖަހާނެއެވެ. އަދި ބީޗް ބެކްފިލްއާއި އޮފްޝޯރ ބްރޭކްވޯޓަރގެ ގޮތުގައި 260 މީޓަރުގެ ބޮޑުހިލައިގެ ބްރޭކްވޯޓަރ ގާއިމު ކުރުމަށްވެސް ވަނީ ހަމަޖެހިފައެވެ.
މި މަޝްރޫއުގެ މަސައްކަތް ސަރުކާރުން ސާސް އީ ކޮންސްޓްރަކްޝަނާ ހަވާލުކޮށްފައިވަނީ 240 ދުވަހުގެ ތެރޭގައި ނިންމާ ގޮތަށް 22،331،248.56 (ބާވީސް މިލިއަން ތިންލައްކަ ތިރީސް އެއް ހާސް ދުއިސައްތަ ސާޅީސް އަށް ރުފިޔާ، ފަންސާސް ހަ ލާރި) އަށެވެ.
ޕްލޭނިންގ މިނިސްޓްރީން ބުނެފައިވާގޮތުގައި މި މަޝްރޫއާއެކު ތިމަރަފުށީ އިރުދެކުނު ފަރާތަށް ދިމާވެފައިވާ ރަށްގިރުމުގެ މައްސަލައާއި ރަށަށް އުދައެރުމުގެ މައްސަލައަށް ހައްލު ލިބިގެންދާނެއެވެ.
