މުއިއްޒަށް ވޯޓު ލިބޭނީ ރައީސަށް ވުރެ %12-8 މަދުން - އިމްރާން
މުއިއްޒަށް ވެރިކަން ލިބިވަޑައިގެންފި ނަމަ ރާއްޖެ ދަރަނިވެރިވެ ބޭންކްރަޕްޓް ވާނެ ކަމަށް ވެސް އިމްރާން ވިދާޅުވި
އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ
ކުރިއަށް އޮތް ރިޔާސީ އިންތިޚާބުގައި އިދިކޮޅު ޕީއެންސީގެ ކެންޑިޑޭޓް، މުހައްމަދު މުއިއްޒަށް ވޯޓު ލިބިވަޑައިގަންނަވާނީ ރައީސް އިބްރާހީމް މުހައްމަދު ޞާލިހު އަށް ލިބިވަޑައިގަންނަވާ މިންވަރަށް ވުރެ، 8 އިންސައްތަ އާއި 12 އިންސައްތަ ވޯޓު މަދުން ކަމަށް އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
އިމްރާން އެފަދައިން ވިދާޅުވީ އުފާވެރި އަމާން ރާއްޖެ ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ. އިމްރާން ވިދާޅުވީ މާތްﷲގެ އިރާދަފުޅާއެކު ކުރިއަށް އޮތް އިންތިޚާބު ކާމިޔާބުވާނެކަން ޔަގީންކުރައްވާ ކަމަށެވެ. އެއްވެސް ދާއިރާއަކުން ރައީސަށް މެޖޯރިޓީ ގެއްލެން ބޭނުންފުޅުނުވާ ކަަމަށް އިމްރާން ވަނީ ވިދާޅުވެފައެވެ. އެހެންކަމުން އެގޮތަށް މަސައްކަތް ކުރުމަށް ކެމްޕެއިން ޓީމްތަކަށް އިމްރާން ގޮވާލެއްވިއެވެ. އަދި މުއިއްޒު އަށް ވެރިކަން ލިބިދާނެތީ ވަރަށް ބިރުފުޅުން ހުންނެވި ކަމަށާއި، މުއިއްޒުގެ ވެރިކަމެއްގައި ޖަލުތައް ފުރޭނެ ކަމަށް ވިދާޅުވިއެވެ. މީގެ އިތުރުން މުއިއްޒުގެ ފަހަތުގައި ތިބޭނެ ބަޔަކު ނުތިބޭނެ ކަމަށާއި، އޭރުން ރާއްޖެ ދަރަނިވެރިވެ ބޭންކްރަޕްޓް ވާނެ ކަމަށް ވެސް އިމްރާން ވަނީ ވިދާޅުވެފައެވެ.
ކުރިއަށް އޮތް ރިޔާސީ އިންތިޚާބަކީ ސަކަރާތެއްގެ ގޮތުގައި ނުވަތަ ޖޯކެއްގެ ގޮތުގައި ބައެއް ކެންޑިޑޭޓުން ހަދަމުންދާ ކަމަށް އިމްރާން ވިދާޅުވިއެވެ. ނަމަވެސް ކުރިއަށް އޮތް ރިޔާސީ އިންތިޚާބަކީ ވަރަށް ސީރިއަސް އިންތިޚާބެއް ކަމަށް އިމްރާން ވިދާޅުވިއެވެ. އިމްރާން ވަނީ ރައީސް ނޫން އެހެން ބޭފުޅަކަށް ވެރިކަން ލިބުނަސް ވެރިކަން ކުރަން ނޭނގޭނެ ކަަމަށް ވިދާޅުވެފައެވެ. އެހެންކަމުން ސަމާސައަކަށް ނޫނީ ސަކަރާތަކަށް މި އިންތިޚާބު ހަދައިގެން ނުވާނެ ކަމަށް ވެސް އިމްރާން ވަނީ ވިދާޅުވެފައެވެެ.
ބޮޑުތިލަދުންމަތީގެ މޭގަނޑު އުފުލިގެން އައިސް ރައީސާއި އެކުގައި އޮތް މަންޒަރު ވަރަށް ސާފުކޮށް ފެންނަމުންދާ ކަމަށް ވެސް އިމްރާން ވިދާޅުވިއެވެ. ކުޅުދުއްފުށި އޮތީ ރައީސަށް ގެއްލިފައި ކަމަށާއި ކުޅުދުއްފުށިން އިދިކޮޅު ފަރާތްތަކަށް މެޖޯރިޓީ ލިބޭނެ ކަމަށް ބުނި ނަމަވެސް އެކަން އޮތީ އެހެން ނޫންކަން ކުޅުދުއްފުށިން ރައީސަށް ދެންނެވި މަރުޚަބާއިން އެނގޭ ކަމަށް އިމްރާން ވަނީ ވިދާޅުވެފައެވެ.
